10 "Nam ammọ ebọp akebe edioomo ke eto akasia, ubaak kubid iba mme ubaak ke unyọọñ, kubid keed mme ubaak ke ubom, ndin kubid keed mme ubaak ke ukoñ.*25:10 Ñkpọ nte ikpad 3 3/4 ke unyọọñ ye ikpad 2 1/4 ke ukpa ye unyọọñ me ñkpọ nte mita 1.1 ke unyọọñ ye sentimita 68 ke ukpa ye unyọọñ; ntoro ñko ke Eksọdọs 25:17 11 Bana anye idem ke ataa eti kold, ke esịd ye ke anyọñ, ndin bod ñkpọ ke kold kanna anye. 12 Bot ikara kold inaañ nọ anye, nyʌñ kọọp ammọ ke ukod amọ inaañ, ñkpannuun iba ke ukod keed ye iba mfen ke ukod anye ako. 13 Ndin nam mboi ke eto akasia nyʌñ fʌk kold ke idem ammọ. 14 Wuuk mme ukwak ami kanna mme ikara mbeñ akebe edioomo nọ ado se ediikan iben anye. 15 Mme mboi itiad ami ana eba ke mme ikara akebe edioomo; inaaha nte esio ammọ. 16 Ndin sịn mme itiadñwed mbed a-ami ndiinọ ndufo ke akebe edioomo.

17 "Nam ufʌkñkpọ itie ñkpeubọk ke eti kold, kubid iba mme ubaak ke unyọọñ ye kubid keed mme ubaak ke ubom. 18 Nyʌñ nam serubim iba sio ke kold e-etịmmetịm nịm ke edem itie ufʌkñkpọ. 19 Nam serub keed ke ukañ edem keed ye serub iba ke edem ukan uko; nam serubim ke ñkañ ikpeghe keed ye ufʌkñkpọ ke naña edem iba. 20 Ana mme serubim etaara mba ammọ ekaa anyọñ, enyʌñ efʌk mme ufʌkñkpọ ami ye mba ammọ. Mme serubim ami ana esak iso ese emọ-emọ, ese ukañ ufʌkñkpọ ami. 21 Dot ukʌb ke anyọñ akebe edioomo, nyʌñ sịn mme itiadñwed mbed edioomo a-ami ndiinọ ndufo ke akebe edioomo.