1 Pecai RAMPAUBE Moses de mpau, rang eh, 2 "Israelme dage rangbeulo, penui nreu cailigwang Migdol namceu penai jaaidi kakga, Pi Hahiroth namceu nah Baal Zephon namceu dwa gage ramzeuki tei lulo beulo. Nnui jaadi kungga Pi Hahiroth de ketsapreu lege ramzeuki tei lu. 3 Pharaoh Israelme ha rang zie, ‘Penui kideu ga rwahui lalie. Hetaideu ne penuide gumcim luda.’ 4 Ih Pharaoh mlung teitak gaibeu zie, nah pa penuide gwazui mie zie. Ih Pharaoh nah pe reugwame pelane ziemne herüt ngaulu zie. Ih RAMPAUBE lie kecu Egyptmedung cilu zie." Cine Israelme penui dage rang kebeu nzwa eh ramzeuki teilwe bamdi. 5 Israelme pakdi delie kecu Egypt ga hegwangpei dage paulia kebeu dau, Pharaoh nah pe kilamedung penui lung nreu gwang Israelme de mcaudi. Penui rang eh, "Anui daipai tei dino? Israelme anuide ngkwet bam kela gade anui penuide lungmpet beu dida." 6 Pecai Pharaoh pe bagidung mteilu nah pe reugwame de pa ngngwalu. 7 Pa kedet kelu bagidung haiherok keulu nah Egypt ga bagidung keda pelane de keulu, ci pelane reuga kedimedung bam. 8 RAMPAUBE Pharaoh, Egypt ga hegwangpei mlung teitak di, nah hegwangpei Israelme de gwazui mie. Cidau Israelme hecili eh tetti. 9 Dede Egyptme penuide gwazui mie, pe hekwendung, bagidung, hekwen keteumedung, nah reugwamedung pelane ncütlwe. Penui Israelme Jaadi Kegie kung Pi Hahiroth taiga, Baal Zephon dwage ramzeuki teilwe kebam gade penuide gwa canglu.

10 Pharaoh gwang mna zeu ge, Israelme ngangcuh piegai nah penui swagah di. Egyptme penui cai ga zui gwang kela ngaulu ge penui ngngi di. Israelme RAMPAUBE dage kengha kie eh mra gai. 11 Penui Moses dage rangdi, "Egypt ga heraudung gah lie eh nang anuide ngngwa pwa hetaideu aika ge peu tsai gaizie lie eh ngngwa teu lani? Daiziemne nang anui dage ainzwa teigai zeuno, Egypt gade anuide ngngwa mpet eh? 12 Aide anui Egypt gade n dage rangbeu melui ni? Anui n dage rang da, ‘Anuide anuikatei peu bamlo, iciu eh anui Egyptme ziemne matah tei bamlu kerane.’ Hetaideu gage tsai gaidi kera swade anui penui ziemne mata tei kebambe be yiki reu." 13 Moses minadung dage ranggai, "Ngngi di so. Nnui sap ga saplu delwe pielo henai RAMPAUBE nnuide kelikelu pwapeu lai kebam de. Kedanemene nang Egyptme henai kengaume de madauge de ngau dai si lakta. 14 RAMPAUBE nnui ziemne regi beuzie, nah nnui au zing delwe sap bam kera gwale ma." 15 Cidau RAMPAUBE Moses dage rangdi, "Daitei nang, Moses, acu qu daidai zeu auno? Israelme de tetpet gai culo beulo. 16 N tui pwa cuhlu, n ba hetwapet jaadi reu gage kaigai eh cide mzi kena tei dilo, iciu eh Israelmedung hangdeu kecangh reuga tet eh jaaidi cide kahlu kerane. 17 Mriak lulo Ih Egyptme mlung teitak gai zie iciu eh penui penui cai gwazui zie. Ih Pharaoh nah pe reugwamedung pelane, pe bagidung, nah pe hekwen keteumedung ziemne, Ih herüt ngaulu zie. 18 Cidau Egyptmedung acu lepwa RAMPAUBE lie eh cilu zie, Pharaoh, pe bagidung, nah pe hekwen keteumedung ziemne Ih herüt ngau kelu dau." 19 Tinggwang samgwabe, Israelme dwa tet kelabe, mlai nah penui cai tetgwang. Hemwa tsia penui dwa gade mlaipwa penui caile gwang sapdi. 20 Hemwa cide Egyptme gu ramzeuki penai Israelme gu ramzeuki kakga gwang bamdi. Cide Egyptme ziemne hemwa kemui ge, dede cide Israelme de tingmui pung mbaa beu, cine tingmuizie pelane de ketpe de kedabe lambie ga gwang mna ma.

21 Moses pe ba hwapwa jaadi reu gage kaigai. RAMPAUBE naimiak kepetle tingkai keci ge tingmuiziu pelane guipwa jaadi gui caili di nah jaadi cide teipwa hangdeu kecangh ge teilu. Ainzwa delwe duidung mzi kena teidi. 22 Israelmedung hangdeu kecangh ga jaaidi sum ga lüt di. Dui cide penui ziemne penui zetle nah hile tu de hangbie ge teidi. 23 Egyptme penuide gwazui mie. Penui penui cai gwasui jüja jaaidi sum ga lütlu, Pharaoh gu hekwendung, bagidung, nah hekwen keteumedung pelane de. 24 Dede tingcang nuge bamdapkak keraidau, RAMPAUBE mi tsia nah hemwa tsia gade Egyptme reugwamedung de pie nghung. Pa Egyptme kakgage kehebwak teigai. 25 Penui gu hekwenbagi pitadung kaamnam di, nah hekwen keteumedung kehereisüt delwe tet. Cine Egyptme ranggai, "Anui Israelme dade pakti lugo, kedanemene RAMPAUBE penui keleu tei eh anuide regi bam kedine."

26 RAMPAUBE Moses dage ranggai, "N ba hwapwa jaadi reu gage kaigai lo, iciu eh Egyptmedung, penui gu bagidung nah hekwen teukelame reu gage dui cailigwang lu kerane." 27 Cine Moses pe ba hwapet jaadi reu gage kaigai, nah cide tingcang gwangzeu ge dui ndaa rehi ga cailigwang di. Egyptme jaadi gage pakgai, nah RAMPAUBE Egyptme de gwapwa jaadi sum gage kaidi. 28 Pharaoh bagidung, hekwen keteumedung, nah pe reugwame bagidung caisui delwe pet kela pelane de dui cailigwang jaadi ne gumteudi. Migede ringlu tadi. 29 Cinzwa liede, Israelme au jaadi sum gade kecangh deu ga tet. Duidung penui ziemne penui zetle bie de nah hile bie de hangbie ge teidi. 30 Iciu eh RAMPAUBE Israelme de Egyptme ba gade kelibeu, nah Israelme Egyptme tsai kedi paaudung jaadi kungga ngau. 31 Israelme RAMPAUBE kengking kedi teu delwe Egyptme de regi kegai ngau keludau, penui RAMPAUBE de rütlu, nah penui RAMPAUBE de nlumlu nah pe kilabe Moses de de nlumlu.