Akpa Ñwed Samwel 2

Mme Ndoom Nditọ Elai

12 Nditọ Elai ekedu abʌd-abʌd uwem; ammọ ikinieghe mbaak ndomokeed inọ Abọọñ. 13 Ndin akedo ido mme aku ke ini akeedodo awo amaanam uwa, ke ayịnufọk aku ayaakama akuum anie ukod ita ke ubọk amọ ke ini esʌkkọ etem unam ado 14 ñko anyʌñ awuuk akuum ado ke ako ufrañ ñkpọ me ke ketịl me ako ukwak me usiọñ. Se adodo a-akuum asioho adiinie aku. Naña ekesinam afịd nditọ Isrel e-ekediighe Silo ado ami. 15 Ado mbemiso etetem akpọñ unam ami, ayịnufọk aku ayaadi adibo awo a-awaaha uwa ami, "Nọ aku usʌk unam yak afọp; anye idiibọọhọ utetem unam uto fiin, ibọhọke ndisi."

16 Adieke awo ado abooho anye "Yak etem akpọñ unam ami diin, ndin afo asio se adodo ake afo ayemme," ayịnufọk ado ayaabọọrọ, "Iyoo, yaak anye nnọ idahami; imiidooho ntoro, ami ñyaubọ ke ñkanubọk."

17 Idiọọkñkpọ ñkparawa ami amaanekke akpon ke iso Abọọñ, sia ammọ ekesịn uwa Abọọñ ke ndek.