YOB 8

Bildad Lɛkakatɛ Kasale

1 Ninfɛ di Bildad, Suhi otii nwu ladiki kanya alɛ:

2 "Ɔmɛmbe fababuɛ sɛlaa se mmle faanaase?

Sɛlaa lɛfɔ nwu nle kɔfɛɛfɔ kplɛ.

3 Yaa mmunikĩisa ɔlaa wɔ ninkpe ni anfuusa?

Nnwɔ Ninlenke ni mmunikĩisa ɔlaa wɔ ninte ni nkpo anfuusa?

4 Nse babi lɛfɔ lɛbla okpile di suoto nɔɔ,

an-nanfi ma kootoko di okpile lɛma nwu kanya.

5 Kafɔɔ nse afɔ fabawolaa Yaa,

fantikiti Nnwɔ Ninlenke ni lekoto,

6 nse feeklekle, fate tinini yi,

ni bia kanunua abataka an-nyu fɔ

ankplesa fɔ anse di kayilakɔ biene lɛfɔ.

7 Kuntɛ kasɔkakyekɔ lɛfɔ kamate buɛɛ yi,

nkpo di lɛlɛ lɛfɔ di dii kaama kamate nɛ.

8 "Kaalɛ ana ya nintɔbafe ni,

faawolaa kamɛ di lɛsaa le di bate lɛma latekete ni,

9 diekye kɔsa lete baalofo wo, buoye lɛsalɛsaa kafɔɔ,

ayi loo di kasɔ suoto kafɔɔ nte fɛle kunyii.

10 Blɔbatuo fɔ asaa, baatɔkɔ fɔ kafɔɔ?

Blɔbadiki lɛsaatofo lɛma sɛlaa babuɛ?

11 Lɛkpɛnyi kafuo ɔlɛ nwaa di lɛba le ninambuu ni?

Lɛnwaakɛ kafuo oyila nse ntu nnaa?

12 Di obe wɔ eekple ayɛ manadibudi nya nii,

an-yɔɔ wla anlenkee sɛfa bule.

13 Nkpo di mba bamuu nieyee ni Yaa nkpa nte nɛ;

nkpo di mba ninan-ye ni Yaa osuku onyu kamayu nɛ.

14 Lɛsaa le eetika ni disi lɛbla kpiɛkpiɛ;

nle oonyu osuku anta ni nle kukuɛmaa.

15 Ankpɛ di kɔmaa nɔɔ suoto, kafɔɔ kunnyila;

ansaka ninkũ suoto, kafɔɔ kunnfuo nwɔ omufũ oklee.

16 Ate fɛle ɔfa wɔ beekpete ni ntu nwaa di kufĩ kamɛ,

di sɛnya nikũ nfukuti sintĩi ni kɔba;

17 sidu nikũ mmimini di afuɔ dikudi suoto,

am-miɛ lɛba kafɔɔ di afuɔ kamɛ.

18 Kafɔɔ nse diɛkpá di lɛba nini,

lɛba nwu n-sĩ ni, nimbuɛ alɛ, ‘Diidii ntanya fɔ.’

19 Nwaako nkpa nini n-yɛ,

sɛfa bamba nyila di kɔtɛ nwu suoto.

20 "Nwaako Yaa ninsĩ otii wɔ ninaa ni ole kuonwii

ee akpee sikpilebablatɛ nnɛɛ osie.

21 Nfɛ abata kanya lɛfɔ n-yii ku sɛma,

anyasibi lɛfɔ kafɔɔ ku suoto lɛyɔɔ kudu.

22 Babakpee balo lɛfɔ sinunsɔ,

bakpiletɛ akpaayo kafɔɔ dilɔbasinwɛ."