1 Kaanyuma nkayaakhumelhelha ikuruna mwommo mwiilhaponi mmo, ikuruna yaapwaha ilhe yaapanche ukhumelhelha khalhayi ilhe, ikatema Aburahimu vaari aya akumi. Naisaka nkayaarwa Ugerari wa Naabimeleki amwene o Ufilisti. 2 Apwiiya Nlhuku nkayaakhumelhelha Naisaka ni weerelha, "Nhirwee Umisri, nansho nkhalheke ilhapo inohalha aka uhimeriani. 3 Nkhalheke ulhetoni wowo, ni mii kinokhalha ni inyu ni uvahani ibarakha. Kinootimiriha malhehano kaavahilhe aka athumwaninyu Aburahimu, kwaani kinouvahani inyuva ni iyari inyu chi ilhapo chonkhaye chi. 4 Kinowaapanga achishaana inyu akhalhe enchi thoko ittotwa cho wiirimu ni waavaha chi ilhapo chonkhaye chi. Ukhuma wi iyari inyu, makosho onkhaye o velhaponi va anoovahiya ibarakha. 5 Kinouvahani ibarakha ukhalhawaya Aburahimu ahokiiwelhelha, nkayaavarechesha iphiro chaka, chittu chaahimenrie aka, ikano chaavahilhe aka, malheheriyo ni malhehero aka." 6 Paahi Naisaka nkayaakhalha Ugerari uwo.

7 Attu o wowo vaakohilhe aya mwaha wa ahanu aya, ayo yaakhunlhe wiira, "Ulha mwanrokoraka." Yaari yoovaka uhimia wiira aari ahanu aya, wo nlhatu no woova wiira anenchi ayo aanooria weeva, ukhalhawaya Narabeka yaari nthiyana orera chinene. 8 Nihuku nimoka, baada yo ukhalha wowo wo mahuku menchi, Naabimeleki amwene o Ufilisti, ahothurumelha vandirishani nkayoona Naisaka anaakumbatinre ahanu aya, Narabeka ayo. 9 Naabimeleki nkayeehana Naisaka ni weerelha, "Ana kumbe alha ahanu inyu! Mbona mwenre wiira arokorinyu?"

Naisaka nkayaakhulha, "Ukhalhawaya kaanoova wiira kaaneeviya wo nlhatu waya."

10 Naabimeleki nkayaakoha, "Mpangeni etu? Ntu riyoothe munlhokoni mwa attu aka alha, aanooria waarupana ahanu inyu ayo wo uhoova, ni inyu mwannihelha muuwonyani." 11 Phi vavawo Naabimeleki vaamunke aya attu onkhaye wiira, "Ntu riyoothe nohalha umpangelha chittu cho uhilhoka ulha ntu ulha ama ahanu awe, nowiiviya."

12 Yeyo iyaakha iyo Naisaka aholhima mwommo mwiilhaponi mmo, nkayaaruweria wo upwaha mikwaha mia, ukhalhawaya Apwiiya Nlhuku ahaavaha ibarakha, 13 nkayaakhalha ntu o nhakhu. Nkayaathepa upatta ni ukhalha ntu o nhakhu mwinchi chinene. 14 Yahokhalhana mihuwo chinchi, ikhondoro, ing'ope ni ipotta enchi mpaka nkayoonelhiya ihache ni attu o Ufilisti ayo. 15 Paahi wo yeyo ihache iyo attu o Ufilisti ahowuhelhacha ilhushi chonkhaye chaathipiye ni anamitheko a Aburahimu, athumwanaya, vaari aya akumi. 16 Phi vavawo Naabimeleki verenlhe aya Naisaka, "Nthameke vawanihu va, ukhalhawaya inyuva nhonipwaha machiri." 17 Paahi, Naisaka nkayaathama wowo, nkayaamaka u nikoote no Ugerari, nkayaakhalha wowo. 18 Nkayaawuhulhacha ilhushi chaathipiye ikatema ya Aburahimu, athumwanaya, vaari aya akumi chilhe, ilhushi chaawuhelhiye ni attu o Ufilisti baada yo ukhwa wa Aburahimu. Nkayeehana wo machina yalhe yeehaniye ni athuwanaya alhe.

19 Nansho anamitheko a Naisaka vaathimpe aya vanikoteni vawo, ni upatta ilhushi yo maashi o uthekhuma 20 attu yaahuwa mihuwo o Ugerari vawo, yahaana indewo ni anamitheko yaachunga mihuwo chi Naisaka yeeraka, "Alha maashi alha awihu." Paahi Naisaka yaheehana yeyo ilhushi iyo, Eseki, maana aya, "Indewo," ukhalhawaya yahaanelhaniya.

21 Tho yahothipa ilhushi ikina, ni iyo nkayaatakanelhiya, paahi Naisaka nkayeehana yeyo ilhushi iyo Sitna, yaani "Ifitina." 22 Yamalhekeru, Naisaka yahorwaa vakittu vakina ni uthipa ilhushi ikina. Nansho yeyo khayaatakanelhiye, paahi Naisaka nkayeehana Rehobothi, yaani nipesha no ukhanuwa, yeeraka, "Apwiiya Nlhuku ahonivaha nipesha, ni hii vano ninoochina mwiilhaponi mu."

23 Ukhumelhelha vavawo, Naisaka ahorwaa Ubeer Sheba. 24 Yoyo uhiyu uyo Apwiiya Nlhuku ahaakhumelhelha ni weerelha, "Mii phi Nlhuku a athumwaninyu Aburahimu. Nhoove ukhalhawaya kiri vamoka ni inyu, kinouvahani ibarakha ni wuncherera iyari inyu wo nlhatu wa Aburahimu, namitheko aka." 25 Paahi etu wowo, Naisaka ahothatha malhuku nkayaatheka madhubahu, nkayaathimicha Apwiiya Nlhuku. Nkayaamaka wowo ni anamitheko aya nkayaathipa ilhushi.

26 Nihuku nimoka amwene Naabimeleki ahothama Ugerari vamoka ni Naahuzathi, ntu aavaha malhove o irusho, tho ni Nafikoli ahoolhelhi aya o mphingo wo manyaasikari, nkayaarwacha u Naisaka. 27 Paahi Naisaka nkayaakoha, "Mmwiilhe upangani uwannyaka, woonaka mwaatti mwahokipangelha ichimwa ni ukoomolha uwaninyu?"

28 Yayo manyaattu ayo nkayaakhulha, "Nihoona mwaari wiira Apwiiya Nlhuku ari vamoka ni inyu. Paahi nihoona wiira ihorera hii nilhupelhane ni inyu, nilhehane wiira, 29 khannonipangelha ittu yo uhilhoka, ni hii chiicho khaninoupangelhani ittu thoko yeyo. Nahoupangelhani moombone, nkanoohiyani wiira nthame wo uhuthuriani, wo uhupangelhani ittu iriyoothe yo uhilhoka. Ni vano inyu nhovaheriya ibarakha ni Apwiiya Nlhuku." 30 Paahi Naisaka ahoterekha yolhia, nkawaalhiya ni uwuriya vamoka. 31 Waashelhe waya, wahonkwiya wichishuru nkayaalhiya iyamini. Yamalhekeru, Naisaka yahaavelhelha alheto aya ni ulhehana wo ulhapelhelhaniya mpuha.

32 Nenno nihuku anamitheko a Naisaka yahowa ni waahimeria mwaha wo ilhushi yaathipa aya iyo, yeeraka wiira, "Nihophwanya maashi!" 33 Paahi Naisaka nkayeehana yeyo ilhushi iyo Shiba, yaani "Naapo." Paahi etu nchina no yeyo iwani iyo no Beer Sheba maana aya, "Ilhushi yo Naapo," nchina nirii mpaka lhelho nna.

34 Naesau vaari aya ni iyaakha makhumi ncheshe, ahaathelha manyoopani elhi Ahiti, Nayudithi abiti Beeri, ni Nabasemathi abiti Eloni. 35 Nansho yayo manyoopani ayo, yahohelha ichuku mmamirimani mwa Naisaka ni Narabeka.