Matayu 20

Waghola lihenga kulitawa lya misabibu

1 "Unkosi wa kundumba ungulandana na mundu mweni litawa lya misabibu, mweni ahukili malawila pee apalile kuhakula watukutula wa kughola lihengu kulitawa lyaki." 2 Alaghanile na weni kuwahipa ligwala lya lidini lya feza limonga kwa lichuwa, hinu akawayegha kulitawa lya misabibu. 3 Akahuka lipindi lya isaa itatu malawila, akalola wandu waghangi wagholoka kusoku, wenikuwela ng’ogha na lihengu. 4 Akawalongela, "Myendi na mwenga mkagholi lihengu kulitawa lya misabibu, na nenga nitewapegha kila mngupalwa kuhipwa kwa kila mtekighola." 5 Hinu, wakayenda. Hayu mweni litawa akahuka kangi lipindi lya isaa isita na isaa itisa, akaghola hilahila. 6 Hata lipindi lya isaa ikumi na imonga lumihi, akahuka kangi, akalola wandu waghangi wagholoka pala kusoku. Hinu akawakonya, "Kwakyani mngugholoka haku mkiwela ng’ogha na lihengu?" 7 Wakamuyanga, "Kwaikiva kwahela mundu atupeghili lihengu." "Hinu myendi kulitawa lya nenga lya misabibu mkagholi lihengu."

8 "Pakuchia, yula mweni litawa akamlongela yula mvika mapesa ghaki, uwakemi waghola lihengu kuwapegha mahipo ghao, ukitumbula na wala wakemilwi kumwihu na kuyomola na wala wa mtumbulo." 9 Hinu, wakahika wala watumbulili lihengu lipindi lya isaa ikumi na imonga, wakapokela kila mmonga ligwala limonga lya lidini lya feza. 10 Wala wa mtumbulo pawahikili, wawelili wanguliwachila yiwa watehipwa kupiti wala waghangi, ila hata weni wakapokela kila mmonga ligwala limonga. 11 Wakapokela mahipo ghao, wakatumbula kumng’ung’ulikila yula Bambu. 12 Wakalonga, "Wandu hagha wenikutolwa kumwihu weni waghola lihengu kwa lipindi lya isaa imonga hela, ila uwapegha mahipo handa twenga. Kunu twenga tufumilila mahengu matopa lichuwa lyogha lijuwa likalipa!" 13 "Hinu yula mweni litawa akamyanga mmonga gha weni, ghanja, nikululunganya ng’ogha. Ghuli tulaghanile ng’ogha kukupegha mahipo gha machuwa hyogha ligwala limonga lya lidini lya feza kwa lichuwa? 14 Utoli mahipo ghako uyendi zyaku, nenga ningupala kumpegha hayu wa mwihu handa nikupegha wenga. 15 Ghuli, nenga ningupalwa ng’ogha kughola vila ningupala na hindu ghangu mweni? Ghuli wenga ungulola wifu kwaikiva nenga nighola ulungwana?"

16 Yesu akayomola kwa kulonga, "Hinu, wala wenikuwela wa kumwihu watewela wa mtumbulo na wamtumbulo watewela wa kumwihu."