YOB 33

1 "Yob, kafɔɔ nunua nu sɛlaa nii;

kyɔɔ atoko faanu lɛsaa biala kobuɛ ni.

2 Nfɛ kamabɛ kanya nii;

sɛlaa nii ntika di ɔkplalomii nii ɔnya.

3 Sɛlaa nii lekye otu wɔ niɛkpa ni kamɛ;

anyasibi nii kobuɛ onukwale wɔ n-ye nii.

4 Yaa Ninwuna niɛbla mi;

Nnwɔ Ninlenke ni owiidi niɛtɛɛ nkpa.

5 Diki ɔlaa nii kanya nfɛ, nse fabafuo;

lolaa suoto, faakyɔɔ mi anu.

6 Ote nte fɛle afɔ okle di Yaa anu;

ami kafɔɔ kɔtɛ kamɛ beediki mi beekyeko.

7 Tanta ami ɔyɛkɛ lakpee fɔ difu,

ee kɔnɛɛ nii lawɛ onutũ di suoto lɛfɔ.

8 "Kafɔɔ fatoobuɛ di atoko nii-

ntoonu sɛlaa nwu nwaa-

9 ‘Lɛkpa kɔmɛ di okpile kuonwii nnaa ni di suoto nii;

lɛbla klekle di lɛkpɔnɔfɔ nnaa mi di suoto.

10 Kafɔɔ Yaa lɛwɛ ɔlaa di suoto nii;

ɛɛnyɛɛ fɛ lo nɔɔ.

11 Eekpee sɛkpɛnkyɛ di nkpaa nii;

ɛɛtɛ anu oonyu nfenkɔ nii mmuu.’

12 "Kafɔɔ kɔtɔkɔ fɔ nlɛ, di nle mmle, ole fɔ nnaa,

diekye Yaa lɛmuɔ alenke otii.

13 Obe oso fɔɔka ɔlaa fantika nwɔ,

falɛ anndiki kanya di otii sɛlaa kusinwii suoto?

14 Diekye Yaa nkakatɛ- miɛ osuku wɔ, kɔsɛɛ ɔbamba-

nu di otii nintofo.

15 Di kakyɛ kɔlaafɔ ku odiki otuo kamɛ,

di obe wɔ di batii mbuo ni di sɛkyɔsĩ kplɛ kamɛ

bate bɔɔkɔnɔnɔ ni di atensaa lɛma suoto,

16 Yaa nkakatɛ ankpee di atoko lɛma,

anyɛkɛsa ma ku sɛlaa osĩ ɔta,

17 alɛ oomunikĩisa otii di okpile ɔbla kamɛ,

amblasa nwɔ di lɛkanta suoto,

18 alɛ oofũ ɔkla nɔɔ di dibiɔ nnɛɛ,

nkpa nɔɔ di kukpi kapamii suoto.

19 Ee anta otii nka di atensaa suoto ku dibuo,

di akufi nɔɔ ntoonunuu nwɔ ni obe lele,

20 oso alesaa ninsinklee nwɔ ɔkɔnsɔ,

ɔklà nɔɔ kafɔɔ nkyidisɔɔ alɛsaa finle.

21 Anklee ankoso wakalaa,

akufi nɔɔ ya kafɔɔ batatɔɔnya ni nfɛ nte kaayi.

22 Ɔklà nɔɔ ntɛɛtɛɛ dibiɔ,

nkpa nɔɔ kafɔɔ anta kukpi batɔkyɛntɛ.

23 Kafɔɔ nse tɔkyɛntɛ nkpe di kakyɛ nɔɔ

fɛ kpanaatɛ, onwii di kakpe kamɛ,

ɛɛbatɔkɔ otii lɛsaa le ninlɛ diɛtɔɔ nii,

24 alɛ oole nwɔ sibualɛ, eebuɛ alɛ,

‘Diki nwɔ fakyeko dibiɔ ɔkya kamɛ;

ntɔɔwɛ koto kamata ntɔɔ’ yi-

25 ni babase suoto nɔɔ sina lɛbla fɛle obisɔ sele;

manse sĩ lɛbla fɛ sekosopo nɔɔ obe kamɛ.

26 Ampɛ ɔlaa anta Yaa, anle nwɔ sibualɛ,

annya Yaa anu, ayiisa suoto lɛyɔɔ kudu;

Yaa nkplesa nwɔ anse di katininikɔ nɔɔ.

27 Nse atɔɔwa ɛɛbatɔkɔ batii alɛ,

‘Labla okpile, lasĩ ɔlaa wɔ niale ni onukwale,

kafɔɔ ntawɛ lɛsaa le niasiɛko mi nii.

28 Yaa lediki ɔklà nii eekyeko osoo ɔkyɛ dibiɔ kamɛ,

nioso kamasiɛ nkpa nin-nya lɛkpa nwu.’

29 "Yaa mbla asaa ya mmle amuu anta otii-

sɛnyɔ, bia sitiɛ-

30 alɛ oodiki ɔklà nɔɔ di dibiɔ kamɛ,

alɛ nkpa lɛkpa kakpa ninkpete nwɔ.

31 "Yob, kyɔɔ atoko, faanu mi ɔlaa;

lokanana, kamakakatɛ.

32 Nse fakpe ɔlaa fababuɛ, faadiki kanya;

kakatɛ, diekye komiɛ nlɛ bata fɔ lɛbɛ.

33 Kafɔɔ nse fanaa ɔlaa, ni kyɔɔ mi atoko;

lokananana, ni kamatuo fɔ ninumbe."