1 Yamalheke, Nlhuku ahoopuwelha Anuhu ni ashinama onkhaye o mwiithuphini ni o uhuwiya yaakushilhe aya nsafinani. Nkaawukiha iphioo, maashi nkaachokholha uwelhelha. 2 Vavawo, milhiwi cho maashi cho wuuthi ilhapo ni irimu chahottukiya. Ipulha nkayaamaalhihiya, 3 maashi nkaawukuwa vakani vakani velhaponi. Avireke mahuku imia imoka ni makhumi nthanu, maashi nkaawukuwa chinene. 4 Nihuku no khumi ni saba mweri wo saba isafina nkayeemelha vachulhu mwaako wo Ararati. 5 Maashi nkaathepa uwelhelha chinene mpaka mweri wo khumi, ni nihuku no upacha no mweri wo khumi, miako chahochokholha woonia vachulhu.

6 Avireke mahuku makhumi macheshe, Anuhu ahohulha ndirisha naatemunlhe aya vasafinani, 7 nkayankumiha nakhuku vathe, ni uyo vaavanve awe khaahokolhelhe, nansho aari avavaka uwo ni uwo mpaka maashi vaawelhenlhe aya vachulhu ilhapo. 8 Anuhu nkayaakumiha ikhunda wiira achuwelhe yakhalhaka maashi ahowelhelha velhaponi. 9 Nansho ukhalhawaya maashi aari bado anakhunenlhe ilhapo yonkhaye, ikhunda ilhe khayaakorenlhe vakittu, nkayaahokolhia wa Anuhu nsafinani. Anuhu nkayaakumiha moono nkayaavara ni uhokolhosha nsafinani. 10 Anuhu nkayaaweherera mahuku saba makina, nkaavaviha tho ikhunda ilhe. 11 Nkayaahokolhia uchechilho inalhumme nthakhuru nikithi no mwiri wo izeituni umalhakuni. Anuhu nkayaachuwelha wiira, maashi ahowukuwa velhaponi. 12 Nkayaaweherera wo mahuku makina saba, nkaavaviha tho ikhunda ilhe, nansho ulha nkwaha ulha khayaahokolhelhe tho.

13 Anuhu vaari aya o iyaakha mia sita ni iyaakha imoka, nihuku no upacha no mweri wo upacha, maashi aari anawelhenlhe vachulhu ilhapo. Anuhu nkayaapatakulha nlhako wo vachulhu isafina, vaawenhe aya, nkayoona wiira ilhapo ihooma. 14 Nihuku no makhumi melhi ni saba no mweri wo nayelhi, ilhapo aari inoomilhe kabisaa.

15 Vavawo Nlhuku nkeerelha Anuhu, 16 "Nkhumeke nsafinani mmo vamoka ni ahanu inyu ni achishaana inyu ni manyaahanu aya. 17 Mwaakumiheke ni ashinama onkhaye akumi arii vamoka ni inyu ayo, ashinuni ni ashinama ni kila ikumi ineepurulha, chirwee chayaraanache chinene velhaponi, chonchererie ni uwanelha mwiilhaponi mwonkhaye." 18 Paahi Anuhu nkayaakhuma nsafinani vamoka ni ahanu aya ni achishaana aya ni manyaahanu aya. 19 Ashinama onkhaye ni ashinuni nkayaakhuma anari mmakoshoni mwaya, ashinama onkhaye o mwiithuphini, ashinama aneepurulha, ashinuni onkhaye ni ashinama onkhaye akumi o velhaponi.

20 Anuhu nkayaathatha malhuku nkayaathekelha madhubahu Apwiiya, nkayankusha mwanamma mmoka mmoka wo kila nikosho no ashinama ni ashinuni anolhoka ukumihiya isadaka, nkaapaha onkhaye ikhalhe isadaka yo upahiya vamadhubahuni. 21 Vaapaha aya isadaka vawo, nihiriri no unukhelha no isadaka iyo, nahaateelhiha Apwiiya Nlhuku, nkayeecherelha, "Mena, akinowa kaalhava ilhapo tho wo nlhatu no uwonya wa ntu, kihochuwelha wiira irusho chawe chiri cho uwonya toka vanoyaria awe. Ni wala akinowa kaalhakalhiha tho chittu chikumi chonkhaye, thoko chinre aka chi. 22 Ilhapo chinohalha aya ulhokelha, nlhalha wo waalha imbeyu ni ukhungura, wo ntukutta ni wo uririya, iyiitha ni ilhimwe, uthana ni uhiyu, khachinowa chaamalha."