1 Baada yo vavawo, Nayusufu ahohimeriya wiira athumwanaya areta. Paahi ahaakushacha achishaana aya elhi, Manase ni Efraimu, nkaarwaana wa athumwanaya uwo. 2 Nayakhobo vaahimeriye aya wiira, Nayusufu ahowa uwaashikuriani, aheemananiha ni wunkwa nkayaakhalha vankorini. 3 Nayakhobo nkayeerelha Nayusufu, "Nlhuku o Machiri ahokikhumelhelha vaari aka Uluzu, ilhapo yo Ukanaani, nkaakivaha ibarakha. 4 Aakirenlhe, ‘Mwooneke, kinouvahani inyuva iyari yinchi, kinoupangani ukhalha athumwanaya makosho molhupalhe a attu. Ilha ilhapo ilha kinowa waavaha achishaana inyu, ikhalhe yawaya mahuku o uhimalha.’ "

5 Nayakhobo nkayaathepa weerelha Nayusufu, "Achishaana inyu elhi mwaapattilhe inyu Umisri uno, kihinaaya uwa, achishaana aka. Efraimu ni Manase anookhalha achishaana aka thoko chiri aya Narobeni ni Nasimeoni. 6 Nansho ashaana nnohalha inyu waapatta mahuku anowa, awinyu. Ni ayo anowa ukawelhiya ilhapo yo uhiyeriya wo nchina na manyonnaya alha. 7 Kinolhamulha chiicho wo nlhatu wa anumwaninyu, Naraheli. Vaahokolhia aka ukhuma Upadan, ahorihiaa ilhapo yo Ukanaani, vaatameria ihu uphiya Uefratha, nkaakihiyera ihuzuni yulhupalhe. Kaavinthe vavawo, vachereshere iphiro inokelha Uefratha." Alha mahuku alha vaneehaniya Ubethlehemu.

8 Nayakhobo vonne aya achishaana a Nayusufu, ahokoha, "Phi apani yalha ashinganya alha?"

9 Nayusufu nkayaakhulha wiira, "Alha achishaana aka, Nlhuku kivahenre awe vari aka Umisri uno."

Nayakhobo nkayeera, "Mwaawiiheke uno, kaavahe ibarakha." 10 Miitho a Nayakhobo khayoona rata wo nlhatu no wulhuvalha waya. Paahi Nayusufu ahaachushereriha achishaana aya wa apwiiyaya, ni ayo ahaakumbatiracha.

11 Amalhihekeru, Nayakhobo nkayeerelha Nayusufu, "Akaanyihenre wiira kinoowa kowoonani tho, nansho Nlhuku hokivahera woona ata achishaana inyu!" 12 Vavawo Nayusufu ahaathamiha vaapakatachiye aya ni apwiiyaya vawo, nkayaakhoroma wo heshima.

13 Nayusufu nkayeeshacha Efraimu wiimushi wa Nayakhobo ni Manase wiimonono waya. 14 Nansho Nayakhobo nkayaatindaniha miono chaya, nkayeesha moono aya wo wiimonono vamuruni wa Efraimu, inakhalhaka aari phi mwankani, ni moono aya wo wiimushi vamuruni wa Manase, mulhupalhe uyo. 15 Yeeshekeru, ahaalhapelhelha ibarakha Nayusufu yiiraka,

"Nlhuku aathimichiye ni manyaathumwanaka, Aburahimu ni Naisaka,

Nlhuku kiholhenlhe mii mu ukumini mwaka mpaka nna,

aavahe ibarakha alha ashimirawo alha!

16 Ni nnepa wo wiirimu waakokhonlhe mwo uhilhoka mwonkhaye,

aavahe ibarakha alha ashimirawo alha!

Nchina naka ni machina a manyaapwiiya aka, Aburahimu ni Naisaka,

alhokelhihiye nhina mwaya alha ashimirawo alha,

onchererie ni ukhalha enchi velhaponi va!"

17 Nayusufu vonne aya wiira athumwanaya ahotindaniha miono, aheesha moono aya wo wiimonono vamuruni wa Efraimu, khayaateelhiye. Paahi nkayaavara moono wa athumwanaya, athananaka uthamiha vamuruni wa Efraimu, eeshe vamuruni wa Manase. 18 Nkayeerelha athumwanaya, Nayakhobo, wiira, "Kuhiwe chiicho thithi! Ulha va phi o nttara. Mmweeshereke ulha moono inyu wo wiimonono vamuruni vawe vawo."

19 Nansho athumwanaya ayo nkayaakhota yeeraka, "Kihochuwelha, mwaamwanaka, mii kihochuwelha. Achishaana a Manase ni ayo anowa ukhalha nikosho nulhupalhe no uchuwania. Inakhalhaka chiicho, mwankani ulha phi nowa uthepa ukhalha ni ikuru yulhupalhe umpwaha munnawe, ni achishaana awe anowa ukhalha makosho menchi."

20 Paahi etu Nayakhobo nkaalhapelhelhacha ibarakha nenno nihuku nno yeeraka,

"Attu o Israeli anowa uromolha machina inyu uvahera ibarakha,

anowa wiira, ‘Nlhuku ovaherekeni thoko Efraimu ni Manase!’ " Wo wiira chiicho, ahonholhelhiha Efraimu umihoolho wa Manase.

21 Baada yo vavawo, Nayakhobo nkayeerelha Nayusufu, "Thoko chineera inyu wo woona chi, mii kihaatameria vanokhwa aka. Inakhalhaka chiicho etu, Nlhuku nookhalha vamoka ni inyu mwaatti, nouhokolhoshani wiilhaponi wa manyaapwiiya inyu. 22 Wo uthepa vavawo, kihouvahani inyuva, kahii manyonninyu ilhapo imoka yo umiakoni, kaathurunlhe aka attu o Uamori, vaakottonlhe aka wo uphanga ni muura aka."