Ayohana 9

Ayesu annamia mundu jwaabhelikwe ngalola

1 Lichobha limo Ayesu pabhatendita kupeta, akammona mundu jwangalola kubhokela chibhelekwa. 2 Bhabhachigana bhabhe bhakaakonya, "Bhannyigana, nga ganiki jwatendite mabohu mpaka hojo mundu kubhelekwa ngalola, bholi jwatendite mabohu nga hojo mundu au akaabhelei bhabhe?" 3 Ayesu akajangula, "Ngabha jonjoni wala akaabhelei bhabhe bhabhatenditinge mabohu. Akabhelekwa henela ili ukolo gwa Annoongo gabhonekane mu umomi gwabhe. 4 Tupalikwa kutendeka mahengo gakwe jonojwe jwandumite kukibha tangu muhi. Lubhendu lutendakuika na jwakwa mundu jwaapakombola kutenda lihengo. 5 Mmi tangu pachilambo, nenga nga nhana gwa bhandu bha pachilambo."

6 Ayesu pabhakajomola kulongela genago, akauna mata pahi, akaalakia mandope kwa mata genigala na kwantyeka jwangalola jonijola mmiho. 7 Ngapena akalobholela, "Nnyaule nkakuhe mu litanda lya Siloamu." Siloamu maana gakwe nga jonijola jwatumitwe. Ngapena jonijola jwangalola akajaula, kuha machi, na akabhuja abhikulola.

8 Akaandami ajabhe na bhandu pabhakaabhona abhi kujopajopa bhakachikonyanga, "Bholi, mundu hojo nga jonijola jwatendita kujopajopa?"

9 Bhangi bhakalobholanga, "Jonjoni nga jonojwe."

Bhangi bhakalobhola, "Ngabha jonojwe atekulandana tu."

Nambo mwene akalobhola, "Nenga nga jonijola jundendita kujopajopa."

10 Bahi, bhakibha bhatendakwakonya, "Bholi, nangocheni miho ginu gakombwilebholi kulola?"

11 Jonojwe akajangula, "Jwajola mundu jwakemwa Ayesu jwakaalakia mandope, akandipaha mmiho jangu akanobholela. Nyaule mu litanda lya Siloamu. Ngakue na popopo ngakombola kulola."

12 Bhakaakonya, "Mundu jonojwe abhi koji?"

Akaajangulanga, "nenga ngamanya."