1 Paahi Adamu nkaayaarupa ni ahanu aya Ahawa, ni ayo nkayaarupalha irukulhu, nkayannyara Kaini. Ahawa nkayeera, "Wo ukaviheriya ni Apwiiya Nlhuku, kihompatta mwaana mwanlhopwana." 2 Tho ahonnyara mwaana mwanlhopwana nkina amwiihanne aya Habilu. Habilu aari ntu o uhuwa ikhondoro, uno Kaini aari ntu o ulhima. 3 Baada yo uvira mahuku, Kaini ahokusha mahalhahalha o choolhia chaaruwenrie awe umatani, urweeha isadaka wa Apwiiya Nlhuku. 4 Habilu ni uyo nkaawiha isadaka yo mattara o ikhondoro chawe ni inama yo ununa. Apwiiya Nlhuku nkayanrumelhelha Habilu ni isadaka awe, 5 nansho isadaka ya Kaini khayarumelhelhiye ni Apwiiya Nlhuku. Kaini nkaathunalha chinene. 6 Apwiiya Nlhuku nkayaamwiirelha Kaini, "Unothunalhani? Unottukani wiitho? 7 Chani wakaakivanhe ittu yoombone, khawathaathelha? Nansho ukhalhawaya uhopanga ittu yo unanara, uwonya wao unowiithelha vanlhakoni wao, unothanana uwulhusha. Nansho ni uwe unothananiya wiira ukottolheke."

8 Paahi etu baada yo vavawo, Kaini ahomwiirelha nhima awe, "Nngwee umatani." Vaari aya umatani uwo, Kaini ahonthuphelha nhima awe nkaamwiiva.

9 Apwiiya Nlhuku nkayankoha Kaini, "Nhima awo Habilu ri vayi?"

Kaini nkaakhulha, "Akichuwenlhe mii. Chani kwaani phi mii kinommwehaweha nhima aka?"

10 Paahi Apwiiya Nlhuku nkayeera, "Upanngeni? Iphome yo mwanhima awo inookunlhelha ukhuma vattayani, thoko nlhove ninonlhelha malhivo o uhokolhoshera. 11 Vano kihoulhava uwe, khunooria mena tho ulhima ittaya. Ukhalhawaya ittaya ihaathama thoko malhaku, ihowuria iphome awe vaamwiivilhe inyu. 12 Walhimaka, khunowa waaruweria ittu. Unowa ukhalha ntu o uthemwathemwa, hirini mapuro velhaponi."

13 Kaini nkaakhulha Apwiiya Nlhuku, "Nenna ntwarusho nna, niri nolhemelha kihinooriaka uchisha. 14 Lhelho, nhokoomolha velhaponi ni ukoomolha umihoolho winyu. Kihokhalha ntu hiri ni mapuro velhaponi ni ntu riyoothe nohalha ukoona, nookiiva."

15 Nansho Apwiiya Nlhuku nkayaakhulha, "Mena! Ntu riyoothe nohalha uwiiva, nootwarushiya mikwaha saba, uupwaha uwe." Paahi etu Apwiiya Nlhuku nkayanttuma Kaini inepo vayuchi, wooniha wiira ntu riyoothe nohalha unkumaana himwiive. 16 Kaini nkaathama vaari aya Apwiiya Nlhuku nkaarwaa uukhalhani ilhapo yo Unodi, unosha nchuwa imata yo Adeni.

17 Nakaini nkayaarupa ni ahanu aya nkayampatta mwaana mwanlhopwana amwihanne aya Enoko. Nakaini nkayaachokholha utheka iwani yeehanne aya wo nchina no mwaamwanaya uyo. 18 Naenoko nkayannyara Yiradi, ni Yiradi nkannyara Mehuyaeli. Mehuyaeli ahonnyara Methushaeli, ni Methushaeli uyo ahonnyara Lameki. 19 Nalameki nkaaveka manyoopaani elhi, Aida ni Azila. 20 Aida ahaayara Nayaabali, yayo phi athumwanaya attu onkhaye anohuwa mihuwo ni ukhalha mmahemani. 21 Ahima aya Nayaabali aari Nayubali, athumwanaya attu onkhaye anomoopa chikwesha ni attu anomoopa mpeta. 22 Azila ahaayara Natubali Kaini, aari ntu o chipara, aahana kila nikosho no ikaruma cho shaba ni iyuuma. Arokoraya Natubali yaari Nanaama.

23 Nalameki nkeerelhacha manyaahanu aya,

"Aida ni Azila nkakiiweni,

mwaatti manyaahanu a Nalameki.

Kihomwiiva ntu wo nlhatu no ukirakalhiha,

Eiyo, kihomwiiva mmirawo wo nlhatu no ukithuria.

24 Nakaini alhiviheriyaka mikwaha saba,

wo ikekhiaye Nalameki anolhiviheriya mikwaha makhumi saba ni saba."

25 Adamu nkayaarupa tho ni ahanu aya Ahawa. Ahawa nkayampatta mwaana mwanlhopwana nkina nkayammaha nchina nawe Seti. Paahi nkayeera, "Nlhuku hokivaha mwaana nkina o ulhivelhelhiha vakittu va Habilu eeviye ni Kaini." 26 Naseti nkayannyara mwaana mwanlhopwana yammanhe aya nchina Enoshi. Vavawo attu phi achokhonlhe aya ulhapelha wo uromolha nchina na Apwiiiya Nlhuku.