1 Pecai RAMPAUBE Moses dage rangdi, "Cude Ih Pharaoh nah Egyptme dage keherei kaigai kera ge bamsi reu. Cipau cai, pa nnuide aika de tet kera peu zie. Pa nnuide tet sang tet kera peu kecudau, pa nnuide gwagi ciak dizie. 2 Minadung dage keranglia beulu, iciu eh peu mipei hangge ge kecu nah mipui hangge ge kecu liede penui kidabe dade rangkangdung nah kecakdung kielu kerane." 3 Cidau Israelme suiyi tei neu kera Egyptme lung RAMPAUBE teibeu. Cimeliene, mipeibe Moses Pharaoh kilamedung nah Egyptmedung miakngau gade penui suiyi sütlu.

4 Moses hegwangpei da mie nah rangdi, "RAMPAUBE ainzwa rangla: ‘Muisum tingdau ge Ih Egypt pelane ga tetkah gwangzie. 5 Egypt deu ga neraibe pelane tsaidi zie, pe hegwangbam ga ntum kebam Pharaoh neraibe gade gwang hepa caiga bam eh ciutau kebam kilabaang tei kelabe pui neraibe, nah hetumna mciu raitu bedung pelane kecang. 6 Pecai Egypt deu pelane ga hap süt kedi ge bamzie, madaude cinzwa kemak mede madaude ciciu dai kelak teizie. 7 Dede heteu kecang de Israelme keheibede de tang lak, mina nah makaune de liede. Ainzwa eh Israelme nah Egyptme de Ih pie ntsam bamlie kecu nnui ci luzie.’ 8 Pharaoh, n kilame aidung pelane a da henah mie nah a dwa keumie zie. Penui rang zie, ‘Tet culo, nang nah n caisui kelame pelane!’ Cipau cai Ih tet mpetti zie." Pecai pa pe rata süt eh Pharaoh dade tet mpetti.

9 RAMPAUBE Moses dage rangdi, "Pharaoh n kwa kingnei lak. Aide ainzwa kecu au, Ih Egyptme deu gage miswakegah bata kekieege tei gaizie." 10 Moses penai Aaron Pharaoh dwade miswakegah bata aidung pelane teigai. Dede RAMPAUBE Pharaoh mlung teitakdi, nah Pharaoh Israelme de pe deu gade peu tet ma.