1 Naabramu nkayaahokolhia ukhuma Umisri, nkayaamaka nthelha uneelha nchuwa wo Unegebu. Yaari ni ahanu aya ni nhakhu waya wonkhaye, vamoka ni Nalutu. 2 Yeyo ikatema iyo Naabramu aari ntu o nhakhu mwinchi chinene o mihuwo, isiliva ni idhahabu. 3 Vaathamme aya Unegebu ahothepa weeta nkwaha aya mpaka Ubetheli, nkayaaphiya vakittu vaathenke aya nihema katashi valhe, iriyari yo Ubetheli ni Uayi, 4 vakittu vaapachenre aya uthatha malhuku utheka madhubahu. Vavawo Naabramu nkayaalhapelha wo uromolha nchina na Apwiiya Nlhuku. 5 Tho, Nalutu yaattukanne Naabramu ni ayo yahanaa ikhondoro ni mihuwo chinchi ni maheema. 6 Ihesabu yo mihuwo chaya chiyo aari yulhupalhe chinene, ata ilhapo iyo khayaathonshe Naabramu ni Nalutu wiira ukhalhiye vamoka. 7 Paahi ashunga a Naabramu ni ashunga a Nalutu yahaanacha indewo. Yeyo ikatema iyo attu o Ukanaani ni attu o Uperizi phi aari anenchi o yeyo ilhapo iyo.

8 Paahi Naabramu nkayeerelha Nalutu, "Uhikhalhe mwaha wo uhiiwanana naashineneru ni mena munlhokoni mwa ashunga aka ni ashunga inyu, ukhalhawaya hii attu o uyaraana. 9 Mmweheke ilhapo yonkhaye irii uhoolho winyu iyo. Nimwalhaaneke etu. Inyuva mwarwaakaru wiimushi mii kinoorwa wimonono, inyu mwarwaaka wiimonono mii kinoorwa wiimushi."

10 Nalutu nkayaapathusha miitho aya, nkayoona nikoote nonkhaye no mwolhoko wo Uyorodani, nkayoona wiira naari no maashi menchi kila vakittu thoko imata ya Apwiiya Nlhuku, thoko ilhapo yo Umisri nthelha wo Usoari. Vavawo aari Apwiiya Nlhuku ahinaya ulhakalhiha iwani cho Usodoma ni Ugomora. 11 Paahi etu Nalutu nkayaathanlha nikoote no mwolhoko wo Uyorodani nonkhaye, nkayaalhukama unosha nchuwa, paahi nkawamwalhaaniya. 12 Naabramu nkayaahalha Ukanaani ni Nalutu nkayaakhalha waari iwani cho umakoteni, nkayaathamelha Usodoma. 13 Nansho attu o Usodoma aari attu o uwonya ni attu o upanga chittu cho uhilhoka umihoolho wa Apwiiya Nlhuku.

14 Baada yo Nalutu umwalhaana ni Naabramu, Apwiiya Nlhuku yaheerelha Naabramu, "Mpathusheke miitho inyu toka vari inyu vawo mmweheke ilhapo yonkhaye, nthelha wo uchulhu ni uchawa, unosha nchuwa ni uneelha nchuwa. 15 Kinouvahani inyuva ilhapo yonkhaye inoona inyu iyo, vamoka ni iyari inyu ikhalhe yawinyu mahuku o uhimalha. 16 Kinoowa kaapanga achishaana inyu ukhalha enchi ahinooria waalhakelhiya, thoko chiri aya ntukurukhu no velhaponi chihinooria aya waalhakelhiya. Phi chiichammo etu chinohalha aya ukhalha iyari inyu! 17 Paahi etu munkweke, nrweeke mweetakacheke ilhapo ilha yonkhaye, wo makhuvi ni wo urekama, ukhalhawaya phi nohalha aka uvahani inyuva." 18 Paahi etu Naabramu yahokhulha nihema naya, nkayaarwaa ukhalhani vakhiviru ni miri chulhupalhe cho Mamre, Uhebroni ulhe, wowo nkayaathatha malhuku wathekelha Apwiiya Nlhuku madhubahu.