Mateus 18

Mlandano wa mtumikila mweni kupala ng’ogha kulekesela

21 Kuulongolu Petelo akamyendela Yesu, akamkonya, "Bambu, ikiwela mlongu ghangu kanigholela uhakata, ni mihanja mininga ningupalwa kumlekesela? Ghuli hata mihanja isaba?"

22 Yesu akamuyanga, "Nilonga ng’ogha mihanja isaba hela, ila isaba mihanja isabini." 23 Ninguwalongela nagha, kwaikiva Unkosi wa Sapanga ungulandana na nkosi mmonga mweni kulamula kulolesa maha habali gha mavalangu kuhuma kwa watumikila ghaki. 24 Pakatumbula kupokela habali gha hindu ghaki, ikawoneka mundu mmonga mweni kuwela angupalwa haipi vihaku ielufu ikumi vya sahabu akayegha kwa mweni. 25 Mundu hayu kahela kya kuhipa, nkosi ghaki akalamula awuswi kuwela muhusutu, mweni na muhumbu ghaki pamonga na wana ghaki na vyogha vila kawela navyu viwuswi, lukani apati kuhipwa. 26 Hinu, hayu mtumikila akatundamila manung’una kulongolo ghaki, akalonga, "Unifumilili, nitekuhipa vihaku ghako hyogha." 27 Yula nkosi akamwonela luhungu, akamlekesela lila lideni, akamleka ayendi zyaki.

28 "Ila hayu mtumikila paawelili anguhuma panji, akakongine na mtumikila myaki mweni kuwela na lideni lyaki lya magwala imia imonga vya madini gha feza. Akamkamula, akamvika lingaka akimlongela, uhipi lideni lyangu!" 29 Yula mtumikila myaki akamtundamilila manung’una, akamluwa, "Unifumilili nitekuhipa." 30 Ila mweni akakanila, akamyegha kukihungu mbaka pala atehipa lideni lila. 31 Hinu, watumikila wayaki pawalolile mghalu hula wakamng’ung’ulikila nesu, wakayenda kumlongela mghalu hula nkosi ghao. 32 Yula nkosi akamkema yula mtumikila akamlongela, "Wenga ni mtumikila mhakata nesu! Uniluwili nikulekeseli, na nenga nikakulekesela lideni lyaku lyogha." 33 "Ghuli, wenga upalilwi ng’ogha kumuwonela luhungu mtumikila myaku handa nenga vila nikuwonilili luhungu wenga?" 34 "Hinu, kwa lilaka, yula nkosi ghaki akamkamula yula mtumikila na kumyegha kwa watovangondu wa lighuta lya wawopwa wamghasi mbaka pala atehipa lideni lyaki lyogha."

35 Yesu akayongesela kulonga, "Hilahila na Tati ghangu wa kundumba atewagholela kila mmonga wa mwenga, paikawela kamlekesela ng’ogha myaki kuhuma mmoyu yula mweni kumgholela uhakata."