1 Bezalel acacia tsing pwa samkakbung teilu. Pe tie cai cubit kena eh pempie; pe di cai cubit ket eh pempie; nah pe hu cai cubit ket eh pempie. 2 Pa cide pelungle nah hegwale de kecak kemci le kemailu nah cide kecak le petu tei twagwalu.* 3 Pe pi mdai de ziemne pa ringgoi mdai kecakle teilu, ringgoi kena tuge lambie ge, nah ringgoi kena keda tu lambie ge teigai. 4 Pa acacia tsing pwa kepungtie teilu nah kecak le cide kemailu. 5 Pa kepungtie dungde samkakbung tu lebie ringgoidung gage kailu, samkakbung keu punglu kerane. 6 Pecai pa kecak kemci pwa pegum teilu. Petie cai cubit kena eh pempie, nah pedi cai cubit ket eh pempie. 7 Bezalel kecak hedeu kelube le cherubim kena pe gum lule ailam ziemne teilu. 8 Cherub ket pe gum tuge lam ziemne teilu, nah cherub kedage keda tuge lam ziemne teilu. Ci kenade teipwa pegum de ngngwa ket teilu.* 9 Cherubim penui hesiudung kezang nghang pet eh pe gum dede gumdi. Cherubim hangge gede kezumoklu nah pe gum sum dega pie di.

10 Pecai Bezalel acacia tsing pwa table teilu. Cide petie cai cubit kena, pedi cai cubit ket, nah pehu cai cubit ket eh pempie. 11 Pa cide kecak kemci le kemailu nah kecak kemci petu tei twagwalu. 12 Cide ziemne pa pemung tei twagwalu pedi mibadeu mdet di ge*, pe mung de ziemne kecakle petu twagwalu. 13 Pa cide ziemne kecak ringgoi mdai teilu nah ringgoi cidungde de kimiak mdaidung gage kailu, pe pi mdai kebamde ga. 14 Kepungtiedung bam kailu kerane ringgoi cidungde pe mung gage keulu, mabam de punglu kerane. 15 Pa acacia tsing gade kepung tiedung teilu nah kecak le cide kemailu, table de punglu kerane. 16 Pa table gage kai kera niadung teilu, lidung, matiadung, hekwakdung nah likiemdung zau reca ziemne teu kerane. Pa cidungde kecak kemcile teilu.

17 Pa hedeu kelube kecak kemci pwa mitaubung bam teilu. Pa mitaubung bam pe singkam nah pe tie desi eh teilu. Pe piakdung, ma nei singkam, nah pe padung desi eh cidungde ket teilu. 18 Pe tudung gade pe kiak herok ge lunghpet, pe kiak kecum ge tuge lamde lunghpet, nah mitaubungbam kiak kecum ge keda lamde lunghpet. 19 Pe kiak raitube hepiak kecum ge almond pa kecunzwa nah manei singkam nah mapa ge desi eh teilu, nah pe kiak keda ga hepiak kecum ge almond pa kecunzwa nah manei singkam nah mapa ge desi eh teilu. Mitaubung bam gade pe kiak herok lunghpet kecudungde nzwaciak. 20 Mitaubungbam ga, sum tie, almond pa kecunzwa piak mdai teikelu bam, manei singkam nah mapadung desi eh. 21 Pe kiak raitu kangga manei singkam ge bam, cide ket teilu, nah pe kiak keda kena kangga manei singkam ge bam, cide de ket teilu. Ainzwa kesiakke eh pe kiak pe kecumbe kena kang gade manei singkam ge bam, cide ket teilu. Mitaubung bam gade pe kiak herok lunghpet kecudungde nzwaciak. 22 Manei singkam nah pe kiakdung pelane kangge, kecak kemci ta ge hedeu kelu kang ge. 23 Bezalel kecak kemci pwa mitaubungbam, nah pe mibung hena, kensiptiedung nah pe kwakdung teilu. 24 Pa mitaubungbam nah pe niadung kecak kemci talent ge* le teilu.

25 Bezalel mariem kehengui keru recabam teilu. Cide pa acacia tsing le pwa teilu. Pe tie cai cubit ket, nah pe di cai cubit ket. Cide petie pedi nsam, nah pehu cai cubit kena. Cide pe kiidung de kangge ciak eh teilu. 26 Pa mariem kehengui keru recabam kecak kemcile kemaidi, pe peureu, pe tudung, nah pe kiidung. Cide ziemne pa kecakde de petu tei twagwalu. 27 Pa cide ziemne ringgoi kena kecakle pwa teilu delwe pe mung kangga pe mbie kena ga keu gailu. Ringgoidung keu kepungtie gage bazap teigai lu iciu eh recabam pwalu kera. 28 Pa acacia tsing pwa kepung tiedung teilu, nah pa kecak le cidungde kemailu. 29 Pa kemci keheniak ca de nah kereca kehengui kemci de teilu, periem kehengui keteime ta.