1 Naisaka vaari aya anolhuvanlhe, miitho aya ahoonaka, aheehana Naesau, mwaamwanaya mulhupalhe, ni weerelha, "Mwaamwanaka!"

Naesau nkayaakhulha, "Eiyo thithi, kinowiiwelhelhani!"

2 Naisaka nkayeera, "Mii kiholhuvalha, kihichuwelhaka mena nihuku naka no ukhwa. 3 Paahi nkusheke ikaruma chinyu cho ulhupattelha, yaani nigonera no miupa ni muura inyu, nrwee wiithuphini mwanlhupatte mwannama, nkiwiihere. 4 Tho, nkaapelheke yolhia, inokichivelha chinene ilhe, kilhie, kuulhapelhelheni kihinaya ukhwa."

5 Kumbe ikatema Naisaka voolhumacha aya vawo, Narabeka aari ewelhelhaka. Paahi etu Naesau vaarweelhe aya wiithuphini ulhupattani, 6 Narabeka aheerelha anaya Nayakhobo wiira, "Kiheewa athumwaninyu yeerelhaka onninyu Naesau 7 wiira, ‘nrwee mwanlhupatte mwannama, nkaapelheke yolhia inokichivelha ilhe, kilhie, kuulhapelhelheni ibarakha umihoolho wa Apwiiya Nlhuku, kihinaya ukhwa.’ 8 Vano etu mwaamwanaka, ukiiwelhelheke, urumelhelheke ittu inohalha aka uhimeria iyo. 9 Urweeke uri nkutiro wo ipuri wakiwiihere ashipuri elhi o unenevacha, kaaterekhelhe athumwaninyu yolhia yo uchiva, inaachivelha aya chinene. 10 Yamalhaka waarwehelheke athumwana ayo alhie, olhapelhelhe ibarakha ahinaya ukhwa."

11 Nansho Nayakhobo nkayeerelha anumwanaya Narabeka ayo, "Muupuwelheke wiira amunna Naesau, iruttu aya yo mapururu menchi, ni mii akirina. 12 Veekinaka athumwanaka ayo anokaapaapelha, vavawo mii kinookhalha thoko kinowaathepiacha. Paahi etu kinowiithapaniha badala yo upatta ibarakha."

13 Anumwanaya ayo nkayeera, "Mwaamwanaka, uthapana wao uwo ukipatteke mii, uwe upangeke chinre aka chiyo, wakiwiihereke ashipuri ayo."

14 Paahi Nayakhobo nkayaarwa, nkaakusha ashipuri elhi, nkaawiiha wa anumwanaya, ni ayo nkayaapia yolhia yo uchiva, yolhia yaachivelha aya Naisaka, athumwanaya ayo.

15 Yamalhekeru, Narabeka ahokusha ikuwo chorera chi Naesau, mwaamwanaya mulhupalhe uyo, chaarina aya vawani vawo, nkayaawariha Nayakhobo mwaamwanaya mwankani uyo.

16 Nkayaavilhikelha nrapalha no ashipuri alhe mmiononi ni nshikoni. 17 Amalhihekeru, nkayaavaha yolhia yo uchiva ilhe ni nkatte waapelhe aya ulhe.

18 Paahi Nayakhobo nkayaakelha mpaani waarumpe aya athumwanaya, nkayeehana, "Thithi!"

Ni ayo nkayaakhulha, "Mmmh! Apani inyuva?"

19 Nayakhobo nkayaakhulha, "Mii, Esau, mwaamwaninyu o nttara. Kihopanga thoko chinre inyu wo ukiruma chiyo. Paahi etu, thithi, munkweke nkhalheke, nkhureke inama kiivilhe aka iyo, nkivahe ibarakha chiyo."

20 Nansho Naisaka nkayaakoha, "Mwinre chani wo wiiva inama wo waakuvia chitema thoko chiicho?"

Nayakhobo nkayaakhulha, "Apwiiya Nlhuku, Nlhuku inyu ahokivahera."

21 Phi vavawo Naisaka verenlhe aya Nayakhobo, "Mwaamwanaka, uchushereke etu kuwaapapelhe kichuwelhe wo ikekhiaye wiira phi uweva mwaamwanaka Esau ama kuhii." 22 Nayakhobo nkayaachushera wa athumwanaya, Naisaka, ni ayo nkayaapapelha, nkayeera, "Nlhove ninyu niri thoko na Yakhobo, nansho miono chinyu chiri thoko cha Esau." 23 Khayaachuwenlhe ukhalhawaya miono chaya chaari cho mapururu menchi thoko a Naesau, onnaya. Paahi etu nkayaachokholha waavaha ibarakha, 24 nansho nkayaakoha tho, "Chani, wo ikekhiaye uweva mwaamwanaka Esau?"

Ni ayo Nayakhobo nkayaakhulha, "Eiyo thithi, phi mii."

25 Paahi athumwanaya nkayeera, "Ukiwiihereke etu inama wiivilhe awo iyo kikhure, kuuvahe ibarakha mwaamwanaka." Nayakhobo nkayaawiha yolhia iyo, ni ayo nkayaalhia. Nkaavahiya tho ni idivai ni iyo nkaawuria. 26 Amalhihekeru, Naisaka nkayeera, "Uchushereke vaa mwaamwanaka, ukikumbatireke." 27 Paahi Nayakhobo nkayaachusherera athumwanaya ni waakumbatira, ni athumwanaya ayo vaanunkhe aya nihiriri no inama nkuwoni mwaya mmo, yahaavaha ibarakha yeeraka,

"Nkoonani, nihiriri no unukhelha no mwaamwanaka nno,

niri thoko imata ivahiye ibarakha ni Apwiiya Nlhuku!

28 Nlhuku omichereni ukame wo wiirimu,

ovaheni ittaya yo chaayira,

choolhia ni idivai yinchi.

29 Attu o makosho onkhaye avareke ntheko inyu,

ni ilhapo chukhoromelheni ni uthimichani.

Mwaataware ashihima inyu,

achishaana ashilhopwana a anumwaninyu oworomelhekeni, othimicheni.

Kila noulhavani, alhaviyeke mwanene,

kila nouvahani ibarakha, avahiyeke ibarakha!"

30 Naisaka vaamalhinhe aya waavaha ibarakha Nayakhobo, ni ayo vaathama aya va athumwanaya vawo, Naesau onnaya Nayakhobo, ahohokolhia waakenlhe aya ulhupattani. 31 Naesau ni ayo nkayaapia yolhia yo uchiva ni waarwehelha athumwanaya, nkayeera, "Haya thithi, munkweke etu nkhureke inama kilhupantte aka iyo, wiira nkivahe ibarakha!"

32 Nansho Naisaka nkayaakoha, "Inyuva apani?"

Naesau nkayaakhulha, "Mii Esau, mwaamwaninyu o nttara."

33 Vavawo Naisaka nkayaathukumelha yoovaka chinene, nkayeera, "Phi mpani etu ulhe lhupantte ni ukiwiihera inama ulhe, ni mii nkakaakhura uweva uhinaaya uwa? Tho, kihomalha ummaha ibarakha, eiyo, hopatta ibarakha!"

34 Naesau veewilhe aya malhove a athumwanaya ayo, ahokhuwelha yunlhaka ni weerelha athumwanaya ayo, "Thithi, chonte, nkivaheke ni mii ibarakha chiyo!" 35 Nansho Naisaka nkayeera, "Nhima awo ahowa va nkaakithepiacha, hokusha etu ibarakha awo."

36 Naesau nkayeera, "Phi nlhatu etu nineehaniya awe Yakhobo! Hokithepiacha velhi. Achokhonlhe ukusha uyulhupalhe aka wo ukhalha mwaana o nttara, ni vano hokusha ibarakha chaka." Eera chiicho, ukhalhawaya nchina na Yakhobo maana aya, "Ntu o woothacha." Paahi nkayaakoha athumwanaya ayo, "Chani khankihalhihenlhe ibarakha iriyoothe?"

37 Naisaka nkayaakhulha, "Kihommaha Yakhobo ikuru yo utawarani, ni ummaha achihima inyu onkhaye akhalhe phi anamitheko awe. Kihommaha ibarakha yo choolhia ni idivai. Kuupangelheke ittu yaani etu, uwe mwaamwanaka?"

38 Naesau nkayeerelha athumwanaya, "Ana kwaani thithi mwaarini ibarakha imoka yeyo tu? Nkivaheke ni mii ibarakha thithi!" Nkayonlha ikutto yulhupalhe.

39 Paahi Naisaka, athumwanaya, nkayeera,

"Mapuro awo anowa ukhalha utayi uhiri ichayira,

utayi uhinomicheriya ukame wo wiirimu.

40 "Unohalha ukhalha wo ukhulhuvelha uphanga wao,

Unoorumiya mitheko ni nhima awo,

nansho vanohalha awo ukulhuphuwa vawo,

unowa wuntha nikonkwa no vashikoni wao."

41 Paahi, Naesau nkayaavenga Nayakhobo wo nlhatu no ibarakha yaavahiye aya ni athumwanaya. Nkayaachukulha munrimani wo wiira, "Mahuku o mattanga a athithi vanohalha aya umalha, phi nowa aka umwiiva nhima aka Yakhobo."

42 Nansho Narabeka vaachuwenlhe aya ittu yaachukulha aya Naesau, aheehana Nayakhobo ni weerelha, "Uhiittialhe, munnawo Esau neevaha nrima wo ulhakelha wiira owiive. 43 Paahi etu mwaamwanaka, ukiiwelhelheke. Uthameke uttawelheke wa arokoraka Nalaabani, Uharani. 44 Waakhalhaneke mpaka ichuku yo munnawo iyo vanohalha aya utondova. 45 Yatondovaka, vanohalha awe ulhiyalha ittu umpangenlhe awo vawo, kinonruma ntu awe ohokolhosha. Nlhatuni etu kikhwelhiye ni inyu mwaatti o yelhi va nihuku nimoka?"

46 Narabeka nkayeerelha Naisaka, "Akirina mpuha mena vanokhalha aka va, wo nlhatu wo alha ashithiyana Ahiti elhi a Esau alha. Yakhalhaka etu Yakhobo ni uyo nonthelha nthiyana Nhiti, nambaya kikhwe."