1 Minadung Elim gade tetcuh gai, Israel leuhme pelane Egyptme deu püt kedicai, kei pe kena bekei ziangreiemengei benai Sin hetaideu ga gwanglu, cide Elim penai Sinai kakga bam. 2 Israelme pelane Moses penai Aaron de cipau hetaideu gade ncamdi. 3 Israelme penai dage rangdi, "Anui Egyptme deuga anui hetei li taiga bam eh nah tangku tyei keneu kieege tyeilu kebamdau RAMPAUBE ba rünne gade tsai dilu liecai. Iciu eh nnai ne anuide hetaideu aika ngngwa gwang luda anui leuhme pelane depeu nzeu eh tsaidi kerane."

4 Pecai RAMPAUBE Moses dage rangdi, "Ih tangku nnui ziemne tinggim gade ruigai beuzie. Minadung mpet delwe pe tingnai gu langnai ramsangne hekwa luzie iciu eh penui a zai ga tet mi tetlak bi Ih penuide kedak pielu kerane. 5 Lang herok benai, ndaa langnai ramsang hekwa kela kena kieege penui hekwa luzie, nah penui keugwang kelude lang luzie." 6 Pecai Moses penai Aaron Israelme minadung pelane dage rangdi, "Tinghegi kedidau nnui ci luzie Egyptme deu gade nnuide ngngwampet kebeube RAMPAUBE lie kecu. 7 Tingcang nnui RAMPAUBE kendu ngau luzie, kedanemene nnui pecu ncam kecu pa siula kecune. Anai nnui ziemne caulie lano nnui anaide ncam kera?" 8 Moses liede ranggai, "Nnui aide ci luzie RAMPAUBE tinghegi nnuide hetei nah tingcang tangku tyei keneu kieege ha kecudau, kedanemene nnui ncam eh pecu rangkemsia de pa siu luda. Aaron nah Ih caulie lano? Nnui ncam kecude au anai de ncam ma; dede cidungde au RAMPAUBE de ncam bam." 9 Moses Aaron dage rangdi, "Israel tingbungme pelane dage ranglo, ‘RAMPAUBE dwaga gwang nna lulo eh, kedanemene pa nnui ncamdung siu luda.’" 10 Cidau Aaron Israel tingbungme pelane dage rang kebamdau, penui hetaideu le piegai, nah, ainie, RAMPAUBE kendu hemwa gade ngau petdi. 11 Ge RAMPAUBE Moses de resiu eh ranggai, 12 "Ih Israel minadung ncam kegai siu luda. Penuide mpau eh rangbeulo, ‘Tinghegi penui hetei tyei kera ngau luzie nah tingcang tangku tyeilu kebui kieege ngau luzie. Cidau nnui Ih RAMPAUBE nnui Tinggwang lie kecu ci luzie.’"

13 Cidau tinghegi rekuidung kekieege gwang ramzeuki gum pungdi. Tingcang hezim le ramzeuki twagwa puidi. 14 Hezim gah dige, cika hetaideu reuga ma repei lip eh buising kum kerepeibe nzwa hangdeu ga bamdi. 15 Israelmedung cide ngau luge, penui hangge ge dade keteu eh, "Cide daipai no?" Penui cide daipai bi cilu tadi. Moses penui dage rangdi, "Cide au tangku RAMPAUBE ne nnuide tyei kera peu kecude delie. 16 Aja aide RAMPAUBE ne kaigai: ‘Nnui hekwa maisia, nnui hangge ge kecu, nnui tyei maikesia kieege, n minadung rehi gade hangge ziemne omer* ge ge. Aide nzwa nnui hekwa luzie: Nnui ramzeuki ga lungh kebamme hangge ge ziemne tyeilu kebui kieege hekwalu.’" 17 Israelme penuide rangkebeu nzwa teilu. Mina kangge hekwa kieelu, kangge hekwa camlu. 18 Penui cide omer le ndet kegaidau, hekwa kiee kelume de mage de bang luma, hekwa cam kelume de camde dima. Hangge ge kecu penui teumai kesia kieege hekwalu. 19 Pecai Moses penui dage rangdi, "Migede magede ncünne tingcang kecang kaizeu lak." 20 Iciu liede, penui Moses kwa kingnei ma. Midungge kesa ncünne tingcang ziemne kainzeu, dede cide pe kau lungh di and nnam di. Ge Moses penuide pe rata sütdi. 21 Penui tingcang ramsang cide hekwalu. Hangge ge kecu cipau tingba de ziemne tyei mai kesia kieege hekwalu. Tingnaimiak ngking cuh ge, cide suimie di. 22 Cipaucai lang herokne benai penui tangku piana kieege hekwalu, hangge ziemne omer kena na. Heleuh muiteume pelane gwang eh aide Moses dage paubeu. 23 Pa penui dage rangdi, "RAMPAUBE kerang aide da: ‘Ncünne au mtak zing dezie, RAMPAUBE de herüt kepeu kemci Sabbath. Nnui ru keneube rulu, nah nnui swa keneube swalu. Bangkelu pelane nnui tingcang ziemne kainzeu lu.’" 24 Cine Moses rang kebeunzwa, penui tingcang kemaktane cide kainzeulu. Cide nnam dima, mede pe kau de lungh dima. 25 Moses rangdi, "Cipau taktyei de henai tyeilu, henai au RAMPAUBE de herüt peu kera kaipwa kebam Sabbath ge. Henai nnui cide luhdung ga ngau gailak. 26 Nnui cide lang herokne ting ga hekwa luzie, dede lang henane benai au Sabbath. Sabbath benai au manna bam lak. 27 Lang henane benai midungge mie manna hekwa, dede penui magede ngau luma. 28 Pecai RAMPAUBE Moses dage rangdi, "Nnui daitie ge ajadung nah a hezaidung teirau eh bam zieno? 29 Pielo, RAMPAUBE ne Sabbath nnuide peu. Cine lang herokne benai pa au nnuide tangku langna ne ziemne pwapeu. Keheibede pa kebam ni ga bam maisia; lang henane benai migede pe bam ni gade tetpet lak." 30 Cine minadung lang henane benai mtaklu.

31 Israelme taktyei cide de, "manna" de qulu. Cide au matsi ra kehabe nzwa nah cide tangku heliadui le tei kelube nzwa. 32 Moses rangdi, "RAMPAUBE ne aja kai kebeude aide da: ‘Peu manna omer ge au nnui cai ceheu pelane ziemne kainzeulu iciude lungh keleume nnuide Egyptme deu gade Ih nnuide ngngwampet kelucai, hetaideu gade Ih peu nnuide tangku ketyei de peu ngau kerane.’" 33 Moses Aaron dage rangdi, "Li ge keulu nah cika ge manna omer ge kailu. Cide RAMPAUBE dwa gage mina ceheu pelane ziemne kainzeulu kerane." 34 RAMPAUBE Moses de rang kebeunzwa, Aaron cide samkakbung taiga ge kaipwa bamdi. 35 Israelme penui lungh kebam deuga gwang canglu kemaktane mmi riakdai ge manna tyei. Penui Canaanme deurai dungga gwang canglu kemaktane manna tyei. 36 Cu omer ge au ephah kerei zige kieege.*