1 Paahi Nayakhobo nkayaathepa urwaa nkwaha aya. Vaathepa aya urwaa nkayaakumaana minepa cho wiirimu cha Nlhuku. 2 Nayakhobo voonilhe aya minepa alhe nkeera, "Vaa phi vakittu vamakilhe aya Apwiiya Nlhuku!" Paahi nkayeehana vavawo vakittu vawo, Mahanaimu, maana aya "miphingo milhi cha Apwiiya Nlhuku."

3 Nayakhobo ahaaruma akarumiya yaaholhelhe urwaa Useiri, ilhapo yo Uedomu wa Naesau, munnaya. 4 Nkayaalhehera wiira, "Mwaahimerieke amunna Naesau wiira, Nayakhobo, namitheko inyu aneera, ‘Kihokhalha wa Nalaabani, ulhetoni mpaka nna. 5 Kihopatta ing'ope, iphuta, mikutiro cho ikhondoro ni anamitheko ashilhopwana ni ashithiyana. Kinouwiherani nttenga ulha wiira nkoonelhe ikiriri.’ "

6 Akarumiya ayo yahorwaa, nkayaahokolhia ni weerelha Nayakhobo wiira, "Nihophiya wa onninyu Naesau, ni ayo ari mphironi vano, anowa ni attu imia ncheshe uwiikamelhani." 7 Nayakhobo nkayoova chinene ni uchukulha munrimani. Paahi nkayaakawaniha attu yaarina aya ayo, ikhondoro, mihuwo chikina ni ingamiya, milhoko milhi. 8 Yaari yuupuwelhaka wiira, "Yakhalhaka Naesau anowa ni waatakana ni nlhoko mmoka, paahi nlhoko nkina unohalha uyo, unookulhuphuwa."

9 Yamalheke, Nayakhobo nkayanlhepelha Nlhuku yeeraka, "Uwe Nlhuku a athumwanaka Aburahimu, Nlhuku a athumwanaka Naisaka! Inyu Apwiiya Nlhuku nkiirenlhe wiira kihokolhie wiilhaponi waka, wa ashilhoko aka, nkamwaakilheha wiira nnokipangelha moombone. 10 Mii akinophwanelhiya ata vakani, moombone o ukhulhuvelhiya winyu akipangenlhe inyu mii namitheko inyu. Vaalhapuwilhe aka mwolhoko wo Yorodani, kaari mathatharu yaahikhalhe ikopo, nansho vano kihanaa milhoko miilhi chilha. 11 Kinoulhepelhani wiira nkookholhe vano mmathathani mwa amunna Naesau, kwaani kinowoova wiira anonithuria ni uniiva hii onkhaye va, manyoopani vamoka ni ashaana. 12 Nansho inyuva mwahokilheha wiira, nnookipangelha moombone ni wuncherera ayari aka akhalhe enchi thoko nhaava wo ibahari uhinaalhakelhia wo nlhatu no winchiva waya."

13 Paahi Nayakhobo nkayaarupa vavawo yoyo uhiyu uyo. Nkayaahaulha nhakhu aya wiira aavahe izawadi Naesau, onnaya, 14 chikhalhaka ipuri chithiyana imia piilhi ni mabeberu makhumi melhi, ikhondoro chithiyana imia piilhi ni madume makhumi melhi, 15 ingamiya makhumi mararu ni achishaana aya, ing'ope chithiyana makhumi ncheshe ni madume khumi, iphuta chithiyana makhumi melhi ni madume khumi. 16 Nkayaavaha anamitheko aya, kila mmoka nkutiro awe, nkeerelhacha, "Nkiholhelheke uno nhiyaka inafasi variyari, nkutiro mmoka ni nkutiro nkina mumphingoni mmo." 17 Nkanlhehera nashirongora aholhelhe uyo wiira, "Vanohalha inyu waakumaana amunna Naesau vawo, nkayookohani, ‘Inyuva anamitheko a apani? Nnokelha vayi? Alha ashinama alha a apani?’ 18 inyuva mwaakhulheke, ‘Ulha nhakhu wa ahima inyu Nayakhobo, phi izawadi akuminhe aya uuvahani inyuva, pwiiya Naesau. Tho, Nayakhobo anene ayo arii utulhi uwo anoowa.’ " 19 Tho, nkayaalhehera thoko chiicho wa nashirongora o nkutiro wo nayelhi ni wo neraru, ni akina onkhaye ayo, wiira, "Mwaahimerieke Naesau malhove thoko yayo vanohalha inyu waakumaana vawo. 20 Thoni, mwaahimerieke wiira, ‘Namitheko inyu Nayakhobo rii utulhi uwo noowa.’ " Ukhalhawaya yoopuwelha wiira, "Veekinaka kinowaamaalhiha vanohalha aya upochera izawadi chinoholhelhiha aka chi. Ni vanohalha aka waakumaana vawo, anookipochera." 21 Paahi nkayaahoolhelhiha izawadi chaya chiyo, nansho anene ayo yoyo uhiyu uyo yaarumpe vaamakilhe aya vawo.

22 Yoyo uhiyu uyo, Nayakhobo ahonkwa, nkayaakusha manyaahanu aya elhi alhe, anamitheko ashithiyana elhi ni achishaana aya khumi ni mmoka, nkayaalhapuwa nshepa no Yaboki. 23 Vaamanlhe aya waalhapusha mpaka uhito, aholhapusha chittu chonkhaye chaarina aya, 24 nansho anene ayo nkayaahalha vavawo vekha aya.

Baada yo vavawo, ahowa ntu mmoka, nkanvarana ni ukottolhana mpaka mapikosha. 25 Ntu uyo vonne awe wiira khanooria waakottolha Nayakhobo, ahaattindaniha Nayakhobo iyunu vakhaukani, vaaphathana aya vawo. 26 Phi vavawo ntu ulhe verenlhe awe Nayakhobo, "Nkihiye kirwee, uhosha."

Nansho Nayakhobo nkaamwiirelha, "Akinouhiya mena, mpaka ukivaheke ibarakha!" 27 Ni uyo nkaakoha, "Nchina ninyu apani?"

Nayakhobo nkayaamwaakhulha, "nchina naka Yakhobo." 28 Ntu ulhe nkeera, "Khannehaniya Yakhobo tho, nansho nneehaniyeke Israeli. Ukhalhawaya nhophathana ni Nlhuku ni attu, nkamwaakottolha." 29 Vavawo Nayakhobo nkayankoha, "Chonte, nkihimerieke etu nchina ninyu apani."

Nansho uyo nkeera, "Ye ishiyani ukikoha nchina naka?" Nkaavaha ibarakha Nayakhobo. 30 Nayakhobo nkayeehana vavawo vakitu vawo, Penieli, maana aya "ikhove ya Nlhuku." Ukhalhawaya yaari yeeraka, "Kihomwoona Nlhuku ikhove awe, ni mii akaakhwilhe." 31 Nchuwa nkanaasha ikatema Nayakhobo vaathama aya Upenieli, nkayaatumbelha veeta aya, wo nlhatu no uttindania iyunu. 32 Paahi phi nlhatu etu mpaka nna attu o Israeli ihinokhura aya nthinga wo nnyununi, ukhalhawaya ntu ulhe aattindaninhe Nayakhobo vayununi nkhaukani mwaya.