1 Pecai RAMPAUBE Moses de mpau eh ranggai, 2 "Pielo, Ih Judah leuh gade, Uri napei Bezalel Hur capei, de kedet luda. 3 Ih a Rabe le Bezalel de teipui luda, Ih pecu maci, kecikecet, nah makeci, heciem leune teilu kebui peu dida. 4 Perehi keyi ciem le teilu kebui nah kecak, rangkanggeu, nah hetageu le mateilu kebui; 5 tangtsudung pang lwe perehi teilu kebui nah tsing herui lwe, heciem leune teilu kebui. 6 Pecu nzang kera, Ahisamak napei Oholiab de Ih kedetlu, Dan leuhme gade. Ih heciem keci pwa makecime pelane mlung gage kaibeu dida iciude Ih tei lulo kebeu leune penui teilu kerane. Aide ncüt 7 kengkwa paiki, zierang samkakbung, ngaugia gum samkakbung ga, nah paiki gu niadung leune, 8 makekaibam nah lidung, kemci mitaubam nah penia leune, marim kehengui recabam, 9 keru ratak ziemne recabam de ga penia leune, nah li kedige pe singkam de si. 10 Paidak yitube de ncüt si, kemci paidung cingkube Aaron nah pe namedung ziemne, a ziemne de kaipwa bamlu ciude penui cingkumedung nzwa heta tei luzie. 11 Keheniak maca nah marim keyi kehengui aide kemci bam ziemne ncüt si. Heciem ta keteime aidung pelane Ih n dage aja kai kebeu kesiakke teilu maisia."

12 Pecai RAMPAUBE Moses de mpau delwe rangdi, 13 "Israelme dage rang beulo: ‘Nnui RAMPAUBE Sabbath tingbadung mzai siakte lu maisia, aidungde pa nah nnui kakga marehi ge nnui mina ceheu lunggwang dai kerame ziemne zie iciu eh nnui pa au RAMPAUBE lie kecu cilu kerane, pekatei ziemne nnuide keuntsam kebeube. 14 Cine nnui Sabbath de mzai zie, cide nnui ziemne kemci ge lie mneilu maisia, pe ziemne kainzeulu. Keheibe de cide tei hera kecube de ketsai gage kai bizie. Caugamme Sabbath benai heta teibi, cipaude de pe minadung dade keu mpet bi dizie. 15 Mata lang herokne ziemne tei zie, dede lang henane benai au Sabbath mtak zing de zie, RAMPAUBE dwa mci. Caugamme Sabbath benai mata keheibe de tei kelame ketsai gage kaibi dizie. 16 Ciziemne Israelme Sabbath mnei bi maisia. Penui mina ceheudung kelungta samkak gade mnei maisia. 17 RAMPAUBE nah Israelme kakga Sabbath de marehi ge lamui zie, RAMPAUBE lang herokne gage tinggim nah kideu tei kelu ziemne, nah lang henane benai pa mtaklu nah reluilu.’"

18 Tinggwang Sinai Deutu gade Moses de ngngwa mpau cang kedidau, pa pecu kerau tangtsu kwak kena samkak kelu hezai peu gai, tangtsu le tei kelube, pekatei pe ba le raulu.