1 Apwiiya Nlhuku nkayeerelha Anuhu wiira, "Nkelheke nsafinani ni iwani inyu yonkhaye, ukhalhawaya munlhokoni mwa attu onkhaye arii velhaponi va, inyu vekha inyu phi nopanga moorera. 2 Mwaakusheke ashinama anolhoka ukumihiya isadaka o kila nikosho, nthiyana ni nlhopwana saba saba. Nansho ahinolhoka ukumihiya isadaka ayo mwaakusheke elhi elhi, nthiyana ni nlhopwana o kila nikosho. 3 Tho mwaakusheke ashinuni nlhopwana ni nthiyana o kila nikosho saba saba. Mpangeke chiicho wiira mwaashungehe akhalhe akumi velhaponi va. 4 Ukhalhawaya aviraka mahuku saba uchokholha lhelho va, kinowa kaarupiha ipulha mahuku makhumi macheshe wo uhitondova uthana ni uhiyu, kilhakalhihe ittu ikumi kuupilhe aka." 5 Anuhu nkayaapanga kila ittu thoko chaalheheriye aya ni Apwiiya Nlhuku.

6 Anuhu aari ntu o malhipa o iyaakha mia sita niwambwe vaakhumelhenlhe aya velhaponi va. 7 Anuhu anene vamoka ni ahanu aya ni achishaana aya ni manyaahanu aya yahokelhacha nsafinani wiichookholha niwambwe. 8 Tho ashinama anolhoka ukumihiya isadaka ni ahinolhoka ukumihiya isadaka ni ashinuni ni ashimweettu o wiipurulha, o kila nikosho, 9 ahokushachiya nsafinani mwa Anuhu, elhi elhi thoko Nlhuku chaalhehenre awe. 10 Mahuku saba avireke, maashi o niwambwe nkayaawa velhaponi.

11 Anuhu vaari aya ni iyaakha imia sita, nihuku no khumi ni saba no mweeri wo nayelhi, nenno nihuku nno, milhiwi chonkhaye cho maashi o wuuthi ilhapo chahotiuwa, irimu nkayaattukuwa, 12 ipulha nkayaarupa velhaponi wo mahuku makhumi macheshe, uthana ni uhiyu. 13 Nenno nihuku vaarupa aya ipulha nno, Anuhu ni ahanu aya ni achishaana aya araru Nashemu, Nahamu ni Ayafeti ni manyaahanu aya, yahokelha nsafinani. 14 Ahokelha ashinene ayo vamoka ni kila nikosho no ashinama anohuwiya ni o mwiithuphini, ashimweettu o wiipurulha ni ashinuni o kila nikosho. 15 O wuupiya elhi elhi o kila nikosho aari ni iphumu yo ukumi, ahokelha nsafinani mwa Anuhu, 16 nlhopwana ni nthiyana thoko Nlhuku chaalhehenre awe Anuhu. Apwiiya nkayaattia nlhako wo isafina Anuhu vaakenlhe aya.

17 Niwambwe nkanaalhokelha mahuku makhumi macheshe ni maashi nkaachara ni uphembiha isafina vachulhu maashi. 18 Maashi nkaathepa uchara chinene velhaponi, isafina nkayaaphemba vachulhu chinene. 19 Maashi ayo aari menchi chinene velhaponi, nkayaakhuneelha miako cho urekama chonkhaye cho velhaponi va, 20 eiyo, mpaka vachulhu miako, imeta saba ni nusu vachulhu. 21 Kila ittu ikumi velhaponi va yahokhwa. Ashinuni, ashinama o uhuwiya, ashinama o mwiithuphini, kila yo wiipurulha vamoka ni attu onkhaye. 22 Eiyo, kila ittu ikumi vachulhu ilhapo va yahokhwa. 23 Apwiiya yaheeva kila ittu ikumi vachulhu ilhapo, attu ni ashinama ni ashinuni. Aahanlhe aari Anuhu ni onkhaye aari vamoka ni ayo nsafinani. 24 Maashi ayo ahoolhokelha wo uhiwelhelha, wo mahuku imia imoka ni makhumi nthanu.