1 Tinggwang sam aidung pelane ranggai: 2 "Ih RAMPAUBE nnui Tinggwang, Egyptme deudi gade, kilabaang tei kebam gade nnuide ngngwampet kebeube. 3 Acu gwale nnui hera keda gede reca lak.

4 Nnui katei ziemne mamie gede rekiso mede nreule Tinggim ga kebam rehi dungde nzwa, mede kideu kangga kebam, mede dui kangga kebam. 5 Nnui cidungde da keumie so mede reca so, kedanemene Ih, RAMPAUBE nnui Tinggwang, a riak tei kela Tinggwang. Ih mi paume kesia de ziemne saja peula, heleuhbe dage keherei teu gwangbeu eh, ceheu pe kecumbe nah pe mdaibe acu ngau ngkau kelame dage. 6 Dede kesamsang samkak de Ih liagai acu ku nah a sam kai kebeudung mzai kelame pe cang dage.

7 Nnui RAMPAUBE nnui Tinggwang zi kemta gade teu so, kedanemene a zi kemta gade teu kelame de Ih saja peuzie lu.

8 Sabbath tingba de nsunglu, a ziemne teimci lu kerane. 9 Nnui mata tei maisia nah lang herokne ziemne nnui ta leune teilu. 10 Dede lang henane tingba de au RAMPAUBE nnui Tinggwang gu Sabbath lie. Cipaunai nnui mata gede teilak, nang de, mede n napeime de, mede n napuime de, mede n kila peime, mede n kila puime, mede n kauruine, mede sangme nnui kirie lungga kebamme de. 11 Kedanemene lang herokne ting gage RAMPAUBE ting nah kideu, jaaidi, nah cika kebam maleune teilu, nah lang henane benai mtaklu. Ciziemne RAMPAUBE Sabbath tingba de samlam beu nah cide teuntsam lu.

12 N pei nah N pui de rütlu, iciude nnui peting ketie ge RAMPAUBE n Tinggwang ne ncu kepeu deu dega lungh luzie.

13 Nnui migede de daptset so.

14 Nnui kemmha ta teiso.

15 Nnui mige dade de rega so.

16 Nnui kida cainame* de kemmau kemret zierang teiso.

17 Nnui nnui kidabe ki hengin so; nnui nnui kidabe naude hengin so, pe kila peime, pe kila puime, pe tumseu, pe gada, mede nnui kidabe gu ma keheibede."

18 Mina pelane de tingkeceu nah tingkehepiak de ngau, nah telui kwa de siu, nah lamlwatu ga mika de ngau. Minadung cide ngau luge, penui mbeudi nah kemdei ga sapdi. 19 Penui Moses dage ranggai, "Anui dage rang gailo, nah anui kingnei luzie; dede Tinggwang depeu anui dage rang diso, iciumecai anui tsai dizie." 20 Moses minadung dage ranggai, "Ngngi diso, kedanemene Tinggwang nnuide kedakpie kerane gwang iciude pecu kerüt peu nnuida bamlu kerane, nah iciu eh nnui kemau teidi melu kerane." 21 Cine minadung kemdei ga saplu, nah Moses muiting kecu Tinggwang kebam ga lüt.

22 RAMPAUBE Moses dage rangdi, "Ainzwa eh nang Israelme dage rang beulu: ‘Ih tinggim gade nnuide ngngwa mpau kecu nnui de ngauda. 23 Nnui a taiga ge nnui ziemne hera kedadung teigai lak, rangkanggeu mede kecak le teikelu rabedung. 24 Nnui a ziemne tangdei le recabam ge teilu, nah cide gage nnuigu keru ratak tei gailu, hemaa gu mapeu, meurün, nah ketumseu. Acu herüt peulu kebui bam leune ga, Ih nnuida gwang zie nah nnuide samlam beuzie.* 25 Nnui tangtsu le a ziemne recabam teicai, nnui tangtsu pang kelule tei kerabe ma, kedanemene magade nnuigu keteiniadung teu eh cide teicai, nnui cide teihera dizie. 26 Nnui a recabam ga takswa gade nghang kerabe ma, iciude nang paula lia di melu kerane.’"