1 Paahi wuupiya wo irimu, ilhapo ni chittu chonkhaye phi enre aya wo utimira. 2 Nihuku no saba Nlhuku aheettuwa baada yo umalhiha ntheko wonkhaye waapanga awe. 3 Nlhuku nkaahelha ibarakha nenno nihuku no saba nno ukhalha nihuku nitakatifu, ukhalhawaya nenno nihuku nno aheettuwa ntheko wo wuupa waapanga awe. 4 Phi chiichammo etu irimu ni ilhapo chenre aya wo wuupiya.

Apwiiya Nlhuku voupilhe aya irimu ni ilhapo, 5 khawaariwo ntepo uriyoothe mena imbeyu yaamenlhe ukhalhawaya aari ahinarupelha ipulha, mena khaariwo ntu o ulhima velhaponi, 6 nansho maashi nkayaakhuma vattayani nkayaatapwiha ilhapo yonkhaye.

7 Paahi Apwiiya Nlhuku nkayaamupa ntu nlhopwana wo ntukurukhu no vattayani, nkayammuchelhelha iphumu yo ukumi mphulhani mwawe ni ntu nlhopwana uyo nkaakhalha nkumi.

8 Tho Apwiiya Nlhuku nkayeesha imata yo Adeni, nthelha unosha nchuwa ni mwommo nkayaamweesha ntu nlhopwana aamupilhe aya uyo. 9 Apwiiya Nlhuku nkayaamelhiha vattayani makosho onkhaye o mitepo chorera mmiithoni ni wimmiha maphepu orera ulhia. Variyari imata vawo ahomelhiha mwiri wo maphepu anowiiha ukumi, ni mwiri unommaha ntu irusho cho uchuwelha chittu choombone ni chittu cho uhilhokalhoka.

10 Mwolhoko wo maashi wahophatuwa nkawaakhoolha mmatani Uadeni, nkawaamichera imata iyo, uthama wowo waheemianiha miolhoko micheshe. 11 Mwolhoko wo upachera weehaniya Pishoni, unorukureriacha ilhapo yo Uhavira, urii idhahabu. 12 Idhahabu yo wowo yorera chinene. Tho, wowo phi nophwanyiya makhura o nukhelha aneehaniya bedola ni malhuku o upharelha aneehaniya shohamu. 13 Mwolhoko wo nayelhi uneehaniya Gihoni, unokhoolha ilhapo yo Ukushi. 14 Mwolhoko wo neraru phi Tigrisi, unokhoolha nthelha unosha nchuwa ilhapo yo Uashuru, ni wo necheshe phi Yufrati.

15 Paahi amalhihekeru, Apwiiya Nlhuku ahomweesha ntu uyo umatani Uadeni, wiira alhime ni ushunga imata. 16 Apwiiya Nlhuku nkaamwiirelha ntu, "Unowooria ulhia maphepu o mwiri uriyoothe uri mmatani, 17 nansho uhilhie maphepu o mwiri wo variyari ummwiiha irusho cho uchuwelhiha chittu choombone ni chittu cho uhilhokalhoka. Walhiakaru, wo ikekhiaye unookhwa nenno nihuku."

18 Kaanyuma, Apwiiya Nlhuku aheera, "Khavalhonke unhiya ntu ulha vekha awe. Paahi etu kinomuupa nkhunanawe o unkaviha, o umphwanelha." 19 Paahi Apwiiya Nlhuku nkayaakusha ittaya, nkoopacha ashinama onkhaye o mwiithuphini ni ashinuni onkhaye anovavacha uchulhu. Nkaawiihacha wa ntu oone chinohalha awe waavaha machina, kila mwannama nkaavahiya nchina nawe. 20 Paahi ntu nkaavahacha machina ashinama onkhaye o uhuwiya ni o mwiithuphini, vamoka ni ashinuni onkhaye, nansho inakhalhaka chiicho khaariwo nkhunanawe o umphwanelha.

21 Paahi Apwiiya Nlhuku nkayanhelha ntu ulhe ikhove yo uhichuwelha ittu, nkaarupa. Ni vavawo vaarumpe awe vawo, Nlhuku ahotholholha niparari nimoka na ntu uyo, nkaakhunelha ithayi tho vakittu vawo. 22 Apwiiya Nlhuku nkaamuupa nthiyana ukhuma nnipararini ni ummwiiha wa nlhopwana. 23 Paahi ntu nkeera,

"Wo ikekhiaye, vano etu ulha phi nokiphwanelha,

nikhuva nikushiye mmakhuvani mwaka, ni iruttu ikhumme mwiiruttuni mwaka.

‘Nthiyana’ phi nchina nawe ukhalhawaya oupiye ukhuma wa nlhopwana."

24 Phi nlhatu etu no nlhopwana waahiya athumwanawe ni anumwanawe, ni ulhutaana ni ahanu awe ni ukhalha iruttu imoka.

25 Nlhopwana ni nthiyana o yelhi aari pwithipwithi, nansho khayoonne ishoni.