Lucas 1

Ɓəwyegye ntu Yeisu mama ɓó

26 Dna ń əpya tnanyii she Alizebətu ɓə la nubwo, Shekwoyi wa tnu maləka Gəbiri wa lo Nazereti əzhi ń Gəlili, 27 lo da ɓyinyikwoyi kwului ń a ɓəə la wo dù nabai wa so ənu n a ɓə zhni ai yi wo ge Yusufu nyi, Dawuda yawyi. Əɓyinyikwoi kwului əye ɓə nyi Mariyamwu nu. 28 Maləka wa lo əwo aba wa gna wo, "Mi ɓyi ho əgna lo, əho ń ho la bmyashi yaakwo ɓwa nyi! Dagayi n kwnusnu lo n hoi."

29 Mariyamwu wa kwu jeje ntu maləka ɓəda ɓo, cei wó wo, kwo knyi gnaɓyii pya nu nyi a? 30 Ama maləka wa gna wo, "To wodna m, Mariyamwu, ho la bmyashi ɓwa n Shekwoyi aba. 31 Ho ɓa la nubwo jesnu ho ɓə ma əɓyinugbai, ho ɓə yi əwo ge, Yeisu. 32 Wo ɓə la zhni əza yaakwo jesnu ai yi wo ge Əza Duduyi Nugwnu. Dagayi Shekwoyi ɓə ga wo əbeshnikpegye əwo dada nya; Dawuda. 33 Wo ɓə gyi əbe tu ń Yakwuɓwu pwuwa nyalonyalo; əwo əbegyi to ɓə shna zo m."

34 Mariyamwu wa nya maləka əɓo, "Dəye ɓə yezhni n wunanu, shikwonyi mi ye zhni ɓyinyikwoi kwului nu nyi a?"

35 Maləka wa dnaɓəgbe, "Zafnu Gyigyiyi ɓə yakpe ho, jesnu Ikwo Əza Duduyi nya ɓə tu ho əfnu. Ntulonu əza gyigyiyi ń a ɓə ma nyi, a ɓə yi wo ge Shekwoyi Nugwnu. 36 Kwo Alizebətu əho mapwi, wo ye wa ma əɓyi nu dna n əwo kwokwo, jesnu əza ń a ɓə zhni ai gna nge wo zhni làma nyi, wo dnalo ń əwo əpya tnanyii nu n nubwoi. 37 Ntuge ɓəda ho to lo ń kwo gbmi ń Shekwoyi aba n kwo ɓa gbakalá m."

38 Mariyamwu wa dnaɓəgbe, "Mi zhni Shekwoyi tnutnuyi nu, fa əho ɓəda n ha da n mii nyi kwa nu." Nlonu maləka wa laka n əwo aba.