1 Cidau RAMPAUBE Moses dage rangdi, "Ada hanglu lamlwa aide ga, nang, Aaron, Nadab, Abihu, nah Israel hangkiame riakhena, nah kemdei gade acu reca lulo. 2 Moses rünne a taiga nghang nna lubui. Kedamedung au gwang nna gailak, mede minadung pecu nzang eh nghang lak." 3 Moses mie delwe RAMPAUBE samdung nah hezaidung leune minadung dage ranglia beu. Mina pelane kwa ge tei eh keligai nah ranggai, "RAMPAUBE rangkegai sam leune anui teizie." 4 Pecai Moses RAMPAUBE samdung leune raulu. Tingcang nuge, Moses recabam ge lamlwa pi gage teilu nah tangtsu tsia kereiekena sumlu, ciu eh tangtsudung de Israel leuhme kereiekena ziemne ket ket lu kerane. 5 Pa Israelme rehangme kangge de langgai keru ratak tei kerane nah RAMPAUBE dage ketumseu teu eh hemaabe reca nah ratakdung tei kera. 6 Moses hejai pempie ge pwalu nah makwak gage kaidi; pempie kedage be pwa recabam gage kezin gaidi. 7 Pa Samkakkelu laisiukwak de pwalu nah sahbak eh minadung dage peilia gai. Penui rang, "RAMPAUBE ne rangkegai leune anui teizie. Anui samzai teizie." 8 Pecai Moses hejai pwalu eh minadung reu gage kezinlwa gai. Pa ranggai, "Samkakkelu hejai da aide RAMPAUBE nnuide ngngwa teikelu sam aidung leune teu eh nnuide sampet aide peu eh."

9 Pecai Moses, Aaron, Nadab, Abihu, nah Israelme hangkiame riakhena lamlwatu ga nghang lu. 10 Penui Israel Tinggwang de ngau. Pe pi kang ga Sapphire tangtsu le teikelu tetkengwa ni ge bam tingkam swade mci kecuge. 11 Tinggwang pe ba hwapwa Israelme muiteume reu gage kaima. Penui Tinggwang de ngau, nah penui tyei nah saklu.

12 RAMPAUBE Moses dage rangdi, "Lamlwatu ga a da nghanglu nah cika bamlu. Ih tangtsukwak de nah hezai nah ajadung Ih raupwa kebamde ncu peuzie, iciude nang penuide ledeulu kerane." 13 Cine Moses pe kenghabe Joshua de ngngwalu eh tetgai nah Tinggwang gu lamlwatu ga nghang lu. 14 Moses hangkiame dage ranggai, "Aika bamlu nah anuide kwalu anui nnuida cailigwang kemaktane. Aaron nah Hur nnuide ngngwa bam. Magade midungge kehebwak teicai, pecu peu penaida mielu." 15 Cine Moses lamlwatu ga nghang di, nah hemwa ne cide kezui di. 16 RAMPAUBE kendu de Sinai Lamlwa ga bamdi, nah hemwa ne lang herokne cide gumpwa bamdi. Lang henane benai pa hemwa lung gade Moses de qugai. 17 RAMPAUBE kendu rehi de au miheu ge nzwadi lamlwatu twang ga Israelme miak gade. 18 Moses hemwa lung ga nlütlu nah lamlwatu ga nghang di. Pa lamlwatu ga nghang eh tingbazie riakdai nah tingmuiziu riakdai ge bam.