1 Paahi etu Asarai ahanu aya Naabramu aari ahinaayarelha owannyaya mwaana. Nansho ahanaa ipotta ithiyana eeehaniya Hajiri o ukhuma Umisri. 2 Paahi Asarai nkayeerelha owannyaya, Naabramu, "Nhochuwelha wiira Apwiiya Nlhuku khanakivahera waapatta ashaana. Munrupaneke etu Hajiri, ipotta aka nthiyana ulha, veekinaka kinowaapatta ashaana ukhuma uwannyawe." Naabramu nkayaarumelhelha nlhove na Asarai nno. 3 Paahi baada ya Naabramu ukhalha Ukanaani wo iyaakha khumi, Asarai yaavaha Naabramu Hajiri ipotta aya nthiyana Mmisri, wiira akhalhe ahanu aya. 4 Naabramu nkayanrupana Hajiri, ni uyo nkaarupalha irukulhu. Nansho Hajiri vonne awe wiira horupalha irukulhu, nkaachokholha waaveeha Asarai.

5 Paahi Asarai nkayeerelha Naabramu, "Inyuva phi nohalha uwehiya wo ulha nlhatu wo uveehiya kinopangelhiya aka ulha. Mii kahoovahani ipotta aka nthiyana, nansho varupanlhe awe irukulhu, mii kihothathuwa ukhalha khaveittu uwannyawe yoyo! Apwiiya Nlhuku anihukumulheke iriyari ihu inyuva ni mii."

6 Nansho Naabramu nkayeerelha Asarai, "Nlhatu inyu mwaanene. Ipotta inyu nthiyana uyo ri mmathathani mwinyu, mumpangelheke chiriyoothe chinothanana inyu." Paahi Asarai ahontwarusha Hajiri mpaka nkaattawa.

7 Nnepa wo wiirimu wa Apwiiya Nlhuku nkawamphwanya Hajiri vanraponi uthakoni, nrapo niri iphiro inokelha Ushuri. 8 Nnepa nkawaakoha, "Hajiri, ipotta ya Asarai, unokhuma vayi unokelha vayi?"

Hajiri nkaakhulha, "Kinaattawa apwiiya Asarai."

9 Nnepa wa Apwiiya Nlhuku ulhe nkaweera, "Uhokolhie wa apwiiya awo Asarai, wewelhelheke." 10 Wo uthepa vavawo, nnepa wa Apwiiya Nlhuku nkawaamwiirelha Hajiri, "Kinowoncherera achishaana awo, anowa winchiva vahinooriya waalhakelhiya. 11 Ukhalhawaya uwe uri veruttuni, unowa wiithaphulha mwaana mwanlhopwana, unohalha awo umwiihana nchina nawe Ishmaeli, ukhalhawaya Apwiiya Nlhuku ahoona chineera awo wo utwaruwa. 12 Nansho mwaamwanao, Ishmaeli, nowa ukhalha thoko iphuta yo mwiithuphini, nowa uvengiya ni kila ntu ni kila ntu nowa unvenga. Khanowa aakhalha rata ni ashilhoko awe."

13 Paahi Hajiri nkaavaha nchina Apwiiya Nlhuku olhumanne awe wowo ayo, "Uweva phi Nlhuku Noona," ukhalhawaya oopuwelha wiira, "Wo ikekhiaye, kihoona ayo anokoona ayo!" 14 Phi nlhatu etu ilhushi ilhe ineehaniya Beer lahai roi, maana aya, "Ilhushi ya Nkumi Noona." Yeyo ilhushi iyo iri iriyari yo Ukadeshi ni Uberedi.

15 Hajiri nkaayarelha Naabramu mwaana mwanlhopwana. Naabramu nkayammaha yoyo mwaana uyo nchina na Ishmaeli. 16 Naabramu aari ntu o iyaakha themanini ni sita, Hajiri vannyanre awe Ishmaeli.