1 Yamalhekeru, Nayusufu nkayanlhehera namitheko owemelhelha inupa aya wiira, "Nchariheke majuniya a alha attu alha choolhia chinohalha aya wooria ukusha. Mwamalhaka, nhelheke nchurukhu umalhakuni wo majuniya o kila mmoka. 2 Vachulhu nsigo wa mwankani chinene uyo, mweesheke ikikombe aka ikooroshiye wo isiliva, vamoka ni nchurukhu awe." Ni uyo nkaapanga thoko chilheheriye awe ni Nayusufu. 3 Washeekeru, nkayaalhehachiya wiira athamache vamoka ni iphuta chaya. 4 Vaari aya mphironi aneetilhe vakani uthama vawani vawo, Nayusufu ahomwiirelha ntu owemelhelha inupa aya ulhe wiira, "Mwaakuvie! Mwaattware attu alhe, mwaaaphwanyaka mwaakoheke, ‘Chani woonaka moombone mpangelhiye inyu ayo nnolhivihera wo upanga chittu cho uhilhoka? 5 Nlhatuni etu no wiiya ikikombe ya anene ilhapo? Ikikombe inowureria aya, ni ikatema ikina anomoopelha aya nttiti? Vavawo mwaatti nhopanga ittu yo unanara chinene!’ "

6 Ntu owemelhelha inupa ulhe nkaattwara. Vaaphwannye awe, nkoolhumacha malhove thoko chaahimeriye awe. 7 Nansho manyaattu ayo nkayaakoha, "Munna, nri ni maana ani unulhumachera yayo malhove ayo? Hii anamitheko inyu va, khaninoria mena upanga ittu thoko yeyo! 8 Muupuwelheke wiira, nahouhokolhosherani nchurukhu waaphwannye ihu Ukanaani, mmajuniyani mwihu ulhe. Inohalha wooria chani wiira niiye isiliva ama idhahabu unupani wa anene ilhapo inyu ayo? 9 Paahi etu mwamphwanyaka mmoka ihu ni ikikombe iyo, eeviyeke, ni hii onkhaye akina va, nikhalheke ipotta chinyu."

10 Ntu owemelhelha inupa uyo nkaakhulha, "Aye, ikhalheke etu thoko chinre inyu wo wulhumacha chiyo. Ntu riyoothe nohalha uphwanyiya nakunshe ikikombe iyo, nookhalha ipotta aka, nansho akina khannokhalha ni nlhatu uwannyaka." 11 Paahi etu kila mmoka nkaakuvia ukurusha nsigo awe vathi ni uthaphulha. 12 Ntu owemelhelha inupa ulhe nkaakukhuriacha majuniya onkhaye, achokholhaka wa mulhupalhe aya ni umalhihera wa mwankani chinene uyo. Ikikombe nkayaaphwanyiya munsigoni mwa Benyamini. 13 Vavawo nkayaahulhacha ikuwo chaya wo nlhatu no ukelhiya ihuzuni. Kila mmoka nkaawelhiha nsigo awe vachulhu iphuta awe, nkayaahokolhia tho vawani.

14 Nayuda ni achihimaya nkayaaphiya unupani wa Nayusufu, ni Nayusufu yaari bado vanupani waya vawo. Vaaphiyanche aya, yahokhoromacha mpaka vathi, waakhoromelha Nayusufu. 15 Nayusufu nkayaakoha, "Mpanngeni mwaatti? Khanchuwenlhe wiira ntu thoko mii kinowooria ulhohera chittu?"

16 Nayuda nkayaakhulha, "Naakhulheke ittu yaani munna? Nulhumacheke nlhove naani no wooniha wiira khanittenke? Nlhuku hopatakulha milhatu chihu cho uwonya, hii anamitheko inyu va. Vano hii onkhaye va nihokhalha ipotta chinyu, hii vamoka ni ntu phwanyiye ni ikikombe inyu uyo."

17 Nansho Nayusufu nkayeera, "Mena! Mii akinooria upanga chiicho. Ntu phwanyiye ni ikikombe aka uyo, phi yoyo nohalha ukhalha ipotta aka. Inyu mwaatti onkhaye va, nhokolhiacheke wo mpuha wa athumwaninyu."

18 Phi vavawo Nayuda vaarwelhe aya ni waatameria Nayusufu ni weerelha, "Munna, kinoulhepelhani wiira nkihiyeke mii namitheko inyu kulhumache malhove vakani o wiivaranga, kinoulhepelhani wiira nhikithunalhelhe, kwaani inyuva nri thoko Nafarao anene ayo. 19 Munna, inyuva mwahonikoha yakhalhaka wiira nihanaa athumwanihu ama achihima ihu, 20 ni hii nkanouhimeriani wiira nihanaa athumwanihu, ni ayo o wulhuvalha chinene, ni uhimeriani wiira nihanaa mwanhima ihu nkina mwankani yarelhe ikatema athumwanihu anolhuvanlhe. Munnawe yoyo mmirawo uyo horimelha khalhayi, ni yoyo mwankani uyo phi halhenlhe vekha awe wa anumwanawe, ni athumwanihu ayo yoyo phi nonttuna aya chinene. 21 Ni inyu munna, mwahonilhehera hii anamitheko inyu wiira, nimmwiihe nhima ihu uyo mmwoone. 22 Nkanouhimeriani wiira, yoyo mwammirawo uyo khanooria uthama waahiya athumwanawe, athamaka, athumwanawe ayo anokhwa. 23 Nansho inyuva munna nkamwaanirelha wiira, naahiweeke ni mwanhima ihu mwankani uyo, khannonipochera tho.

24 "Vaahokolhelhe ihu uwani wa namitheko inyu, athumwanihu, nahaahimeria chenre inyu wo unilhehera. 25 Kaanyuma etu, vaanirenlhe aya wiira niwe uno tho, niwe naathuma choolhia, 26 naheerelha wiira, ‘Khaninooria uwa uno, naahinttukaneke mwanhima ihu mwankani uyo, inyuva khannowa mwaanipochera.’ 27 Paahi namitheko inyu, athumwanihu, nkayaanirelha, ‘Nhochuwelha wiira, ahanu aka Naraheli aakiyarenlhe achishaana elhi ashilhopwana, 28 mmoka ahopotera, ni mii nkakeera, veekinaka hopapharulhiya ni nshene, ukhalhawaya akimwonne tho. 29 Mwankushaka ni ulha ni wowo athuriyaka, ihuzuni inohalha ukipatta iyo, nnokiwuhelha kinolhuvanlhe thoko chiri aka.’

30 "Paahi etu munna, ukumi aya uri mmathathani mwa ulha mwammirawo ulha. Kahokolhiaka etu wa namitheko inyu, athumwanaka, kinanhilhe ulha uno, 31 yaahimwooneke ninanttukanne, anookhwa! Paahi etu hii anamitheko inyu ninowauhelha athumwanihu ayo wo nlhatu no ihuzuni inohalha waapatta iyo.

32 "Wo uthepa vavawo, mii kimwanene va, kaheekumiha wa athumwanaka wiira kinomwinanelha mmirawo ulha kiiraka, ‘Kaahinhokolhosheke Benyamini uwannyu, milhatu chikikhalhelheke mii, mahuku onkhaye o uhimalha.’ 33 Vano munna, kinoushontelhelhani wiira, mii kihalheke va, kikhalheke ipotta inyu vanipuroni vawe vawo. Munhiyeke uyo arwee ahokolhie uwani vamoka ni manyonnawe ayo. 34 Ukhalhawaya kinohalha wooria chani uhokolhia wa athumwanaka kihinttukanne mmirawo ulha? Akinooria uvilhelha woona ittu yo uhilhoka inohalha waaphwanya athumwanaka iyo."