Marcos 5

Ayesu bhaalamiya amundu bhabhahii na mahoka

1 Ayesu na bhanapunji bhabhe, bhakahikanga kuntundu ja litanda lya ku Galilaya mu chilambo cha Bhagelasi. 2 Ayesu pabhakatuluka kubhoka mu ntumbwi, amundu bhamo bhabhakachukilwa na lihoka bhakabhoka kumakabuli, bhakakongana nabho. 3 Amundu bhenabho bhatendita kutama kumakabuli na wala bhaakwa amundu bhangi bhoabhala bhabhakakombola kwaatabha kwa minyololo. 4 Kwakubhee mala ijingi bhakaatabha kwa ngamulo na minyololo mmabhoko na mmakongono, nambo bhakakombola kuheketa gena minyololo na kuikajula yene ngamulo, na bhakwa amundu bhabhakakombola kwahibhila. 5 Kilo na muhi bhakatama kumakabuli na kumatombi bhabhikupalia lilobhe na kuchiheketaheketa kwa maganga.

6 Pabhakammona Ayesu kwa kutali, bhakaabhutukila na kutindibhala majugwa nnoongi jabhe. 7 Bhakalongela kwa lilobhe likolongwa, "Mmpala niki kubhoka kwaachangu, mwenga Ayesu Amwana bha Annoonngo bhabhabhile kunani muno? Kwa lina lya Annoongo, ndendakunyoopa nkotokunagia!" 8 Bhakalongela henela kwa kubhehe Ayesu bhatekunnobholela, "Lihoka, mmoke kwa habha amundu."

9 Bahi, Ayesu bhaakonya, "Lina linu aganiki?"

Nabhena bhakajangula, "Lina lyangu nga linyemba, maana twenga tubhii bhajingi!" 10 Penapo genigala mahoka gakaajopa Ayesu akoto kugabhenganga kubhoka panja ja chenichee chilambo.

11 Pakibhakibhanga penapo pakibha na lilubhalo likolongwa lya magolobhe bhabhikulyenganga pachielelo cha litombi. 12 Bahi, gena mahoka gakaapembelela Ayesu, "Ntupeleke kwa genigala magolobhe, ntulekelange tukaajingilange." 13 Bahi Ayesu bhakaalekeleanga. Bahi gena mahoka gakabhokanga, gakaajingilanga genigaila magolobhe. Lilubhalo lyoha lya magolobhe likagwee pa chenichela chielelo chikolongwa mpaka mulitanda, na kutibhila mmachi gakawee na bhabhakibhanga handa elupu jibhele.

14 Bhabhalianga genigaa magolobhe bhakabhutukanga, bhakatangachanga ngani jenejo kunnyini na muijiji. Bhandu bhakahikanga kubhona hiikapitila.