1 Iyaakha piilhi chavirekeru, Nafarao aholhoha itora, yaalhonhe aneemenlhe vachereshere mwolhoko wo Naili. 2 Nkayoona ing'ope chorera saba, chaari tho cho uneneva, chikhumaka mmaashini ni ulhia manyashi ntendeni. 3 Tho, baada yo ing'ope saba chiyo, ing'ope chikina saba cho unanara, cho woota chinene, chahokhuma mmaashini, nkachaawa ni weemelha vakhiviru ni ing'ope chorera cho uneneva chilhe, vachereshere mwolhoko vawo. 4 Ing'ope cho woota chinene chiyo nkachaakhura ing'ope chorera cho uneneva saba chilhe. Vavawo Nafarao nkayonkwa. 5 Nkayaarupa tho, nkayaalhoha nkwaha wo neyelhi. Nkayoona machashi saba molhupalhe, orera chinene, athaphuruwaka nthathi mmoka. 6 Baada yo vavawo, ahoona machashi makina saba o uyevayeva aanyaalhihiye ni iphioo yo uviha yo uthakoni, athaphuruwaka. 7 Machashi saba o unyaalha ayo nkayaamiria machashi saba molhupalhe akhomanlhe alhe. Paahi Nafarao nkayonkwa, nkayaachuwelha wiira aaneraka ulhoha. 8 Waashelhe waya, Nafarao anakelhiye nipampa chinene, aheehanacha akhwiri onkhaye o Umisri, ni attu o uchuwelha chittu, nkayaahimiachera itora chaalhonhe aya chiyo. Nansho khaariwo ata ntu mmoka onrie ulhamulha chechiyo itora chiyo.

9 Phi vavawo etu, ntu o ukorosha cho uwuriya cha amwene mulhupalhe ulhe venre awe wa Nafarao wiira, "Lhelho, kihoopuwelha makosa aka! 10 Ikatema vaarushiye inyu valhe, mii ni namitheko nkhunanaka o waapia mikatte ulhe, mwahonittuka uningome no ulhitelhelhiya ni manyaasikari ulhe. 11 Uhiyu mmoka naholhoha itora, kila mmoka itora awe ihinolhikaana ni ya nkhunanawe. 12 Woulhe ahaawo mmirawo mmoka Muebraniya, namitheko a olhupalhe o manyaasikari, aari vamoka ni hii muuttukiyani. Vanhimenrie ihu itora chihu, yoyo ahooria unilhamulhelha kila mmoka wo ulhikaana ni itora awe. 13 Chenre awe wo ulhamulha chiyo, phi chiichammo chenre aya wo ukhumelhelha kaanyuma. Mii kahohokolhoshiya unthekoni waka, ni ntu o waapia mikatte ulhe, ahothomeiya mmwirini."

14 Paahi Nafarao nkayaalhehera wiira Nayusufu awiihiye. Nkayaakumihiya ujerani chitemachitema. Baada yo uhama ikharari chaya ni uwara ikuwo chikina, Nayusufu ahowiihiya umihoolho wa Nafarao. 15 Nafarao nkayeerelha Nayusufu, "Mii, kiholhoha itora, nansho khaawo ntu onrie ukilhamulhelha. Kiheewa mwaha inyu, wiira inyuva mwahimeriyaka itora, nnowooria ulhamulha." 16 Nayusufu nkayaakhulha Nafarao, "Akirina yeyo ipilhi iyo, nansho Nlhuku nouthaphulhelhani ittu yoombone."

17 Vavawo Nafarao nkayeerelha Nayusufu, "Kilhonhe wiira, kaari kineemenlhe vachereshere mwolhoko wo Naili, 18 nkakoona ing'ope saba chorera, cho uneneva chinene chikhumaka mmwolhokoni ni ulhia manyashi ntendeni. 19 Nkachaattwariya ni ing'ope chikina saba cho uhuperiacha, cho unanara, cho woota chinene. Mii akinapacha mena woona ing'ope cho woota thoko chechiyo, Mmisri mu. 20 Paahi ing'ope cho unanara, cho woota chinene chiyo nkachaakhura ing'ope cho uneneva chilhe. 21 Nansho ata baada yo ukhuura ing'ope cho uneneva chilhe, ntu riyoothe khooria uchuwelha wiira chihaakhuura ashikhunanaya, kwaani bado chaari chinootilhe thoko mapachero vawo. Vavawo nkakonkwa.

22 "Kaanyuma, kaholhoha itora ikina tho, konne aka machashi saba o melhe o ukhomalha rata athaphuruwaka nthathi mmoka. 23 Tho, nkaattwariya ni machashi saba iphepuwa, o nyaalha aanyaalhihiye ni iphioo yo uviha yo uthakoni. 24 Machashi saba o iphepuwa ayo, nkaamiria machashi saba o ukhomalha alhe. Paahi, kahaahimiachera akhwiri ni achuwelhi o itora aka, nansho khaawo ntu onrie ukilhamulhelha."

25 Phi vavawo Nayusufu verenlhe aya Nafarao wiira, "Itora chonkhaye piilhi chiyo, ulhamulhiya waya unolhikaana. Nlhuku houpatakulhelhani ittu inothanana awe upanga. 26 Ing'ope saba cho uneneva chilhe, phi iyaakha saba. Machashi saba o ukhomalha alhe, ni ayo phi iyaakha saba. Itora chiyo ulhamulhiya waya, umoka. 27 Ing'ope saba cho woota chinene chilhe, chaattwanre ing'ope cho uneneva chilhe ni machashi saba anyaalhihiye ni iphioo yo uviha yo uthakoni alhe, maana aya iyaakha saba cho ikuruna. 28 Thoko chinre aka wo uhimeriani, pwiiya Nafarao, Nlhuku houpatakulhelhani chittu chinohalha awe upanga phiyaru. 29 Chinookhalha iyaakha saba cho nnema wo uruweriya choolhia ilhapo yonkhaye yo Umisri. 30 Nansho uhoolho uwo, chinoowa iyaakha saba cho ikuruna, mpaka nnema wo uruweriya uyo unowa ulhiyalhiya. Ikuruna iyo inoowalhawalhiha ilhapo ilha. 31 Nnema wo choolhia uyo unowa ulhiyalhiya kabisa, ukhalhawaya ikuruna inowa uttwara iyo, inowa ukhalha yulhupalhe chinene. 32 Itora inyu yaahokolhelhiye velhi wo ulhikaanacha, uwoonihani wiira Nlhuku holhakelha, ni uyo nootimiriha yoyo mwaha uyo phiyaru.

33 "Paahi etu, pwiiya Nafarao, munthanlheke ntu o irusho, mummaheke ntheko wo weemelhelha ilhapo yonkhaye yo Umisri. 34 Tho, pwiiya Nafarao, mwaathanlhe attu o weemelhelha ilhapo, ntheko aya ukhalheke uvira apocheraka mpatta wo nthanu wo choolhia chonkhaye chinokumihiya, wo iyaakha saba cho nnema wo uruweriya chiyo. 35 Mwaalhehereke akhunguracheke choolhia chonkhaye iyaakha saba cho nnema wo choolhia chinchi chiyo. Choolhia chiyo chithokoreriyeke, ni weemelhelhiya ni ikuru inyu, pwiiya Nafarao, wiira chikhalhe akhiba yo iwani chonkhaye. Chithokoreriyeke rata chinene. 36 Chechiyo choolhia chiyo chinowa ukhalha akhiba yo waalhamiha attu ilhapo yonkhaye yo Umisri, ihiwe yaawalhawalha wo nlhatu wo ikuruna yo iyaakha saba chinowa uttwara kaanyuma chiyo."

37 Nlhove naakuminhe aya Nayusufu nahoonia ukhalha norera umihoolho wa Nafarao ni akavihi aya onkhaye. 38 Paahi etu Nafarao aheerelhacha akavihi aya, "Yolha ntu ulha hanaa Iphumu ya Nlhuku! Chani, ninowooria umpatta ntu nkina thoko yolha?" 39 Nkeerelha Nayusufu wiira, "Ukhalhawaya Nlhuku houpatakulhelhani alha onkhaye alha, khaawo ntu nkina o irusho ni o wuupuwelha chittu choombone thoko inyuva. 40 Inyuva phi nohalha weemelhelha ilhapo aka, ni attu aka onkhaye anoowiwelhelhani inyuva. Mii vekha aka, phi mulhupalhe upwahani, ukhalhawaya kinokhalhelha ihiche yo imwene. 41 Paahi, kihothanlhani vano ukhalha ntu o weemelhelha ilhapo yonkhaye yo Umisri!" 42 Phi vavawo Nafarao vanrunlhe aya pete o nhuri vanikokhoni waya ni waawariha Nayusufu, nkayaawariha ni ikuwo chaya cho imwene ni nkufu aya wo idhahabu waawara aya nshikoni. 43 Nafarao nkayaawelhiha Nayusufu nkukuta aya wo imwene waapurulhiya ni ifarasi, akhalhaka nholhelhi nkavihi aya. Manyaasikari nkayaaholhelha akhuwelhachaka, "Mweemelheke amwene anoovira!" Phi Nafarao chenre aya wo waavaha Nayusufu ikuru yulhupalhe yo weemelhelha ilhapo yonkhaye yo Umisri. 44 Wo uthepa vavawo, Nafarao nkayeerelha Nayusufu, "Mii, phi amwene o Umisri! Kineera, ntu riyoothe mwiilhaponi mwonkhaye Umisri, hitheeshe moono wala mweto awe wo uhivahiya iruusa ni inyuva." 45 Nafarao nkayaavaha Nayusufu nchina no Imisri, Safenath panea. Nkayanthelhiha Asenathi, mwaamwana a Napotifera, yaari opochera ishaani o iwani yo Uoni.

Baada yo vavawo, Nayusufu ahochokholha nkwaha wo weetakachera ilhapo yonkhaye yo Umisri. 46 Nayusufu yaari o malhipa o iyaakha makhumi mararu vaachokhonlhe aya uvara ntheko u Nafarao, amwene o Umisri. Ahothama unupani u Nafarao, nkayaarwaa nkwaha wo weetakachera ilhapo yonkhaye yo Umisri.

47 Nkayaakhalha wiira, iyaakha saba cho nnema wo uruweriya choolhia, imata chonkhaye cho Umisri chahoruweriya choolhia chinchi chinene. 48 Nayusufu nkayaakhungura choolhia chonkhaye chaaruweriye iyaakha saba cho nnema chiyo, nkayaathokoreria ni ushunga akhiba kila iwani yo Umisri. Kila iwani ahotheka nikhupi no akhiba yo choolhia cho mmamatani, vakhiviru ni vawani. 49 Ahothokoreria akhiba yinchi chinene yo choolhia, nkayaakhalha yinchi thoko nhaava wo ubaharini, ata khayooria waalhakelhiya.

50 Iyaakha cho ikuruna chihinaya uwa, Nayusufu yaari anaayanre achishaana elhi wa ahanu aya Naasenathi, abiti Potifera, mwaamwana a opochera ishaani o iwani yo Uoni. 51 Mwaamwanaya o nttara ammanhe nchina nawe Manase, maana aya "ulhiyalhiha" ukhalhawaya yaari yeeraka, "Nlhuku hokilhiyalhiha uhuva waka wonkhaye, ni waalhiyalha ashilhoko aya athumwanaka onkhaye." 52 Mwaamwanaya o nayelhi, ammanhe nchina nawe Efraimu, maana aya "waapatta ashaana." Ukhalhawaya yaari yeeraka, "Nlhuku hokivaha ashaana mwiilhaponi mwaattwarushiya aka."

53 Iyaakha saba cho nnema wo uruweriya choolhia chinchi chilhe nkachaavira. 54 Nkachaachokholha iyaakha saba cho ikuruna, thoko chenre aya wo uhimia Nayusufu katashi vawo. Ilhapo chikina chonkhaye nkachaawolhiya ithalha, nansho ilhapo yo Umisri yonkhaye yaari inachanre choolhia. 55 Ikatema attu o Umisri vaachokhonlhe aya uwolhiya ithalha, yahonlhelha Nafarao wiira avahiye choolhia. Nafarao, nkayeerelhacha attu o Umisri onkhaye wiira, "Nrweeke u Nayusufu, inohalha aya uhimeriani, mwapangeke yeyo." 56 Ikuruna nkayaathepa chinene, nkayaawanelha mwiilhaponi mwonkhaye Umisri. Paahi etu, Nayusufu nkayaahulha makhupi onkhaye, nkaathumiheracha attu o choolhia. 57 Wo uthepa vavawo, attu o ukhuma ilhapo chikina ahowaacha Umisri, uuthumani choolhia u Nayusufu, kwaani ikuruna yaari yo uweria chinene ilhapo yonkhaye.