1 Alha phi achishaana a Naesau, yaani Naedomu. 2 Naesau yahaathelha manyaathiyana Akanaani, Naada abiti Eloni, o Uhiti ni Naoholibama abiti Anaa, o Uhivi, aari uchuulhu wa Nasimeoni. 3 O neraru, yaari Nabasemathi abiti Ishmaeli, arokoraya Nanebayothi. 4 Naada nkaayarelha Naesau mwaana, Elifazi. Ni Nabasemathi ahonnyara Reueli. 5 Naoholibama nkaayaracha Yeushi, Yalamu ni Kora. Yayo phi achishaana ashilhopwana a Naesau, yaayarachiye ni manyaahanu aya araru ayo, vaakhanlhe aya ilhapo yo Ukanaani.

6 Yamalheke, Naesau ahaakushacha manyaahanu aya, achishaana aya ashilhopwana ni ashithiyana, attu onkhaye o unupani waya, ing'ope chaya, ashinama aya akina ni nhakhu waya wonkhaye waapantte aya Ukanaani. Nkayaathamelha vakittu vakina, utayi uhaatamanaka ni wa ahima aya, Nayakhobo. 7 Yaapannge chiicho ukhalhawaya mihuwo chaya chaari chinchi ahooriaka ukhalha vamoka ni Nayakhobo. Ilhapo yaakhalha aya thoko alheto khayaathosha wo nlhatu no winchiva mihuwo chaya. 8 Paahi etu, Naesau nkayaarwa ukhalhani ilhapo yo miako cho Useiri. Nchina nikina ni Naesau naari, Edomu.

9 Alha phi achishaana ashilhopwana a Naesau, athumwanaya attu o Uedomu o ilhapo yo umiakoni yo Useiri. 10 Achishaana ashilhopwana yaari, Elifazi aayariye ni Naada, ni Reueli, aayariye ni Nabasemathi, ahanu aya akina. 11 Achishaana ashilhopwana a Naelifazi yaari, Temani, Omari, Sefo, Gatamu ni Kenazi. 12 Naelifazi ahanaa nivasha nikina wa namitheko nthiyana nchina nawe Timna. Yoyo ahaayarelha mwaana, nchina nawe, Amaleki. 13 Nabasemathi, ahanu a Naesau ahaayara Nareueli. Ashaana ashilhopwana a Nareueli, yaari, Nahathi, Zera, Shama ni Miza. 14 Ahanu akina a Naesau, Naoholibama abiti Anaa, uchuulhu wa Nasimeoni ahaayarelha Naesau ashaana ashilhopwana araru, Yeushi, Yalamu ni Kora.

15 Alha vano phi mamwene o mahimo yaakhumme u Naesau. Naelifazi, mwaana o nttara a Naesau ahaayara amwene Natemani, amwene Naomari, amwene Nasefo, amwene Nakenazi, 16 amwene Nakora, amwene Nagatamu ni amwene Naamaleki. Kila mmoka aya akhalhaka mwene o nihimo nawe. Yayo onkhaye ayo phi achishaana ashilhopwana a Naelifazi, Uedomu, yaakhumme wi iyari i Naada, ahanu a Naesau.

17 Nareueli, anaaya Naesau, ahaayara amwene Nahathi, amwene Nazera, amwene Nashama ni amwene Namiza, kila mmoka aya nkaakhalha mwene o nihimo nawe. Yayo onkhaye ayo phi achishaana ashilhopwana a Nareueli, Uedomu, yaakhumme wi iyari ya Nabasemathi, ahanu a Naesau.

18 Achishaana ashilhopwana a Naoholibama, ahanu a Naesau, yaari, amwene Nayeushi, amwene Nayaalamu ni amwene Nakora, kila mmoka akhalhaka mwene o nihimo nawe. Yayo onkhaye ayo phi achishaana ashilhopwana a Naoholibama, abiti Anaa, ahanu a Naesau. 19 Paahi etu, yayo phi iyari i Naesau yaani Naedomu, kila mmoka aya nkaakhalha mwene o nihimo nawe.

20 Achishaana ashilhopwana a Naseiri, ntu o Uhori, nnenchi o yeyo ilhapo iyo, yaari, Lotani, Shobali, Sibeoni, Anahi, 21 Dishoni, Eseri ni Dishani. Kila mmoka aya akhalhaka mwene o nihimo nawe munlhokoni mwa attu o Uhori o iyari i Naseiri, mwiilhaponi Uedomu.

22 Achishaana ashilhopwana a Nalotani yaari, Hori ni Hemani, yaari phi mamwene o mahimo aya. Mwanrokoraya Nalotani eeehaniya Natimna. 23 Achishaana ashilhopwana a Nashobali yaari, Alvani, Mahathi, Ebali, Shefo ni Onamu. 24 Achishaana ashilhopwana a Nasibeoni yaari Aya ni Anahi. Anahi phi aavitunlhe marapo o maashi o mooro uthakoni, ikatema vaachunga awe iphuta cha athumwanawe, Nasibeoni. 25 Achishaana a Naanaa yaari Dishoni ni mwanrokorawe mmoka, eehaniya Oholibama. 26 Achishaana ashilhopwana a Nadishoni yaari, Hemdani, Eshbani, Nithrani ni Kerani.

27 Achishaana ashilhopwana a Naeseri yaari, Bilhani, Zaawani ni Akani.

28 Achishaana ashilhopwana a Nadishani yaari, Usi ni Arani.

29 Paahi etu, yayo phi mamwene a attu o Uhori, amwene Nalotani, amwene Nashobali, amwene Nasibeoni, amwene Naanaa, 30 amwene Nadishoni, amwene Naeseri ni amwene Nadishani. Kila mmoka aya akhalhaka mwene o nihimo nawe, mwiilhaponi Useiri.

31 Paahi alha phi mamwene yaatawanre ilhapo yo Uedomu, mwene riyoothe hinaya waatawara attu o Uisraeli. 32 Amwene Nabela, anaaya Nabeori, aatawanre ilhapo yo Uedomu ni iwani yaakhalha aya yaari Udinhaba. 33 Vaakhwilhe aya Nabela, Nayoabu mwaaamwana a Nazera o ukhuma Ubosra ahokusha nipuro naya. 34 Nayobabu ayo vaakhwilhe aya, Nahushamu o ilhapo yo Utemani, ahokusha nipuro naya. 35 Nahoshamu vaakhwilhe aya, Nahadadi anaaya Nabedadi ahokusha nipuro naya, akhalhaka iwani yo Uavithi. Yayo phi amwene yaatakanne ikhoto ni waakottolha Amidiyani, Umoabu. 36 Vaakhwilhe aya Nahadadi, Nasamla o ukhuma Umasreka, ahokusha nipuro naya. 37 Nasamla ayo vaakhwilhe aya, Nashauli o ukhuma Urehobothi, vakhiviru ni mwolhoko wo Yufrati, ahokusha nipuro naya. 38 Nashauli vaakhwilhe aya, Nabaal hanani, mwaana a Naakbori, ahokusha nipuro naya. 39 Vaakhwilhe aya Nabaal hanani, mwaana a Naakbori ayo, Nahadadi ahokusha nipuro naya, ni iwani yaakhalha aya yaari Upau. Ahanu a Naakbori yaari, Namehetabeli, abiti Matredi, uchuulhu wa Namezahabu.

40 Aholhelhi o mahimo yaakhumme u Naesau, wo ulhikaana ni mahimo aya ni iwani chaya yaari, Natimna, Naalva, Nayethethi, 41 Naoholibama, Naela, Napinoni, 42 Nakenazi, Natemani, Namisbari, 43 Namagdieli ni Nairamu. Yayo phi ahoolhelhi o mahimo aakhumme u Naedomu, yaani Naesau, athumwanaya attu no Uedomu, aromolhachiye wo ulhikaana ni iwani chaya, mwiilhaponi mwaatawara aya.