1 Pecai RAMPAUBE Moses de mpau, "Pharaoh da mie delwe pe dage rang beulu, ‘RAMPAUBE aide rangla: "Peu a minadung de tet lulo iciude penui acu reca lu kerane. 2 Magade nang penuide peu tet mei dicai, Ih hegau lepwa n deudi pelane gage keherei kaizie. 3 Nile reuki ga hegau le pui dizie. Penui cikade mpet lwe nnui kilung ga lüt zie, n zeubung nah n zeu ga. Penui n kilame kilungdung ga lüt zie. Penui n minadung da gwang zie, n mimang ga, nah n tangku keru kwakdung gade. 4 Hegaudung ncu, n minadung de, nah n kilame leune de ketang zie"’" 5 RAMPAUBE Moses dage rangdi, "Aaron dage rang beulu, ‘N ba le nah n tui kereukidung, reuceunadung, nah rejaaidung reu gage hwa gailo, nah Egyptme deu reu ga hegaudung de teumpet lulo.’" 6 Aaron Egyptme duidung reu gage pe ba hwagai, nah hegaudung dui gade mpetlwe Egyptme deu gum puidi. 7 Dede Egypt kerekamedung de penui reka le ci kesiak ge teigai; penui Egyptme deu reu gage hegaudung keugwang gai.

8 Pecai Pharaoh Moses penai Aaron de qulu delwe rangdi, "RAMPAUBE dade kie beulo a dade nah a minadung dade hegaudung keu mpetdi kerane. Iciu sangne minadung de Ih peu tet luzie, nah penui pe dage ratak teigai lu kerane." 9 Moses Pharaoh dage rangdi, "Ih daidau ge n ziemne, n kilamedung, nah n minadung ziemne kekie tei beu lubui bi nang cide a dage rangbeu lu kera ziuyi bam lubui, iciude hegaudung n dade nah n kilungdung gade gwagi di luzie nah Nile kereuki rünne ga bam di kerane." 10 Pharaoh rangdi, "Ncünne." Moses rangdi, "Nang rang kebeu nzwa iciu lu, iciude RAMPAUBE anui Tinggwang kenzwa gah lie kecu nang cilu kerane. 11 Hegaudung n dade, n kilung gade, n kilamedung dade, nah n minadung dade tetti zie. Penui kereuki rünne ga bam dizie." 12 Moses penai Aaron Pharaoh dade tet mpet di. Pecai Moses RAMPAUBE dage mra gai pa hegaudung Pharaoh dage kai kenzeu de ziemne. 13 Moses kie kegai nzwa RAMPAUBE teibeu: Hegaudung kilungdung ga, kigu ga, nah luhdung gade tsai kapdi. 14 Minadung hegau tsai kedidung de pa hekwa ncüt lwe kebaulu, nah hangdeu perim nnamdi. 15 Dede Pharaoh kerelui ngaulu dige, pa pe mlung takdi nah Moses penai Aaron sam kingnei tadi, RAMPAUBE cinzwa di kera rang kebeu nzwa.

16 RAMPAUBE Moses dage rangdi, "Aaron dage rangbeu lu, ‘Ngu hetui hwapet eh hangdeu ga rebui de dap gailo, iciu eh Egyptme deu pelane ga maiciemne mmi di kerane.’" 17 Penai cinzwa teigai: Aaron pe ba nah petui le hwapet. Pa hangdeu ga rebui de dapgai. Maiciemnedung minadung nah makaunedung da gwangdi. Hangdeu ga rebui pelane maiciemne mmi di Egyptme deu leune ga. 18 Kerekamedung penui reka gade maiciemne tei mpet kera tei, dede penui teilu tadi. Maiciemne mina nah makaunedung da bamdi. 19 Pecai kerekame Pharaoh dage rangdi, "Aide Tinggwang zurang* da." Dede Pharaoh mlung hungdi, cine pa penui sam kingnei meidi. Pharaoh ainzwa di kera RAMPAUBE rang kebeu nzwa teidi.

20 RAMPAUBE Moses dage rangdi, "Tingcang nuge cuhlwe pa kereuki ga pet keladau Pharaoh dwa sap lulo. Pe dage rang beulu, ‘RAMPAUBE aide rangla: "Peu a minadung de tet lulo iciude penui acu reca lu kerane. 21 Dede magade nang a minadung de peu tet meidi cai, Ih tammainedung kekieege n dage, n kilamedung, nah n minadung nah nnui kidung dage langgai zie. Egyptme kidung tammainedung le pui dizie, nah penui sap kebam hangdeu ga kecang de tammainedung le pui dizie. 22 Dede cipau benai a minadung lungh kebam deu, Goshen cuikui de teu ntsamceu dizie, iciude tammainedung cika kette bamlak. Aide aiciu dizie, iciude hangdeu aide kakte Ih RAMPAUBE lie kecu nang cilu kerane. 23 Ih a minadung nah n minadung kakga kencam* tei pwapeu zie. Ncünne a kengking marehi aide tei zie."’" 24 RAMPAUBE cinzwa teigai, nah tammaine haudi kekieege Pharaoh kilung ga nah pe kilame kilungdung ga gwangdi. Egyptme deu pelane, hangdeu tammaine ne tei ngkapdi.

25 Pharaoh Moses penai Aaron de qulu delwe rangdi, "Mie, nnui Tinggwang dage nnuikatei nnui deu gade ratak teigai lulo." 26 Moses rangdi, "Cide anui ziemne cinzwa tei kera petau ma, kedanemene anui RAMPAUBE anui Tinggwang dage ratakdung tei kegai Egyptme ziemne au kengkau tah ge. Magade penui miakngau gade Egyptme ngkau kela ratakdung anui teigai liecai, penui anuide tangtsu le sam lak luini? 27 Ma, cide au anui hetaideu ga langcumne beuhzie tei eh tet kerabe nsam, RAMPAUBE anui Tinggwang dage ratak tei kera ziemne, pa anuide aja kai kebeu nzwa." 28 Pharaoh rangdi, "Ih nnuide peu tet eh hetaideu gade RAMPAUBE nnui Tinggwang dage ratak tei kerane peu zie da. Nnui tet mdeisüt di mecai cangda. A ziemne kekie tei beulo." 29 Moses rangdi, "Ih n dade tet mpetti herizi, Ih RAMPAUBE dage kie zie iciu eh ncünne tammainedung ncu, Pharaoh, nah n kilamedung, nah minadung de gidi kerane. Dede nang hecwa teu eh sampet teisi ta lu maisia anui leuhme de RAMPAUBE dage ratak tei kera peu tet laklie di kerabe ma." 30 Moses Pharaoh dade tet mpet delwe RAMPAUBE dade kekie tei. 31 RAMPAUBE Moses kekie nzwa teibeu; nah pa tammaine haudung Pharaoh dade, pe kilamedung dade, nah pe minadung dade keugi di. Kette bam tadi. 32 Dede aipau piade Pharaoh pe mlung hungdi, nah pa pe minadung de peu tet ma.