Lukasi 2

Mwana Yesu Mulighuta lya Sapanga

41 Kila lichuva Yusufu na Malia wayendili ku Yelusalemu kumhambu wa Pasaka. 42 Yesu paawelili na ukulunga wa machuva ikumi na ivili, wogha wayendili kulichuwa lya Pasaka handa waigholili kila machuva. 43 Badili gha mhambu kuyomwika, watumbulili mwanja kuhuya ukaya kwa weni, ila mwana Yesu ahighalili ku Yelusalemu akiwela weka ghaki bila walela ghaki kumanya. 44 Wawachilili awelili pamonga na waghanja ghaki mula mmwanja wa pamonga, wakatumbula kumhakula kwa walongo ghao na wandu wawelili wakiwamanya. 45 Kwaikiva wamwonili ng’ogha, wakahuya Yelusalemu kumhakula. 46 Lichuwa lya itatu wamlolili Kulighuta lya Sapanga paghati gha wavula wa laghilo lya Musa, akiwahyoghanila na kuwakonya milando. 47 Wogha wamuhyoghanilili walikangasili kulola luhala lwaki na kujumila kwa mweni kwa mawachilo gha luhala ghaki. 48 Walela ghaki pawamlolili wakakangaswa. Malia, nyongo ghaki, akamkonya, "Mwana wa nenga, kwa kyani kutugholela hagha? Tati ghako na nenga tuwelili tukikuhaka kwa utungu." 49 Yesu akawayanga, "Kwa kyani munihakulili mmanyili ng’ogha yiwa ningupalwa kulikala Kulighuta lya Tati wa nenga?" 50 Ila walela ghaki wamanyili ng’ogha lilando lila awalongelili. 51 Hinu akahuya pamonga na weni mbaka Nazaleti, akiwela anguwayitikila. Nyongo ghaki ayendilelile kukumbwike milando kumoyu ghaki. 52 Yesu akayendelela kukula kwa mawachilo gha luhala na kukimu, akayendelela kupalwa na Sapanga na wandu.