1 Moses pe sam keli, "Dede magade penui acu nlumlu tadi mede a sam kingnei ma, mede ainzwa rang cai, ‘RAMPAUBE n dage pecu lia gai ma’?" 2 RAMPAUBE pe dage rangdi, "N ba ga dai bamno?" Moses rangdi, "Meurün kekwa hetui ge." 3 RAMPAUBE rangdi, "Cide hangdeu gage kelien gailo." Moses cide hangdeu gage kelien gai, ge cide henei mmi di. Moses cide dade pak caisimdi. 4 RAMPAUBE Moses dage rangdi, "Pet eh cide pemi heraklwe keu lulo." Cine pa pet eh henei cide heraklu. Pe ba ga hetui ge mmi dai di. 5 "Aide ainzwa kecu au penui RAMPAUBE, penui paume Tinggwang, Abraham Tinggwang, Isaac Tinggwang, nah Jacob Tinggwang n dage pecu liagai delie kecu peu nlumlu kerane delie." 6 RAMPAUBE pe dage rang si eh, "Cu au n ba n cwatie lung gage kai gailo." Cine Moses pe ba pe cwatie lung gage kaigai. Pa pe ba keu mpet dai gaige, ainie, pe ba mpa di, cide buising nzwa hadi. 7 RAMPAUBE rangdi, "N ba n cwatie lung gage kai dai gailo." Cine Moses pe ba pe cwatie lung gage kai gai, nah pa keumpet daigai ge, cide pe pumteih kedadung nzwa yi ngkei dai kelu pa ngau. 8 RAMPAUBE rangdi, "Magade penui ncu nlum tadi cai, magade penui a kengking marehi keraide gage penui lung kailu tadi cai mede cide nlum tadi cai, ciucai penui marehi pe kenabe de au nlum luzie. 9 Penui a kengking marehi aipau kenana de nlum tadi cai, mede nsam kingnei tadi cai, ciucai kereuki gade dui twaklwe hangdeu kecang gage cide ruigailo. Nang dui twak kelu cide hangdeu kecangh ga hejai mmi dizie."✝

10 Pecai Moses RAMPAUBE dage rangdi, "Rampaubo, Ih madaude marang ci lama, nah ndaa liede mede nang n kilabe de mpau cu kedi ting gade liede. Ih au a marang de mneu nah letlau lu." 11 RAMPAUBE pe dage rangdi, "Mina mui tei kebeu cide caune no? Mige pelet gah mede pekwen pang mede ngaulu kebam mede miakciet kela caune tei no? Cide Ih RAMPAUBE ne melui ni? 12 Cine cu miecu, nah Ih ncu ngngwa lazie nang ma kerangdau nah dai rang maisia bi ncu ledeu beuzie." 13 Dede Moses rangdi, "Rampaubo, ngaunggia eh mi kedame gede langgai lo, mi kedame nang langgai keneume gede." 14 Ge RAMPAUBE Moses de pe rata di. Pa rangdi, "Levime pei Aaron, n sinabe de cai dai nzwa lai? Pa marang ci cu Ih ci bam. Cirünnemene, pa ncu redau kera gwangla dida, nah pa ncu ngau keludau, pa pesui yisüt luzie. 15 Nang pecu resiu luzie nah pa rang kerabe samdung pemui gage kaibeu luzie. Ih nnai de marang kera ngha beuzie nah pecu marang kera, nah daitei zie bi Ih nnai hangnana de sau liazie. 16 Pa n ziemne minadung dage marang beuzie. Pecu peu paukeswabe tei zie, nah pe ziemne au nang, Ih Tinggwang nzwa dizie. 17 Nang hetui aide n ba gage keu lazie. Cide le nang marehidung tei zie."

18 Cine Moses pe pau Jethro da cailigwang eh pe dage rangdi, "Peu acu tet lulo iciu eh Ih Egypt ga kebam a kibaume da cailigwang lu kerane nah penui ringbam reumi mebi pie kerane." Jethro Moses dage rangdi, "Nma yi eh tet lulo." 19 RAMPAUBE Midian gade Moses dage rangdi, "Tet culo, Egypt ga cailigwang cu, kedanemene ncu teitset neu kelamedung tsai kap dida."✝ 20 Moses penau nah pe napeime de ngngwa lu nah penaide gada reu gage kailu. Pa Egyptme deu ga cailigwangdi, nah pa Tinggwang gu hetui pe ba ga keulu. 21 RAMPAUBE Moses dage rangdi, "Nang Egypt ga cailigwang keludau, Ih miswakegah tadung leune teilu kebui kengking ncu kepeu de teu Pharaoh dwa gage teigai bilu. Dede Ih pe mlung teitak dizie, nah pa minadung de peu tetlak.✝ 22 Nang Pharaoh dage rang maisia, ‘RAMPAUBE ainzwa eh rangla: Israel au a napei, a neraibe, 23 nah Ih n dage rangla, "Peu a napei de tetlu, iciu eh pa acu reca lu kerane." Dede nang pecu peu tet rau kedine, Ih n napei, n neraibe de teitset bi dizie.’" 24 Cidau lampuiki ga penui tingmuizie ziemne mtak keludau, RAMPAUBE Moses de redau nah pecu teitset kera teidi. 25 Ge Zipporah tangtsu pemui keyi ge keulwe pe napei geu rumdi, nah cide pe pideu gage tunggai. Iciu eh pa rangdi, "Kesangda, nang au hejai gade acu lepwa nauhepei geda." 26 Cine RAMPAUBE pecu püt beudi. Pa rangdi, hegeukerum gade ziemne "Nang au hejai gade nauhepei geda." 27 RAMPAUBE Aaron dage rangdi, "Moses de redau kerane hetaideu ga tetpet culo." Aaron mie, Tinggwang lamlwatu gade pecu redau lu, nah pecu hemam gai. 28 Moses Aaron dage rangbeu RAMPAUBE samdung pelane pa ne pecu langpwa ranglo kebeu de nah RAMPAUBE kengking marehidung ha pelane pa pecu teilo aja kai kebeude. 29 Iciu eh Moses penai Aaron mie eh Israel hangkiamedung de teuhekwa ncüt ciaklu. 30 RAMPAUBE Moses dage rangkebeu samdung pelane Aaron pau beu. Pa RAMPAUBE kengking marehidung de tei liagai mina miakngau dwa gade. 31 Minadung nlumlu. Penui RAMPAUBE Israelme de mcet lu delie nah pa penui reidung ngaulu delie siu keludau, cidau penui penui peu keumie eh pecu reca di.✝