Gênesis 17

3 Vavawo Naabramu nkayaawulhuwa makukhu. Apwiiya Nlhuku nkayeera, 4 "Alha phi malhehano aneesha aka ni inyu. Nnowa ukhalha athumwanaya attu o makosho menchi, 5 ni toka vano nna, khanneehaniya tho Abramu nansho nnohalha wiihaniya, Aburahimu. Ukhalhawaya kihoopangani ukhalha athumwanaya attu o makosho menchi. 6 Kinouvahani iyari yinchi chinene, uwaninyu anowa ukhuma makosho menchi ni akina anowa ukhalha mamwene."

7 "Kinooshunga malhehano aka ukhalha o mahuku o uhimalha, iyari inyu ni iyari chaya chonkhaye, tho kinookhalha Nlhuku inyu ni Nlhuku o iyari chinyu mahuku o uhimalha. 8 Kinouvahani inyuva ni iyari inyu, ilha ilhapo inokhalha inyu thoko nlheto ilha, yaani ilhapo yo Kanaani ikhalhe yawinyu mahuku o uhimalha. Ni mii kinookhalha Nlhuku aya."

9 Yamalhekeru, Apwiiya Nlhuku nkayeerelha Aburahimu, "Ni inyu, nnoovarelha malhehano aka mwaanene, iyari inyu ni iyari chaya chonkhaye. 10 Malhehano aka, anohalha inyu uvarelha inyuva ni iyari inyu phi alha. Kila nlhopwana munlhokoni mwinyu hothananiya lazima eenelhiye unyawo. 11 Nnowiinelhiya unyawo ukhalha phi iphiro yo wooniha malhehano variyari aka mii ni inyu mwaatti.