Jó 11

Sofa Lɛkakatɛ Kasale

1 Ninfɛ di Sofa, Naama otii nwu ladiki kanya alɛ:

2 "Ni sɛlaa se mmle simuu sidie alɛ balaadiki kanya?

Ni babata kakatɛtɛ wɔ mmle lɛbɛ?

3 Lɛkakatɛ fukuti lɛfɔ le mmle kamata batii nlo kanana?

Otii kuonwii dilɔbasĩ ɔlaa ata fɔ nse fɔɔma otii?

4 Fantɔkɔ Yaa falɛ, ‘Ofũ onu nii nnaa ole kuonwii

lɛkpa kafɔɔ di anu lɛfɔ.’

5 Oo, nse fɛle Yaa akakatɛ,

alɛ aabɛ anyasibi nɔɔ di suoto lɛfɔ,

6 andiki awofasaa kamɛ ninumbe anta fɔ,

diekye onukwale ninumbe nkpe nkyɛ nnyɔ.

Tofo nle mmle falɛ: Bia Yaa ntooyee sikpile lɛfɔ sewo.

7 "Fabafuo Yaa sɛlaa kyofole kamɛ owolaa?

Fabafuo Nnwɔ Ninlenke ni kasekɔ owolaa?

8 Bɛɛtaka katoo balenke osi- obe fabafuo ɔbla?

Beekyofo balenke ɔkya lekyofo- obe faafuo otofo?

9 Ɔklapoosa ninya lɛkaana alenke kasɔ

ɛɛblɛfɛ kafɔɔ alenke lekpo.

10 "Nse Yaa lɛwa ɛɛbatɛ fɔ di leyo katenkɔ

ɛɛkpaa fɔ kakankɔ, owe nimayila nwɔ di suoto?

11 Nwaako aye bakyɔnkyɔtɛ;

ni nse ɛɛnya okpile, alɔbatofo nwu ole?

12 Kafɔɔ buutɛ dilɔbasimbe anu

alenkee, nse beelofo kuɔ dibi fɛ otii.

13 "Kafɔɔ nse fɛɛyɔ otu lɛfɔ fɛɛtɔɔ,

fɛɛblɛfɛsa nnɛɛ lɛfɔ fɛɛtɔɔ,

14 nse feediɛ sikpile se ninsi fɔ ni ninnɛɛ,

fananta dikpilesaa kuninwii disiɛ di lɛkpaayo lɛfɔ kamɛ yi,

15 ni fabatakatɛsa anu lɛfɔ katoo di sinunsɔ dilɔbakpɛ fɔ nii;

fabayila kpinkpĩ fanamayɛkɛ nii.

16 Nwaako fabayee dibuo lɛfɔ,

fabanyuma ni fɛ ntu niɛbafe.

17 Nkpa lɛfɔ kamakpa ninlenkee kakũ kplamatãa,

ditunu kafɔɔ kamate fɛle olesɛ.

18 Otu kamate fɔ, diekye osuku onyu nkpe,

fabanyunyu fanfenko, fantɛ ɔnyɛɛ di atoko ɔkyɛ ole kamɛ.

19 Fabaklɛfante, di kuonwii nnaa abayɛkɛsa fɔ nii,

batii kpinwu kamamiɛ sibualɛ lɛfɔ.

20 Kafɔɔ bakpiletɛ anu kamawakasɔ,

blɔbawɛ nfũ babatoso manfe nii;

osuku onyu lɛma kamale kukpi onwuna."