Marcos 5

25 Pakati jabhenji pakibha na haikege bhamo bhabhalwala chitamwa cha ncholocholo kwa yaaka komi na hibhele. 26 Haikege bhenabho bhakalaga muno na kwaajendela akaaganga bhajingi. Na bhakatumia mbiya yabhe yoha, nambo bhangapata mbaya na penapo hali jabhe jikapunda kubhee jangalimmbone. 27 Pabhakahijoa ngani ya Ayesu, na henela bhakachipekenya pa lilubhalo bhakaajendela Ayesu kwa kuyeto kwaakwaa ngobho jabhe. 28 Bhakatenda henela, ligongo bhakachilobholela mwena muntima gwabhe, "Handa ngwaite ngobho jabhe tu, mbakulama."

29 Popopo miyahi jabhe jikakotoka kuolola, nabhena bhakachijohanikiha kubhehe mmele gwabhe jojolo gulamite. 30 Popopo Ayesu bhakang’ang’anuka kubhee machili gabhe ga kulamia gateendite lihengo. Bahi bhakatendebhukila lyenilyela lilubhalo lya bhandu bhajingi, bhakakonya, "Aganiki bhabhakwaite ngobho jangu?"

31 Bhanapunji bhabhe bhakaajangula, "Ntendakubhona namuna bhandu chibhamminya minya, mpakumanya bholi bhabhankwaite?"

32 Nambo Ayesu bhakapunda kulola koha koha ili bhaabhone bhabhaakwaaite. 33 Penapo bhena haikege, bhabhikuimanya gagatendikwe kwaachabhe, bhakabhoka kongo bhabhikulendemela kwa bhoga, bhakatindibhala majugwa na kotima nnongi ja Ayesu na kulongela ukweli goa. 34 Ayesu bhakaalobholela, "Aganja bhangu, kuhobhalela kwinu kutekunnamia. Nnyabhule kwa kuhengwa, kulaga kwinu kujoomwike."