Mateus 18

Mofwano gwa motomami yunaa akhakholekolela mabe

21 Apenee Petulo akamopetela Yesu no khomowolya, "Mwene, mbe modogwaane anojelagaa mabe, nkhopogiwaa nemolekolele mala jiinga? Mbi, mala saba?"

22 Yesu akamoweela, "Khotopo, nkhankhopaala omolekolele mala saba topo," "ila okhopogiwaa omolekolele modogwakhoo ninga saba mala makomi saba. 23 Nkhovaweela gechoo, kho nguno owami wa pachanya khwa Matuunda, okhwipyaana no mwami yomwii yunaa aleapogaa khomanya mpia jakwe jensi venaa angile jepetile. 24 Panaa aleandya khokongan’yaa, alealetelwaa motomami yomwii yunaa angile atite ideni ikolo la mamilioni minki ga mpia khwa mwami. 25 Motomami oyoo aleakonyaa kholepa ideni lenaa angile atite. Apenee mwami akalagelelya vamogolye muntu oyoo kete mwasi, ili alepele ideni lakwe. 26 Ila motomami oyoo, akamotungamela mwami oyoo no khomoloomba khwa khopaala, ‘Nkholoomba ondindelelye, nane ndalepa ideni laane lensi!’ 27 Mwami akamowonela losongo, apenee amolekolelaa motomami wakwe eloo ideni lakwe lensi no khomolekolela apete. 28 Ila motomami oyoo panaa angile akhopuma panji, vitaanga no motomami moyaakwe, yunaa angile amwalumyajaa mpia ntiiti dinali igana. Apaponye motomami oyoo wa mwandyo, amogwelaa no khomoniga nkingo oyoo motomami yoonge, no khwandyaa khomoweela, ‘Ondepe kenaa nkhokhodai.’ 29 Oyoo motomami moyaakwe amotungamelaa no khomoloomba khwa khopaala, ‘Nkholoomba ondindelelye, nane ndalepa ideni lensi.’ 30 Ila motomami wa mwandyo asitaa, amokenkhaa moyaakwe khomotuunga mokhandulunge mpakha panaa alalepa ideni eloo lensi. 31 Vatomami vayaakwe panaa valevawona egoo, meoyo jawe jalejavasaata modugo. Vakapeta khwa mwami wawe no khomoweela gensi ganaa gapumelaga. 32 Apenee mwami amwetaa motomami oyoo no khomoweela, ‘Ogwee motomami mobe modugo. Onene alenakholekolela ideni lakhoo lensi panaa alewandoomba. 33 Mbi, nagwe okhapogiwa khomowonela losongo motomami mwiyo, kete venaa onene alenakhowonela losongo?’ 34 Mwami akakilwa modugo, akavaeta masinjala vakwe no khovaweela vamogwele no khomokenkha mokhandulunge apelwee magayo minki omoo mpakha panaa alalepa ideni lakwe lensi."

35 Apenee Yesu amalelya khwa khopaala, "Geeke avyenee Daada yaane wa pachanya alavanogelya nanyu avivyoo mbe kela yomwii wenyu alalekha khomolekolela modogwakwe khwa mooyo gwakwe gwensi."