1 Israelme leuh pelane Sin hetaideu gade tetdi, Rampaube rang kebeude mzui eh. Penui Rephidim gage ramzeuki teilu, dede mina ziemne dui sak kera gah. 2 Cine aide ziemne minadung Moses de mmau eh rangdi, "Anuide dui sak kera halo." Moses rangdi, "Daitei nnui acu ngngwa repia auno? Daitei nnui RAMPAUBE de kedei au no?" 3 Minadung hereu sütdi, nah penui Moses de ncam eh rangdi, "Daitei nang anuide Egypt gade ngngwampet no? Anuide nah anui namedung nah anui kaunedung de peu hereu eh tsaidi kerane ni?" 4 Pecai Moses RAMPAUBE dage mra gai, "Ih mina aidungde de keu daipai tei laino? Penui acu tangtsu sam kera mtei pwabam dida." 5 RAMPAUBE Moses dage rangdi, "Nang Israelme hangkiame kangge de ngngwalu delwe minadung dwa rai miecu. Nang kereuki pwa dap kecu tui de pwalu, delwe miecu. 6 Ih n dwaga sap luzie cika Horeb* ga tangtsu reuga, nah nang tangtsu de dap zie. Dui cikade lwapet dizie minadung sak kera ziemne." Pecai Moses cide nzwa teigai Israel hangkiame kengau gade. 7 Pa heni cide de Massah nah Meribah* qulu kedanemene Israelme ncam kedine, nah kedanemene penui RAMPAUBE de kedei eh rangdi, "RAMPAUBE anui kakga lami la meno?"

8 Pecai Amalek reugwame gwang nah Israel de Rephidim gade gwa ketang. 9 Cine Moses Joshua* de rangbeu, "Mina kangge de kedetlu nah miecu. Amalek de regi kera. Ncünne Ih hangdeutu ga Tinggwang tuitie de pwalwe sap luzie." 10 Moses rangkebeu nzwa Joshua Amalek de regi, cidau Moses, Aaron nah Hur hangdeutu reuga nghang di. 11 Moses pe ba hwacuh kebamdau, Israel au ngkieng bamla; pa pe ba mtak kedidau, Amalek ngkieng bamla. 12 Moses ba leu dige, Aaron penai Hur tangtsu kangge pwa gwang nah pecu peu bamlu kera ziemne pe kang gage kaibeu. Iciu kelucaide, Aaron penai Hur pe ba pwacuh beu, hangge pau pe mbie gelam nah kedabe pe mbie kedale lambie. Cine tingnaimiak nlüt kemaktane Moses ba giepwa bamdi. 13 Ainzwa eh Joshua kiengtie le Amalekme de ngamlu. 14 RAMPAUBE Moses dage rangdi, "Aide laisiukwak ge gage raulu nah Joshua dage pei gailu, kedanemene Ih tingkam kang gade Amalek de kensungde keumpet mci dizie." 15 Pecai Moses recabam ge teilu nah pa cide de "RAMPAUBE au a pailim," de qulu. 16 Pa rangdi, "Kedanemene heba ge RAMPAUBE kedi bam de mcau eh hwacuh kecune*, RAMPAUBE Amalek de ceheu ge gade ceheu ge ngngwa hereu teila zie."