1 Ikuruna nkayaathepa chinene mwiilhaponi Ukanaani. 2 Baada yo umalha choolhia chaathumme aya Umisri chilhe, Nayakhobo yaheerelha achishaana aya, "Nrweeke tho Umisri mwanithumelhe choolhia chikina vakani."

3 Nansho Nayuda nkayeerelha athumwanaya, "Ntu ulhe ahonaamuka chinene, eeraka, ‘Akinoupocherani tho mwaahiweeke ni mwanhima inyu mwankani.’ 4 Mwarumelhelhaka etu univaha nhima ihu mwankani uyo wiira ninttukane, ninoorwaa uthumelhani choolhia etu. 5 Nansho mwaahittuneke wiira ninttukane, khaninorwaa wowo, ukhalhawaya ntu ulhe aaniirenlhe wiira, ‘Khannokoona mwaahimmwaaneke mwanhima inyu mwankani uyo.’ " 6 Nayakhobo nkayaakoha, "Nlhatuni no ukihelha ihuzuni wo unhimeria ntu uyo wiira nhanaa mwanhima inyu nkina?"

7 Nkayaakhulha, "Ntu ulhe ahonikohakoha rata mwaha unonaacha hii ni ashilhoko ihu, eeraka, ‘Chani, athumwaninyu akumi nanlhelho? Chani, nhanaa mwanhima inyu nkina?’ Paahi naamwakhunlhe thoko chenre awe wo unikoha. Vavawo nikonrie chani etu uchuwelha wiira aanoniirelha, ‘Mwammwiiheke mwanhima inyu’?"

8 Nayuda nkayeerelha athumwanaya, "Nkihiyeke mii kinttukane, nirwee wowo nathume choolhia, nihiwe naakhwa ithalha vamoka ni inyu ni achishaana ihu. 9 Mii kimwanene kinoomwemelhelha. Kahinhokolhosheke nkamwaamwoona, paahi etu unyoholhiya uwo ukhalheke wawaka, mahuku onkhaye o uhimalha. 10 Yakaari khanaapinche, naari ninarwelhe mikwaha milhi ni uhokolhia."

11 Vavawo Nayakhobo, nkayeera, "Haya! Ukhalhawaya ihokhalha ilazima yiirie chiicho, paahi etu munkushereke izawadi yo chittu chorera cho mwiilhaponi mwihu mu. Nkusheke makhura o mmwepa vakani, urawo vakani, ubani, manemane, ikungu ni ilozi, munrwehelheke.

12 "Nkusheke nchurukhu wo uthumelha choolhia, tho nhilhiyalhe uhokolhosha nchurukhu mweesheriye inyu mmajuniyani mwinyu ulhe, veekinaka mweesheriye mwommo wo ukoseriya. 13 Munkusheke ni nhima inyu uyo, nrweeke wa yoyo ntu uyo.

14 "Nlhuku ri O Machiri, ovaherekeni mwoonelhiye ikiriri umihoolho wa yoyo ntu uyo, wiira anhiyerere mwanhima inyu nkina ulhe, vamoka ni Benyamini, ahokolhiache vamoka ni inyu mwaatti. Ukhalhawaya kaapoterihaka, baasi kihaapoteriha."

15 Vavawo nkayaakushacha izawadi chilhe ni nchurukhu mikwaha milhi, wiira ahokolhoshe ni nkina weesheriye aya mmajuniyani mwaya katashi valhe. Nkayaarwaa Umisri vamoka ni nhimaya, Benyamini. Vaaphilhe aya, ahorwaa ni wiichooniha umihoolho wa Nayusufu. 16 Nayusufu vaamwonne aya Benyamini nari vamoka ni manyaattu ayo, ahomwiirelha ntu owemelhelha inupa aya wiira, "Mwaarweeheke alha manyaattu alha unupani waka, mwanhitheke mwannama mmoka, mwaapieke yolhia yoombone. Ukhalhawaya lhelho kinothanana ulhia yolhia ni alha manyaattu alha." 17 Ntu owemelhelha inupa uyo nkaapanga thoko chaalheheriye awe, nkaarweehacha alheto alhe unupani wa Nayusufu.

18 Manyaattu ayo vaarwehiya aya unupani wa Nayusufu, ahokelhiya woova, nkayolhumacha ashineneru, "Niwiihiye wono wo nlhatu wo nchurukhu waahokolhosheriye ihu mmajuniyani mwihu nkwaha wo upacha ulhe, wiira apatte nlhatu wo uniithelha anaatakache ni unithurulha iphuta chihu, nikhalhe ipotta chaya." 19 Paahi etu nkaayarwa wa ntu owemelhelha inupa ya Nayusufu ulhe, nkayaamulhumana vaakelha aya vawani vawo, 20 nkayaamwiirelha, "Munna! Hii nahowa va nkwaha wo upacha uthumani choolhia. 21 Vaaphilhe ihu nipuro naarupenlhe ihu mphironi mmo, nahothaphulha majuniya ihu, nkanaashanga woona nchurukhu wo kila mmoka ihu unari nhina vachulhu nsigo awe, thoko chaari aya vaalhinve awe. Vano etu, nihowaana nchurukhu uyo wiira nihokolhoshe. 22 Nihowaana ni nchurukhu nkina wiira nithume choolhia. Khanichuwenlhe mpani etu aneeshenre nchurukhu uyo mmajuniyani mwihu mmo."

23 Ntu owemelhelha inupa ulhe nkaakhulha, "Nhikelhiye nipampa, wala nhoove. Veekinaka Nlhuku inyu, Nlhuku a athumwaninyu, phi uyo ohokolhoshenreni nchurukhu mmajuniyani mwinyu. Mii kahopochera nchurukhu inyu." Nkammwiiha Simeoni, munnaya.

24 Ntu owemelhelha inupa uyo nkaakharibisha unupani wa Nayusufu, nkaavacha maashi o ukhucha mmietoni, ni ulhiha iphuta chaya. 25 Manyaattu ayo nkayaakumihacha izawadi chaya weesha tayari waavaha Nayusufu, ukhalhawaya yaheewa wiira, anowa ulhia yolhia vamoka ni ayo.

26 Nayusufu vaahokolhelhe aya uwani, manyaattu ayo ahokushacha izawadi chaya chilhe, nkayaakhoromelhacha. 27 Nayusufu nkaakohacha, tho ni waakoha, "Chani athumwaninyu anowungwelhelha? Akumi nanlhelho?"

28 Nkayaakhulhacha, "Eiyo, namitheko inyu, athumwanihu, anowungwelhelha, akumi nanlhelho." Nkayaakhoromacha tho.

29 Nayusufu vennuwilhe aya miitho aya ni umwoona nhima aya, Benyamini, yarelhe wa anumwanaya amoka, nkayeera, "Ulha phi nhima inyu mwankani mwanhimianche inyu?" Ahinaya waakhulhiya, nkayeera, "Nlhuku ovahere mwamunnaka!" 30 Wo uhikhulhuvelhiya, Nayusufu ahothama vavawo vakittu vawo, kwaani miithori chaari chaamoraka wo nlhatu wo umwoona nhima aya, nkayaakelha uchumbani waya ni wichunlhelha. 31 Baada yo ukhucha wiitho, nkayaakhuma ekayaka, nkayaalhehera yolhia iwiihiye. 32 Nayusufu nkayeesheriya yolhia vekha aya, ni ashunnaya nkayeesheriya wo vekha aya. Tho ni attu o Umisri yaari vavawo ayo nkayesheriya wo vekha aya, kwani attu o Umisri khayaari alhiaka yolhia vamoka ni Aebraniya.

33 Ashunnaya Nayusufu nkayaakhalhihachiya umihoolho wa Nayusufu wo uttwarana iyaakha chaya, uchokholha o upacha mpaka o ittiako. Nkayaahalha awehanachaka, anashangilhe. 34 Yolhia nkayaakawiya ukhuma vamezani wa Nayusufu ni urwehelhiya manyaattu ayo, nansho Benyamini aavahiye mikwaha nthanu upwaha chaavahiye aya manyonnawe. Paahi etu, nkawaawuriya ni ushangarariya vamoka.