1 Acacia tsing le pwa nang recabam teilu maisia, pe tie cubit mengei nah pe di cubit mengei. Recabam nsamram zie nah cubit kecum hu ge kerabe. 2 Nang pe kimiak mdaidung de hetumseu ki rehi nzwa tei twampet lu maisia. Pe kidung de recabam de ngngwa kangge tei dizie, nah nang cidungde hetageu le kezuilu maisia. 3 Recabam ziemne nang pe netdung teilu maisia: mimütdung ziemne pe bungdung, nah hepei, hekwakdung, teihzamrak, nah milidung. Nang hetageu le aipau lidung leune teilu maisia. 4 Recabam ziemne hetageu le tei kelu rak ge nang teilu maisia. Pe rak tu mdai de kimiak ziemne hetageu ringgoi teilu. 5 Nang cipau rak de recabam mung kang gage kailu maisia, pe sing ga nghung cang kemak sum gage kailu. 6 Nang recabam ziemne pe tiedung teilu maisia, acacia tsing le tei kelube tiedung, nah nang hetageu le cide kezuilu maisia. 7 Pe tiedung de ringgoidung gage kailu maisia, nah recabam pwalu kerane pe tiedung de pe tu kenana gade bam maisia. 8 Nang recabam de pe lungki mrwa eh tsingkwak dung le teilu maisia. Ncu lamlwatu gade keulia kegai nzwa nang ci kesiakte eh teilu maisia.

9 Recapaiki ziemne nang kigu ge teilu maisia. Kigu tingbangle tu ga kehezupaidung bam maisia, langcimpai keyi dak kelu kehezupai pe tie cubit haige. 10 Kehezupaidung de pe tsia ngkai ge bam maisia, hetageu pe singkam ngkai ge si eh. Pe tsiadung ga pe gwakdung, nah rangkanggeu tiedung de de si eh bam maisia. 11 Cinzwa tingtünle tu lebie de, kehezupai pe tie cubit haige kecu ge bam maisia pe tsia ngkai de de si eh, hetageu pe singkam ngkai, pe tsiadung ga pe gwakdung bam eh, nah rangkanggeu tiedung de si eh. 12 Kigu taiga naimiak kenlütle tu kehezupai pe tie cubit riakngei ge bam maisia. Cika pe tsiadung kerei ge nah pe singkamdung kerei ge bam maisia. 13 Kigu de de naimiak kepetle tu de pe tie cubit riakngei maisia. 14 Kimuiki tu ge lam ziemne kehezupai pe tie cubit kereimengei maisia. Cika hecia kecum pe singkam kecum de si eh bam maisia. 15 Kimuiki kedale tu gade de de kehezupai pe tie cubit kereimengei bam maisia. Cika hecia kecum nah pe singkam kecum de si bam maisia. 16 Kigu rieki ga kehezupai pe tie cubit ngkai maisia. Kehezupai cide kemhei, gieremang nah gie kecudung nah langcimpai keyi dak kelu gele teilu, aide dak kecime ta. Cide pe tsia mdai nah pe singkam mdai de si eh bam kerabe. 17 Kigu tsiadung peciakne rangkanggeu tiedung, rangkanggeu gwakdung nah hetageu singkamdung bam maisia. 18 Kigu de pe tie cubit haige maisia, pe di cubit riakngei, nah pe hu cubit mengei, cika kehezupai langcimpai keyi dak kelu gele teilu, nah pe singkamdung hetageu gele teilu. 19 Recapaiki ga pe netdung peciakne teu kera, nah recapaiki nah kigu ziemne magwakdung peciakne hetageu gele teilu maisia.

20 Nang Israel minadung de olive ca, yitube nah tui kelube, mitaubung ziemne pwa gwang lulo aja kaibeu iciu eh cide mtau bam muilu kerane. 21 Kengkwa paiki ga, kehezupai gwale bie recapaiki dwa ga kebam de ga samkakkelu bung kebam, Aaron nah pe napeimedung RAMPAUBE dwa tinghegi gade tingcang kecang mitaubung ru zie. Aide tei kecu Israelme ceheu ziemne kelungta hezai ge zie.