1 Nihuku nimoka, Dina, mwalhi mwaamwana a Nayakhobo annyanre aya ni Nalea ahorwaa weetakacherani manyoopani o ilhapo iyo. 2 Paahi Shekemu, mwaamwana a Nahamori, ntu o Uhivi aatawara yeyo ilhapo iyo vaamwoonne awe Dina, ahommara, nkanrupana wo machiri. 3 Nansho Shekemu ahochivelhiya chinene, ni unttuna Dina. Nkaachokholha umwulhumana ni umpepecha wiira Dina anttune. 4 Paahi nkeerelha athumwanawe, Nahamori, wiira, "Chonte thithi, nrweeke mwolhumaneke wiira kinthelhe mwalhi uyo."

5 Nayakhobo nkayeewa wiira mwaamwanaya uyo hovariya wo machiri ni Shekemu, nansho ukhalhawaya achishaana aya ashilhopwana yaari umachungani waalhiha aya mihuwo, ahomaalha mpaka vaahokolhelhachilhe aya. 6 Nahamori athumwanawe Shekemu ahorwaa wa Nayakhobo wiira olhumane, 7 ni yeyo ikatema iyo achishaana ashilhopwana a Nayakhobo yaari ahokolhiachaka ukhuma waalhiha aya mihuwo. Veewanche aya yoyo mwaha uyo, yahorushiya, nkayaathunalhacha chinene, ukhalhawaya Shekemu hopanga ittu yo unanara chinene, unrupana Dina wo machiri, kwaani yeyo ittu iyo yaari mwiikho mulhupalhe wa attu o Israeli. 8 Nansho Nahamori nkayeerelha, "Mwaamwanaka Shekemu, honttuna chinene mwaamwaninyu mwanthiyana uyo. Chonte, munhiyeke anthelhe. 9 Nithelhaneke, mwaatti nnithelhiheke achishaana inyu ashithiyana, ni hii nuthelhihekeni achishaana ihu ashithiyana. 10 Paahi etu, nnokhalha vamoka ni hii, khannokhalha ni nipampa mwiilhaponi mu. Nnookhalha, nnopanga maronda ni upatta nhakhu."

11 Shekemu ni uyo chiicho, aheerelhacha yayo malhove ayo athumwanawe ni ashirokorawe Dina, eeraka wiira, "Chonte, mwaatti nkipangelhe moombone, nkihiyeke kinthelhe, kinoulhivani ittu iriyoothe inohalha inyu uromolha. 12 Nkihimerieke ittu iriyoothe inophwanelha ukhalha ichitamo ni izawadi, ata inonnuwaka chani. Mii kinookumiha, nansho kimpatte mwalhi ulha."

13 Paahi achishaana ashilhopwana a Nayakhobo nkayaakhulha Nahamori ni mwaamwanaya Shekemu wo waalhia ikohi, ukhalhawaya Shekemu ahonnanariha Dina, mwanrokoraya. 14 Yaakhunlhe wiira, "Khaninooria unthelhiha mwanrokorihu wa ntu hiinelhiye unyawo. Ninowuulhiya muru neeraka chiicho. 15 Ninohalha wiiwanana mwaatti mwarumelhelhaka nna nlhove nna, Mwathananaka, nkhalheke etu thoko hii chiri ihu, wiira nimwiinelhe unyawo kila nlhopwana ri munlhokoni mwinyu. 16 Vavawo phi nohalha ihu uthelhihani achishaana ihu ashithiyana, ninookhalha vamoka ni inyu mwaatti, ni inyu nnookhalha ashilhoko ihu. 17 Nansho mwaahittuneke malhove ihu ni wiinelhiya unyawo, paahi ninonkusha mwaamwanihu uyo."

18 Nenno nlhove nno nahaateelhiha Nahamori ni mwaamwanaya, Shekemu. 19 Ni uyo khaapinche ata vakani upanga thoko cheewananiye, ukhalhawaya ahonttuna chinene mwaamwana a Nayakhobo. Tho, Shekemu phi ntu aari ni ikuru chinene waapwaha attu onkhaye uwannyawe uwo.

20 Paahi Nahamori ni mwaamwanaya, Shekemu, nkayaarwaa waari nlhako wo ukelha vawani, vaakumaana aya attu, nkoolhumana attu onkhaye wiira, 21 "Alha manyaattu alha, ashilhoko ihu. Naapochereke akhalhacheke mwiilhaponi mwihu mu, naahiyeke apangeke maronda, ukhalhawaya nihanaa ilhapo yulhupalhe yo unithosha hii, ni ayo chiicho. Ninowaathelha achishaana aya ashithiyana ayo, ni ayo anowaathelha achishaana ihu ashithiyana chiicho. 22 Nansho anohalha urumelhelha ukhalha ni hii narumelhelhaka nlhove naya no wiira, kila nlhopwana munlhokoni mwihu enelhiyeke unyawo thoko chiri aya yayo manyaattu ayo. 23 Chani mwaatti, khannoona wiira mihuwo chaya ni mihakhu chaya chinookhalha chawihu? Haya etu, naarumelhelheke, akhalheke vamoka ni hii." 24 Manyaalhopwana onkhaye yaathukumanne vanlhakoni vawo, yahorumelhelhacha nlhove ni Nahamori ni mwaamwanaya, Shekemu. Nkayeenelhachiya unyawo onkhaye.

25 Mahuku mararu kaanyuma, attu yeenelhiye unyawo alhe anari baado makhwata aaweriaka chinene, achishaana elhi a Nayakhobo, yaani Nasimeoni ni Nalawi, ashirokorawe Dina, ahokushacha maphanga aya, nkayaakelhelha wo gafula iwani yo yayo attu ayo, nkayeevakacha manyaalhopwana onkhaye. 26 Nkayeeva Nahamori ni mwaamwanaya Shekemu, nkayaankumiha Dina unupani wa Shekemu, nkayanhokolhosha uwani. 27 Baada yo nenno niiviho nno, achishaana ashilhopwana akina a Nayakhobo yahokelha vawani vawo nkayaavara mateeka kila ittu vawani vawo, ukhalhawaya mwanrokoraya ahonanarihiya wowo. 28 Nkayaakusha ikhondoro, ipuri, ing'ope, iphuta, ni kila ittu yaari vawani ni mmamatani. 29 Yahokusha nhakhu wonkhaye, ashaana ni manyaathiyana onkhaye vamoka ni kila ittu yaariwo mmanupani.

30 Paahi Nayakhobo nkayeerelha Nasimeoni ni Nalawi, "Mwaatti nhokithapaniha, nhaahelha ichuku attu o ilha ilhapo ilha ya Akanaani ni Aperizi ilha, wiira akivenge. Mii akirina attu enchi, yathukumanaka ni uwa ukithuriani, anookilhakalhiha mii vamoka ni ashilhoko aka."

31 Achishaana aya elhi ayo nkayaakhulha wo wiira, "Yaari ni ikuru ani yo umpanga mwanrokorihu thoko nthiyana o ulhavalhava?"