1 Wo upacha, attu onkhaye velhaponi aari olhumachaka nuulhumo nimoka, olhumachaka malhove o ulhikaana. 2 Paahi etu attu veetakanche aya toka unosha nchuwa yahophiya ilhapo yo nikoote no Ushinari, nkayaakhalha wowo. 3 Paahi nkayeerelhana ashineneru, "Haya! Nkangwee etu nikooroshe matofali, nipaheke mooro rata." Attu aari ni matofali badala yo malhuku, ni ilami badala yo chokaa. 4 Nkayeeracha, "Ngwee nitheke iwani ni ishanja aya iphiyeke wiirimu wiira nchina nihu nirume, nihiwe naamwaariacha velhaponi wonkhaye."

5 Phi vavawo Apwiiya Nlhuku vaakhuruwilhe aya vathi uwa uwehani yeyo iwani iyo ni ishanja yaatheka aya attu iyo. 6 Apwiiya Nlhuku nkayeera, "Mmweheke, alha attu alha phi o nikosho nimoka ni onkhaye ayo anoolhumacha nuulhumo nimoka, ni ilha phi uchokholha tu wo alhe anowa aya upangacha. Ittu iriyoothe inolhakelha aya, anoowooria upanga. 7 Haya, ngwee nikhuruwe vathi navirikanihe nuulhumo naya ahiiwanane ashineneru." 8 Paahi etu Apwiiya Nlhuku nkayaamwarushacha velhaponi wonkhaye, ni ayo nkayaahiyacha utheka iwani ilhe. 9 Iwani iyo nkayeehaniya Babeli maana aya "uvirikaniha," ukhalhawaya phi wowo Apwiiya Nlhuku waavirikanihilhe aya nuulhumo no ilhapo yonkhaye, nkamwaarushacha attu mwiilhaponi mwonkhaye.

10 Anottwara alha phi iyari ya Nashemu. Iyaakha piilhi natondovekeru niwambwe nne, Nashemu vaari aya ni iyaakha imia imoka, ahonnyara Arfaksadi. 11 Baada yo unnyara Arfaksadi, Nashemu yaholhokelha iyaakha imia nthanu nkayaapatta achishaana akina ashilhopwana ni ashithiyana.

12 Naarfaksadi vaari aya o iyaakha makhumi mararu ni nthanu ahonnyara Shela. 13 Baada yo unnyara Shela, Naarfaksadi aholhokelha iyaakha imia ncheshe ni iyaakha ttaru nkayaayara achishaana akina ashilhopwana ni ashithiyana.

14 Nashela vaari aya ni iyaakha makhumi mararu ahonnyara Eberi. 15 Baada yo unnyara Eberi, Nashela yaholhokelha iyaakha imia ncheshe ni iyaakha ttaru nkaayaracha achishaana akina ashilhopwana ni ashithiyana.

16 Naeberi vaari aya o iyaakha makhumi mararu ni ncheshe, ahonnyara Peregi. 17 Baada yo unnyara Peregi, Naeberi aholhokelha iyaakha imia ncheshe ni makhumi mararu nkaayaracha achishaana akina ashilhopwana ni ashithiyana.

18 Naperegi vaari aya o iyaakha makhumi mararu, ahonnyara Reu. 19 Baada yo unnyara Reu, Naperegi aholhokelha iyaakha imia piilhi ni tisa nkaayaracha achishaana akina ashilhopwana ni ashithiyana.

20 Nareu vaari aya ni iyaakha makhumi mararu ni iyaakha piilhi, ahonnyara Serugi. 21 Baada yo unnyara Serugi, Nareu aholhokelha iyaakha imia piilhi ni saba nkaayaracha achishaana akina ashilhopwana ni ashithiyana.

22 Naserugi vaari aya o iyaakha makhumi mararu ahonnyara Nahori. 23 Baada yo unnyara Nahori, Naserugi aholhokelha iyaakha imia piilhi nkaayaracha achishaana akina ashilhopwana ni ashithiyana.

24 Nanahori vaari aya o iyaakha makhumi melhi ni tisa, ahonnyara Tera. 25 Baada yo unnyara Tera, Nanahori aholhokelha iyaakha imia imoka ni khumi ni tisa, nkaayaracha achishaana akina ashilhopwana ni ashithiyana.

26 Natera vaari aya ni iyaakha makhumi saba, ahonnyara Abramu ni Nahori ni Harani.

27 Alha phi achishaana a Natera. O nttara, Abramu, akina aari Nahori ni Harani. Naharani phi aari athumwanaya Nalutu, 28 ni ayo aarimenlhe ikatema Natera, athumwanaya, vaari aya akhalhaka Uuri ilhapo waayarelhe aya. 29 Naabramu ni Nanahori yahaaveka manyoopani. Ahanu a Naabramu yeeehaniya Sarai ni ahanu a Nanahori yeeehaniya Milka, anaaya Naharani. Naharani ayo tho aari phi athumwanaya Naiska. 30 Asarai khaaari ni ashaana ukhalhawaya aari o uhiyara.

31 Natera nkayaakusha Naabramu, anaya, Nalutu uchuulhu aya, yaani anaaya Naharani ni Asarai ahanu a Naabramu, nkayaathamacha vamoka Uuri iwani ya Akaldayo, nkayaarwa ilhapo yo Ukanaani. Nansho vaaphilhe aya Uharani yahokhalha wowo. 32 Natera aarimenlhe Uharani uwo vaari aya o iyaakha imia piilhi ni nthanu.