1 Naraheli vonne aya wiira khanaayarelha Nayakhobo ashaana, ahoonelha ihache Nalea, arokoraya. Nkayeerelha Nayakhobo, "Nkivahe ashaana ni mii, yaahirieke chiicho, kinookhwa!"

2 Nayakhobo nkayaathunalhelha Naraheli chinene wo nlhatu wo nenno nlhove nno, nkayeerelha, "Chani, kwaani mii phi kushilhe ikuru ya Nlhuku othuwilheni ashaana?"

3 Naraheli nkayaakhulha, "Namitheko aka nthiyana Bilha haawo. Munrupaneke etu aayare ashaana, wiira ni mii kaapatte ashaana wo iphiro awe, ni mii kikhalhe ni iyari." 4 Paahi etu Naraheli nkaavaha Nayakhobo namitheko aya nthiyana, Bilha, akhalhe ahanu aya, ni ayo nkayanrupana. 5 Bilha nkaarupalha irukulhu, nkaayarelha Nayakhobo mwaana mwanlhopwana. 6 Naraheli nkayeera, "Nlhuku hokipangelha ittu yoombone, heewa ichuku aka, hokivaha mwaana mwanlhopwana." Nkayammaha nchina nawe Dani, maana aya, "hokipangelha moombone." 7 Bilha namitheko nthiyana a Naraheli nkaarupalha irukulhu tho, nkannyara mwaana o nayelhi mwanlhopwana. 8 Vavawo Naraheli nkayeera, "Kihaatakana indewo ni mwanrokoraka, ni mii kihonkottolha." Nkayammaha nchina nawe Naftali, maana aya, "waatakana."

9 Nalea vonne aya wiira ahohiya uyara, ahonkusha Zilpa namitheko aya nthiyana ni waavaha Nayakhobo wiira akhalhe ahanu aya. 10 Zilpa nkaayarelha Nayakhobo mwaana mwanlhopwana. 11 Nalea nkayeera, "Kihoreeriya." Paahi nkayammaha nchina nawe Gadi, maana aya, "ureeriya." 12 Zilpa namitheko a Nalea, ahaayarelha Nayakhobo mwaana nkina o nayelhi mwanlhopwana.

13 Nalea nkayeera, "Kihoteelhiya chinene! Vano manyoopani anookihaana o uteelhiya." Paahi nkayammaha mwaana uyo nchina nawe Asheri, maana aya, "uteelhiya."

14 Ikatema imoka yo nlhalha wo ingaano, Robeni ahorwaa umatani, wowo nkaapatta mwiri weeriya wiira manyoopani awuriaka anoorupalha irukulhu, nkaawiihera anumwanawe. Naraheli vonne aya, nkayeerelha Nalea, "Nkunthelhe mwiri uwiihilhe awe mwaamwaninyu uyo."

15 Nansho Nalea nkayaakhulha wo uchacha, "Chani nnaanyihera ittu ikani ukithurulha owannyaka, ni vano nnothanana ukithurulha mwiri wo mwaamwanaka?"

Naraheli nkayeera, "Mwakunthelhaka mwiri wo mwaamwaninyu, Nayakhobo anoorupa lhelho uwaninyu wo malhivo o yoyo mwiri wo mwaamwaninyu uyo."

16 Paahi uchechilho Nayakhobo vaahokolhia aya umatani, Nalea aheemelha weekamelha, nkayeerelha owannyaya, "Lhelho, lazima nrupe uwannyaka, kwaani kiholhiva, malhivo o mwiri wo mwaamwanaka." Paahi Nayakhobo nkayaarupa wa Nalea nenno nihuku nno.

17 Nlhuku nkewelhelha ulhapelha wa Nalea, ni ayo nkayaarupalha irukulhu ni waayarelha Nayakhobo mwaana o nethanu mwanlhopwana. 18 Nalea nkayeera, "Nlhuku hokilhiva, ukhalhawaya kahaavaha owannyaka namitheko aka nthiyana." Nkayammaha mwaana uyo nchina na Isakari, maana aya "Nlhuku hokilhiva." 19 Nalea nkayaarupalha irukulhu tho, nkaayarelha Nayakhobo mwaana o sita mwanlhopwana. 20 Nkayeera, "Nlhuku hokivaha izawadi yoombone. Vano owannyaka anookihelhelha, ukhalhawaya kihaayarelha achishaana sita ashilhopwana." Paahi nkayammaha nchina nawe Zabuloni, maana aya, "izawadi." 21 Kaanyuma nkayannyara mwaana mwanthiyana, nkayammaha nchina nawe Dina.

22 Baada yo vavawo Nlhuku ahoopuwelha Naraheli, nkayaarumelhelha ulhapelha waya, nkaavahera ashaana. 23 Naraheli nkayaarupalha irukulhu, nkayannyara mwaana mwanlhopwana, nkayeera, "Nlhuku hothamiha ishoni aka." 24 Paahi nkayammaha mwaana uyo nchina na Yusufu, yeeraka "Apwiiya Nlhuku akuncherereke mwaana nkina mwanlhopwana." Ukhalhawaya nchina Yusufu maana aya, "nkuncherereke nkina."

25 Baada yo uyaria Yusufu, Nayakhobo aherelha Nalaabani, "Nkihiyeke vano kihokolhie uwani etu, wiilhaponi waka.

26 "Nkivaheke manyaahanu aka ni achishaana kaapantte aka wo uvara ntheko uwaninyu, kaarwaane uwani. Ukhalhawaya nhochuwelha wiira, kihovara ntheko inyu rata."

27 Nalaabani nkayaakhulha, "Nkivaheke nipesha ni mii etu kulhumache. Kihochuwelha wo ulhamulhelhiya wiira Apwiiya Nlhuku ahokivaha ibarakha wo nlhatu winyu. 28 Nromolheke etu malhivo anothanana inyu kuulhiveni ni mii kinouvahani."

29 Nayakhobo nkayeera, "Inyu mwaanene nhochuwelha chinre aka wo uvara ntheko inyu, tho nhochuwelha chinre aka wo waashunga ashinama inyu rata. 30 Ukhalhawaya kihinaya uwa, nhakhu inyu waari vakani, nansho toka vaawilhe aka, nhakhu inyu uhonchereria chinene. Ni Apwiiya Nlhuku ahouvahani ibarakha chinene kila waarwelhe aka. Vano etu ni mii kirwee kaashunge ashilhoko aka."

31 Nalaabani nkayaakoha Nayakhobo, "Kuulhivekeni ittu yaani?"

Nayakhobo nkayaakhulha, "Nhikivahe ittu iriyoothe, nansho mwakipangelhaka ittu imoka ilha, kinoothepa waashunga ashinama inyu. 32 Nkihiyeke kivire iriyari ya ashinama inyu onkhaye lhelho va, kaahaulhanihe wo kila nkutiro, ikhondoro cho manepanepa ni cho marayirayi, kila ikhondoro yoripa, ni kila ipuri yo manepanepa ama yo manepa. Yayo phi nohalha ukhalha malhivo aka. 33 Paahi mahuku anowa, ukhulhuvelhiya waka unowoonia mwaari vanohalha inyu woona ittu ikilhivilhe inyu. Ipuri iriyoothe ihiri ni manepanepa ama manepa, ama ikhondoro iriyoothe ihiri yoripa yooniaka munkutironi mwa ashinama aka, yoyo nowa ukhalha o wiiyiya."

34 Nalaabani nkayeera, "Aye! Yiirieke thoko chinre inyu wo wulhumacha chiyo." 35 Nansho nenno nihuku Nalaabani nkayaarwa nkayaahaulhaniha mabeberu o marayirayi ni o manepanepa onkhaye, ipuri chithiyana chonkhaye cho manepanepa ni cho manepa, kila mwannama o telha mwiiruttuni, ni kila ikhondoro yoripa nkeesha alhitelhelhiye ni achishaana aya. 36 Nalaabani nkayaarwa vakittu wo nkwaha wo mahuku mararu, nkayetenga ni Nayakhobo. Nayakhobo nkayaahalha aashungaka ashinama a Nalaabani yaahalhenlhe.

37 Paahi Nayakhobo nkayaakusha ikopo chikithi cho miri cho mlubna, mlozi ni mwaramoni, nkayaatulhacha wiira mistari choteelha choonie kila ikopo. 38 Nkayeemeshacha ikopo chaatunlhe aya chiyo umihoolho wa ashinama valhushi vaawuriacha aya maashi. Ni ukhalhawaya ashinama ayo ahowelhanacha ikatema vaawuriacha aya maashi, ahorupalhacha irukulhu. 39 Yaarupalhanche irukulhu umihoolho wo ikopo chiyo, paahi etu nkaayaracha ashinama o marayirayi, o manepa ni o manepanepa.

40 Nayakhobo nkayaahaulhaniha ipuri ni ikhondoro chiyo, nkaaholhelha waari ashinama o marayirayi ni oripa u nkutiro wa Nalaabani. Wo yeyo iphiro iyo, Nayakhobo ahopatta nkutiro wa ashinama wawaya, mena khayaathakanihilhe ni nkutiro wa Nalaabani.

41 Nkawaakhalha wiira, kila vaaphiya aya ikatema yo ashinama o machiri urupalha irukulhu, Nayakhobo aheesha ikopo umihoolho waya vaawuriacha aya maashi, wiira arupalhihiye irukulhu umihoolho wo ikopo chiyo. 42 Nansho khayeenshe ikopo chiyo umihoolho wo ashinama o uhuperiacha ikatema vaawuriacha aya maashi ni urupalhihiya irukulhu. Baada yo vavawo etu ashinama o uhuperiacha ayo nkayaakhalha a Nalaabani, ni ashinama o machiri nkayaakhalha a Nayakhobo. 43 Paahi etu, Nayakhobo nkayaakhalha ntu o nhakhu mwinchi chinene, nkayaakhalha ni mikutiro chulhupalhe cho ashinama, anamitheko ashilhopwana ni ashithiyana, ingamiya ni iphuta.