1 RAMPAUBE Moses dage rangdi, 2 "Israelme leune dage rang beulu a ziemne reca ge teigai lulo eh mina caugame pe lung gade teibeu neula bi. Nang a ziemne mapeu aidungde luulu maisia. 3 Mapeu aidungde nang penui dade luu kerabedung da: kecak, rangkanggeu, nah hetageu; 4 kemhei, gieremang nah gierei kecu helangdui; linen pai keyi; hemeu mai; 5 hemeuseu geu swagie kelube nah teigeu keyibe; acacia tsing; 6 kemcini mitaubung ziemne maca; maca keheniak nah marim kehengui ziemne mosala; 7 onyx tsudung nah tangtsu pemi kehung keda cingkupei hekeutupai nah hekarakcum gage kai kerane. 8 Penuide peu kemcini ge a ziemne tei beulu iciu eh Ih penui kakga lunghlu kerane. 9 Riemkelu Ih ncu keulia kerade nzwa kesiakge eh reca paiki ziemne nah pe netdung pelane ziemne nnui teilu maisia.

10 Penui acacia tsing le samkakbung ge teizie. Pe tie cubit kena eh pempie maisia; pe di cubit ket eh pempie zie; nah pe hu cubit ket eh pempie zie.* 11 Nang cide pe lungle nah hegwale kemci kecak le kezuilu maisia, nah nang pe reuga kecak le petu tei twagwalu maisia. 12 Cide ziemne kecak ringgoi mdai teilu maisia, nah cidungde pwa samkakkelu bung pi mdai gage kailu, ringgoi kena tuge lam, nah ringgoi kena keda lam. 13 Acacia tsing le petiedung teilu nah cidungde kecakle keniaklu. 14 Petiedung de samkakkelu bung mbie ga kebam ringgoidung gage za gailu, samkakbung de pwalu kerane. 15 Petiedung de samkakbung ringgoi ga bamlu maisia; cikade cide keudi kerabe ma. 16 Ih ncu samkakkelu hezaidung peulai eh kebamde samkakbung gage kailu maisia. 17 Nang pegum kemci kecakle teilu maisia. Petie cubit kena eh pempie maisia, nah pedi cubit ket eh pempie maisia.* 18 Nang pegum tu kenade ziemne kecak hedeu kelube le cherubim* kena teilu maisia. 19 Cherub ket pegum tuge lam ziemne teilu, nah cherub kedage keda tu ziemne. Cipaukena de pegum gage tei ncütlu eh kang ge nzwa teilu. 20 Cherub kenade peu penai hesiu hwapet lu nah pe gum reu gumlu. Cherub kenade ketket depeu kezumoklu nah pe gum sum ga pielu. 21 Nang pe gum de samkakbung reu gage kailu maisia, nah Ih ncu samkakkelu hezaidung peu kebamde samkakbung gage kailu maisia. 22 Samkakkelu bung gade Ih ncu redau luzie. Pegum reu a bam gade Ih ncu ngngwa resiu zie. Cide samkakkelu samkakbung reuga cherubim kena kak gade zie ciu eh Ih ncu resiu zie ajadung leune ha Israelme ziemne Ih ncu peuzie.

23 Acacia tsing le pwa mabam ge teilu maisia nang. Pe tie cubit kena maisia; pe di cubit ket maisia, nah pe hu cubit ket eh pempie maisia.* 24 Cide kemci kecak le nang keniaklu maisia nah kecak le petu tei twagwa lu. 25 Cide ziemne pe mung tei twagwa lu pedi mibadeu mdet dige, pe mung de ziemne kecak le petu tei twagwa lu. 26 Cide ziemne nang kecak ringgoi mdai teilu maisia nah pe pi mdai kebam, tu mdai de gage kailu. 27 Ringgoi dungde pe mung gage kailu maisia pe tiedung bam teilu kerane, iciu lude mabam de pwalu kerane. 28 Acacia tsing le pwa pe tiedung teilu nah cidungde kecak le keniaklu iciude mabam be cidung dele pwalu kerane 29 Nang lidung, matiadung, hepiakdung nah hekwakdung zau recadung kai kera ziemne teilu maisia. Nang cidungde kemci kecak le teilu. 30 Nang kemci tangku a dwaga taktyeibam gage kaibeu mui maisia.*

31 Nnui kecak hedeu kelu kemcibe le mitaubung bam teilu maisia. Mitaubung bam pe singkam nah petie de kai eh teilu. Pe piakdung, penei singkam, nah pe padung pelane de kangge eh cide teilu kerabe. 32 Pe kiak herok pe mbie gade mpet maisia, tuge lamde kiak cum mpet maisia, nah mitaubung kiak kecum keda tu lamde mpet maisia. 33 Pe kiak raitube ga hepiak kecum bam maisia almond pa nzwa teilu eh, penei singkam nah mapa de si eh, nah hepiak kecum almond pa nzwa teilu eh pe kiak keda ga, penei singkam nah mapa de si eh. Cide mitaubung gade kempet pe kiak herok pelane de nzwaciak maisia. 34 Mitaubung ga, sumbe tie ga, almond pa nzwa teilu eh hepiak mdai bam maisia, penei singkam nah mapadung de si eh. 35 Raitube kiak kena kangga manei singkam bam maisia, cide kangge eh tei zie, nah pe kenabe kiak kena kangga manei singkam bam maisia, cide de kangge eh teizie. Cide kesiak eh pe kecumbe kiak kena kangga de manei singkam bam maisia, cide kangge eh teizie. Cide mitaubung gade kempet pe kiak herok pelane de nzwaciak maisia. 36 Manei singkamdung nah pe kiakdung kemci kecak hedeu kelube le kangge eh teilu maisia. 37 Nnui mitaubung bam nah mitaubung hena teilu, nah mitaubung de pereu gage kailu cidungde ziemne cikade kebaa peulu kerane. 38 Kensiptie nah pe kwakdung kemci kecak le teilu maisia. 39 Kemci kecak talent ge teulu mitaubungbam nah pe niadung teikerane.* 40 Lamlwa aide gade ncu pwalia kecu rehi de gade cidungde tei kera teilu.