Gênesis 6

Uwonya wa attu

1 Attu vaachokholha aya wunchereria velhaponi ni achishaana ashithiyana ayaariachaka, 2 ashaana ashilhopwana o wiirimu yahoona wiira yayo achishaana ashithiyana ayo aari oreracha, nkaayaakushacha alhe yaattuna aya ukhalha manyaahanu aya. 3 Apwiiya Nlhuku nkayeera, "Akinaahiyerera attu wiira alhokelhe wo mahuku o uhimalha, ukhalhawaya ari o ukhwa. Paahi khanolhokelha ukumi umpwaha iyaakha mia imoka ni makhumi melhi." 4 Yayo mahuku ayo, tho ni upwaha vavawo, ahokhalhacha attu o machusha molhupalhe chinene velhaponi, yeehaniya Anefili. Yaari iyari yo minepa o wiirimu ni manyaathiyana o velhaponi. Yayo phi aari attu o machiri, aashipiya mahuku menchi avinre ayo.

5 Apwiiya Nlhuku vonne aya attu o velhaponi cheera aya wo uwonya ni chittu chinoopuwelha aya chikhalhaka cho uhilhoka mahuku onkhaye, 6 ahochukulha munrimani chinene oonaka mbaya ahikoopilhe velhaponi va. Nkayeera, 7 "Kinowaalhakalhiha attu koupilhe aka ukhuma velhaponi va, kinowaakukhulhacha attu vamoka ni ashinama, ashimweettu aneeta wo wiipurulha ni ashinuni o wiirimu. Ukhalhawaya kihochukulha wiira mbaya kihikoupilhe." 8 Nansho Anuhu ahorumelhelhiya ni Apwiiya Nlhuku.

Anuhu anokoorosha isafina

9 Ulha phi mwaha unaacha Anuhu, ntu aatelhinhe Apwiiya Nlhuku, ntu o uhikhuwachiya o vekha awe o yayo mahuku ayo, tho aari ntu anthimicha Nlhuku.