1 Cipaucai Bezalel acacia tsingle keru ratak ziemne recabam teilu. Cide petie cubit mengei nah pedi cubit mengei, petie pedi nsam, nah pehu cubit kecum.* 2 Pa kimiak mdai de teimdi pwa ketumseu kii rehi nzwa teilu. Ketumseu kii de recabam de ngngwa ket teilu, nah pa cide hetageu le kemailu. 3 Pa cipau recabam ziemne maniadung pelane teilu, mimüt ziemne libung, hepeidung, likiemdung, teihzamtiadung nah mikwakdung. Pa mania aidung pelane hetageu le teilu. 4 Pa hegeurak ge recabam ziemne teilu, hetageu le dak kelu pe mung ngkang gage kai kerane, recabam mpie ga nghang canglu. 5 Pa ringgoi mdai ge teilu hetageu rak kimiak mdai de ziemne, hetsia cikage kailu kerane. 6 Bezalel acacia tsing tsia teilu nah cide hetageu le kemailu. 7 Pa recabam tudung ga kebam ringgoi gage hetsia dungde zalu, cide punglu kerane. Pa recabam de pelung mrwa eh teilu, tsingkwak dungle.

8 Bezalel hetageu likiem kedi ge hetageu pi de kai eh teilu. Pa kengkwa paiki dwaga hegwa ketei mipuidung gu miakpiebung le likiem teilu.

9 Pa kigu de teilu. Kehezupaidung kigu tingbangle tu kebamde linen pai keyidung le kaipwa bam, petie cubit haige.* 10 Kehezupaidung de tsia ngkai bam, nah hetageu singkam de ngkai. Cipau tsia dungde gage pe gwak kaincüt pwabam, rangkanggeu tie desi. 11 Cinzwa tingpeule tu liede, kehezupaidung petie cubit haige* bam hetsia ngkai sumlwe, hetageu singkam ngkai, hetsiadung de pe gwak ncüt eh, nah rangkanggeu tie de. 12 Kenlütle tu kehezupaidung decai petie cubit riakngei, hetsia kerei nah singkam kerei si eh. Hetsia gwakdung nah pe tiedung rangkanggeule teilu. 13 Kigu kepetle tu kebam de de petie cubit riakngei*. 14 Kehezupaidung kimui tu ge lam ziemne petie cubit kereimengei.* Cide hetsia kecum bam singkam kecum si. 15 Kigu kimui kedale tude kehezupaidung bam petie cubit kereimengei, hetsia kecum nah singkam kecum si. 16 Kigu twagwa kebam kehezupaidung pelane linen pai keyibele tei pwabam. 17 Hetsiadung ziemne singkamdung au hetageu le tei. Hetsiadung ziemne ma gwakdung nah petiedung au rangkanggeule tei, nah hetsiadung peu gum kerade de rangkanggeule teilu. Kigu hetsiadung pelane rangkanggeule gum pwabam. 18 Kigu herieki ga kehezuipai de au petie cubit ngkai. Kehezuipai de kemhei, gieremang nah langcim gierei, langcim dakkelu keyi gele teilu, nah pe tie cubit ngkai. Cide petie cubit ngkai nah pehu cubit mengei, kigu kehezuipaidung nzwa.* 19 Cide hetageu singkamdung mdai bam nah rangkanggeu gwakdung. Petün cumdung nah pe tiedung rangkanggeule teilu. 20 Paiki nah kigu ziemne paiki gwakdung pelane hetageu le teilu.

21 Aide recapaiki netdung da, samkakkelu hezaidung recapaiki, Moses ne saulia kebeude mzui eh keulu dilu. Cide cingkupei Aaron napei Ithamar ne saulia kegai gade Levime ne teilu. 22 Bezalel Uri napei Hur napei, Judah leuhme ge, RAMPAUBE Moses dage aja kai kebeu ma pelane teilu. 23 Ahisamak napei Oholiab, Dan leuhme ge, Bezalel de ngngwa matei keraube tei eh, matei kecime tei eh, nah ma dak kecume tei eh kemhei, gieremang, nah mamai gierei, nah langcimpai keyi le.

24 Kecak mata ziemne teu kedi pelane, kemci bam ketei ta leune ga, kecak kezit reca gade, cai talent ngkaiehekui nah 730 shekel,* kemci shekel rehi gade mdetkelu. 25 Rangkanggeu minadung ne ha kecu ndet kelu talent haige nah 1,775 shekel,* kemci shekel rehi gade, 26 mede mi hangge beka ket*, cide shekel pempie ge, kemci shekel gade mdet kelu. Aipau riak de minapum kepei ga mina pelane de peikelume rehi gade hangcanglu, mmi ngkai nah penreu lebie medung de, mina 603,550 pelane ge. 27 Rangkanggeu talent haige* kemci ni singkam nah kehezupai singkam ziemne kailu, singkam haige, talent ket* singkam ket ket ziemne. 28 Rangkanggeu kebangbe 1,775 shekel* le, Bezalel hetsiadung ziemne pe gwakdung teilu, nah hetsiadung tün gumdi, nah cidung ziemne petie teilu. 29 Hetageu reca kepeu gade mdetlu talent riakhena nah 2,400 shekel.* 30 Aipaude keulwe kengkwaki paiki kimui ziemne pa singkam teilu, hetageu recabam, hetageu geurak, recabam ziemne netdung pelane, 31 kigu ziemne singkamdung, kigu kenlüt kimui ziemne singkamdung, recapaiki gwakdung pelane, nah kigu ziemne paiki gwakdung pelane.