1 Baada yo uvira yoyo mwaha uyo, anamitheko elhi o ikuru yulhupalhe unupani u Nafarao yahopanga ittu yo uhilhoka wa amwene. Namitheko mmoka aari ntu o ukoorosha chittu cho uwuriya, ni nkina ntu owaapia mikatte cha amwene. 2 Nafarao yahorushiya chinene, nkayaathunalhelha yayo manyaattu elhi ayo, 3 nkaattukacha u ningome no mulhupalhe a manyaasikari yaalhitelhelha attu attukiye, wowo waattukiye aya Nayusufu uwo. 4 Mulhupalhe o manyaasikari o ulhitelhelha ijera iyo ahaathanlha Nayusufu wiira avare ntheko wa waashunga yayo manyaattu ayo, yaakhanlhe mwommo wo mahuku menchi.

5 Paahi uhiyu mmoka, ntu o ukoorosha chittu cho uwuriya ulhe ni nkhunanawe o waapelha mikatte amwene ulhe, aholhohacha kila mmoka itora awe. 6 Nayusufu vaarwelhe aya wichishu uwaashikuriachani, oyelhi yaari anakelhachiye nipampa. 7 Nayusufu nkaakohacha, "Mbona lhelho mwaatti, nnonia wiitho uwo thoko ihaawo ittu inouhuvihani?"

8 Nkayaakhulhacha, "Nihokelhiya nipampa wo nlhatu no itora chilhohilhe ihu, ni khaawo ntu owooria unilhamulhelha itora chihu chiyo."

Nayusufu nkayeera, "Chani, ulhamulha itora kuhii ntheko wa Nlhuku? Haya etu nkihimerieke itora chinyu chiyo mwaatti."

9 Ntu o ukoorosha cho uwuriya cha amwene nkaahimiachera Nayusufu itora awe, eeraka, "Ntorani mwaka kahoona nzabibu uhoolho waka, 10 ni uyo waari ni iphata ttaru. Vaachokholha aya uphuwa, ituva chaya chahemma, ni ikhuche chaya chaari cho izabibu cho utokotta. 11 Mmathathani mwaka kaari kinavarenlhe ikikombe ya Nafarao, paahi nkakaakusha izabibu, nkakaamelha nkikombeni mmo, nkakaavaha Nafarao."

12 Nayusufu nkaamwiirelha wiira, "Maana aya phi alha, Iphata ttaru chiyo, mahuku mararu. 13 Ukhalhawaya aviraka mahuku mararu, Nafarao anoukumihani ujerani uno, ni uhokolhoshani unthekoni winyu. Nnokowaavaha tho Nafarao ikikombe mmathathani mwaya thoko cheera inyu khalhayi vawo. 14 Nansho chonte, nhikelhe mwakilhiyalha chittu vanohalha aya uweetelhani rata vawo. Mwaakipangelheke ittu yoombone, mwakiromolhacheke u Nafarao uwo, kikhume ujerani uno. 15 Ukhalhawaya mii, kaakushiye wo uhittuna ukhuma uwani ilhapo yo Aebraniya, ni Umisri uno akipannge ittu iriyoothe yo unanara yo uttukiya ujerani uno."

16 Ntu o waapia mikatte ulhe vonne awe wiira itora iyo yaholhamulhiya rata, nkeerelha Nayusufu wiira, "Ata mii kaholhoha! Itora aka iyo kechonne kinakushilhe ithokwa ttaru cho mikatte vamuruni. 17 Ithokwa yo uchulhu iyo, yaari ni choolhia chinchi chaapeiye wo nlhatu no warwehelha Nafarao. Nansho ashinuni yaari alhiachaka nthokwani mwaakushilhe aka vachulhu iyo."

18 Nayusufu nkayaakhulha, "Itora inyu iyo, maana aya phi alha, Ithokwa ttaru chiyo, mahuku mararu. 19 Baada yo uvira mahuku mararu, Nafarao anoutheshani ukhuma ujerani uno, anoutupulhani muru inyu, ni uthomia iruttu inyu vamwirini, ni ashinuni anoowa uthowolhacha iruttu inyu."

20 Nihuku no neraru, naari nihuku no wupuwelhiya uyaria u Nafarao, Nafarao ahoterekha ikaramu ni waalhalhia anamitheko aya olhupalhe onkhaye. Nkaakumiha ujerani ntu o ukoorosha cho uwuriya chaya ni ntu o waapia mikatte mulhupalhe ulhe, nkeemeshacha umihoolho wa anamitheko olhupalhe ayo. 21 Nkanhokolhoshera ntheko awe ntu o ukoorosha cho uwuriya cha amwene ulhe, ntheko wo waarwehelha ikikombe yo uwureria Nafarao. 22 Nansho ntu o waapia mikatte mulhupalhe ulhe, ahotupulhiya muru nkaathomeiya vamwirini, thoko Nayusufu chenre aya wo waalhamulhelha itora chaya. 23 Ata ineeraka chiicho, ntu o ukoorosha cho uwuriya mulhupalhe ulhe ahaalhiyalha Nayusufu.