Êxodo 2

ಮೋಶೆನು ಪೈದಾಖ್ಹ್‌

1 ಇನವಾರ್ ಲೇವಿನೊ ಖಾನ್‌ದಾನ್‌ವಾಳೊ ಏಕ್‌ಜ಼ಣೊ ಲೇವಿನು ಖೂಮ್‌ನಿ ಕವಾರಿನ ವ್ಯಹಾಕರ‍್ಯೊ. 2 ಯೊಹೈರಿತೆ ಬೇಜೂನಿ ಹುಯಿನ್ ಪರ್ಖ್ಹಾ ಲಡ್ಕಾನ ಪೈದಾಕರಿ. ಯೊ ಶನ್‌ಗಾರ‍್ನು ಲಡ್ಕುಕರಿ ಮಾಲುಮ್ ಕರಿನ್ ತೀನ್ ಮಹಿನ ಇನ ಲಪಾಡಿರಾಖಿಥಿ. 3 ಹೈರಿತೆನೆ ಇನ ಬಿಜು಼ ಜಾ಼ಖ್ಹತ್ ಆಖ್ಹ್‌ರಾಮ ರಾಖನ ಕೊಹುವಾನಿತೆ, ಖ್ಹರ್ಕಿನ ಪಿಟಾರನ ಪಾಡಿಲಿನ್ ರೇಗ್ಡಿನಿ ಮಾಟಿಬಿ ಗೋಂದ್‌ನ ಲಗಾಡಿನ್ ಲಡ್ಕಾನ ಇನಾಮ ಖ್ಹುವಾಡಿನ್, ನೈಲ್ ನದ್ದಿನ ಕನಾರಿನು ಘಾಖ್ಹ್‌ಮ ಮ್ಹೇಲಿ. 4 ಲಡ್ಕಾನ ಶಾತ್ ಉಷೆಕರಿ ಮಾಲುಮ್‌ ಕರಿಲ್ಯಾವನಖ್ಹಾಜೆ ಯೊ ಲಡ್ಕಾನಿ ಭೇನ್‌ ಜ಼಼ರಾ ದೂರ್ ಭೀರಿಗೈ. 5 ಎತ್ರಾಸ್ಮ ಫರೋಹನಿ ಛೋ಼ರಿ ಪಾಣಿ ನ್ಹೊವಾನ ನೈಲ್ ನದ್ದಿಕನ ಆಯಿ. ಇನಿ ಚಾ಼ಕ್ರಿ ಕರಾವಳಿಯೆ ನದ್ದಿನ ಕನಾರೆನ ಫರ್ತುಫಂಡ್‌ತಿಥಿಯೆ. ಇನೆ ಖ್ಹರ್ಕಿನು ಘಾಖ್ಹ್‌ನು ಪಿಟಾರನ ದೇಖಿನ್ ದಾಸಿನ ಏಕ್‌ಜ಼ಣಿನ ಮೋಕ್ಲಿನ್ ಇನ ಪಡೈ ಮಂಗೈ. 6 ಪಿಟಾರನ ಕಾಡಿನ್ ದೇಖಾನಿ ವಖ್ಹ್‌ತೆ, ಆಹಾ! ರೋವಾಳು ಲಡ್ಕು ಹೈರಿತೆನ ಇನಾಪರ್ ಗೋರ್‌ಹುಯಿನ್ "ಆ ಇಬ್ರಿಯಾನ ಲಡ್ಕವಾಳಮ ಎಕ್ ರ‍್ಹೇವ್ಣು" ಕರಿ ಲಹಿಗಿ. 7 ತದೇಸ್‌ ಲಡ್ಕಾನಿ ಭೇನ್ ಅಯಿನ್ "ಫರೋಹನಿ ಛೋ಼ರಿನ, ತಾರಖ್ಹಾಜೆ ಆ ಲಡ್ಕಾನ ದೂದ್ ಪಿಡೈನ್ ಪಾಳಾನ ಇಬ್ರಿಯ ತಯೇಡಾವ್ಮ ಎಕ್ ದಾದಿನ ಮೇ ಬುಲೈಲಿನ್ ಆವ್‌ಕಿಶು?" ಕರಿಬೋಲಿ. 8 ಫರೋಹನಿ ಛೋ಼ರಿ ಇನ, "ಜಾ಼ ಬುಲೈಲಿನ್ ಆವ್" ಕರಿಬೋಲಿ. ಛೋ಼ಕ್ರಿ ಜೈ಼ನ್ ಲಡ್ಕಾನಿ ಆಯಾನಸ್ ಬುಲೈಲಿನ್ ಆಯ್. 9 ಫರೋಹನಿ ಛೋ಼ರಿ ಲಡ್ಕಾನಿ ಆಯಾನ, "ಆ ಲಡ್ಕಾನ ಪಾಡಿಲಿಜೈ಼ನ್ ಮಾರಖ್ಹಾಜೆ ದೂದ್ ಪಿಡೈನ್ ಪಾಳ್‌ನು. ಮೇ ತುನ ಪಗಾರ್ ದೆವುಸ್‌" ಕರಿಬೋಲಿ. ಯೊ ತಯೇಡಾನೆ ಲಡ್ಕಾನ ಲೀಜೈ಼ನ್ ಪಾಳಿ. 10 ಯೊ ಲಡ್ಕು ಶಾಣು ಹುವಾನಿ ವಖ್ಹ್‌ತೆ ಇನ ಫರೋಹನಿ ಛೋ಼ರಿಕನ ಲೀನ್ಆಯಿ. ಯೊ ಇನ ಛಿಯ್ಯೊ ಹುಯೊ, "ಅನ ಪಾಣಿನ ಮಹಿಥು ಖೇಚಿಕಾಡಿಕರಿ ಇನುನಾಮ್ ಮೋಶೆ*2:10 ಮೋಶೆ ಕತೊ ಪಾಣಿಮಾಥೊ ಖೇಚಾ಼ಯೊಹುಯೊಕರಿ ಇನಿ ಮತ್ಲಬ್" ಕರಿಮ್ಹೇಲಿ.

ಮೋಶೆ ಮಿದ್ಯಾನ್ ದೇಖ್ಹ್‌ನ ಮಿಲೈಗಯೋತೆ

11 ಮೋಶೆ ಶಾಣುಹುವಾನಪರ್, ಶೊಂತ್ ಅದ್ಮಿಕನ ಜೈ಼ನ್ ಇವ್ಣೆ ಫುಗಟ್‌ನು ಕಾಮ್ಕರಿನ್ ಖ್ಹತುಕರ್ಥುತೆ ದೇಖ್ಯೊ. ತದೆ ಈಜಿಪ್ಟ್‌ವಾಳನೆ ಇನ ಶೊಂತ್ ಅದ್ಮಿವ್ ಹುಯಿರ‍್ಹಾತೆ ಏಕ್‌ಜ಼ಣೊ ಇಬ್ರಿಯವಾಳನ ಮಾರಿನಾಖನು ದೇಖ್ಯೊ. 12 ಮೋಶೆ ಹೈಕಡ್ ಹಿಕಡ್ ದೇಖಿನ್ ಕೋಣ್ಬಿ ಕೊಯ್ನಿಕರಿ ಮಾಲಮ್‌ಕರಿನ್ ಯೊ ಈಜಿಪ್ಟ್‌ವಾಳನ ಮಾರಿನಾಖಿನ್ ಇನ ಮಖ್ಹಾಣ್ಯನ ರೇತಿಮ ಮೂಚಿನಾಖ್ಯೊ. 13 ಇನವ್ಹಾಣೆ ಇನೆ ಪಾಛು಼ ಭಾರ್‌ ಜಾ಼ವಖ್ಹತರ್, ಇಬ್ರಿಯವಾಳು ಬೇಜ಼ಣು ಲಡೈ ಕರುಕರ್ತುಥು. ಗಲತ್‌ ಕರವಾಳನ ಯೊ "ಶಾತ್‌ಲಾ ತೂ ಶನಖ್ಹಾಜೆ ಶೊಂತ್ ಖಾನ್‌ಖೋಜ್‌ವಾಳನ ಮಾರುಕರಸ್?" ಕರಿ ಬೊಲ್ಯೊ. 14 ಯೊ ಅದ್ಮಿನೆ ಇನ "ತುನ ಹಮಾರಪರ್‌ ಅದಿಕಾರಿ ಕರೀನ್‌ಬಿ, ನ್ಯಾವ್ಣೊ ಕರೀನ್‌ಬಿ, ಮ್ಹೇಲಿರಾಖ್ಯುತೆ ಕೋಣ್? ಯೊ ಈಜಿಪ್ಟ್‌ವಾಳನ ಮಾರಿನಾಖನಿತರಸ್, ಮನಾಬಿ ಮಾರಿನಾಕ್ಣು ಕರಿ ಛಾ಼ಕಿಶು? ಕರಿ ಬೊಲ್ಯೊ. ಆ ವಾತ್ನ ಖ್ಹಮ್‌ಜಿನ್ ಮೋಶೆನೆ, "ಮೇ ಕರ‍್ಯೊತೆ ಕಾಮ್ ಮಾಲುಮ್ ಹುಯಿಗುನಿ!" ಕರಿ ಡರಿಗೊ. 15 ಚಾ಼ಲ್ಯುತೆ ಖಬರ್ ಫರೋಹಾನ ಮಾಲುಮ್‌ಪಡಾನಿ ವಖ್ಹ್‌ತೆ ಯೊ ಮೋಶೆನ ಮರೈನಾಖಿದೇವ್ಣು ಕರಿ ಸೋಚಖ್ಹತರ್, ಕತೋಬಿ ಮೋಶೆ ಫರೋಹಕಂಥು ನಾಶಿಜೈ಼ನ್ ಮಿದ್ಯಾನ್ ದೇಖ್ಹ್‌ನಿ ಬಾವ್ಡಿಕನ ಬೇಶಿಗೊ. 16 ಮಿದ್ಯಾನ್ನು ಯಾಜಕನಿ ಖ್ಹಾತ್‌ಜ಼ಣಿ ಛೋ಼ಕ್ರಿಯೆ ಹಿಜ಼್ಜ ಅಯ್ಯೆ. ಇವ್ಣ ಬಾನ ಮೇಂಢಾವ್ನ ಪಾಣಿ ಪಿಡಾವನಖ್ಹಾಜೆ, ಪಾಣಿ ಶೇಂದಿನ್ ಬಾನೇಮ ಭರುಕರ್ತಿಥಿಯೆ. 17 ಎತ್ರಾಮ ಮಂಧಾನ ದೇಖವಾಳು ಐನ್ ಇವ್ಣುನ ಬಾವ್ಡಿಕಂಥು ನಖ್ಹಾಡಮ ಮೋಶೆ ಇವ್ಣುನ ಮದತ್‌ವಾಳೊಹುಯಿನ್ ಆಯಿನ್ ಇವ್ಣ ಮೇಂಢಾವ್ನ ಪಾಣಿ ಪಿಡಾಯೊ. 18 ಇನವಾರ್ ಯೊ ಛೋ಼ಕ್ರಿಯೆ ಇವ್ಣ ಬಾಹುಯಿರ‍್ಹಾವಳೊ ರೆಗೂವೇಲಕನ ಆವಖ್ಹತರ್ ಇನೆ ಇವ್ಣುನ, "ಶನ ಹಮ್ಕೆ ಒಗ್ಗಿ ಕೊಆಯಥಾನಿ?" ಕರಿಬೋಲ್ಯೊ. 19 ಇನ ಅವ್ಣೆ, "ಈಜಿಪ್ಟ್‌ವಾಳೊ ಎಕ್ ಅದ್ಮಿ ಹಮುನ ಮಂಧವಾಳನ ಹಾತೇಥಿ ಛು಼ಕಾಯೊ ಕಾಹೆತೆ ಇನೆ ಹಮಾರಖ್ಹಾಜೆ ಪಾಣಿನ ಶೇಂದಿನ್ ಮೇಂಢಾವ್ನ ಪಿಡಾಯೊ." ಕರಿಬೋಲಿಯೆ. 20 ತದೆ ಯೊ ಇನ ಛೋ಼ರಿಯೇವ್ನ, "ಯೊ ಕಿಜ಼್ಜ ಛಾ಼? ಶನ ಯೊ ಅದ್ಮಿನ ಮ್ಹೆಂದಿನ್ ಐಗಯೆ? ಇನ ಬುಲಾವೊ ಯೊ ಅಪ್ಣ ಜೋ಼ಡೆ ಖಾಣು ಖಾವಾದೆ" ಕರಿಬೋಲ್ಯೊ. 21 ಮೋಶೆ ಆ ಅದ್ಮಿನಿ ಜೋ಼ಡ್ಮ ಜಿವ್ಣುಕರಾನ ಆಖ್ಹ್ ಕರ‍್ಯೊ. ಯೊ ಯಾಜಕನೆ ಇನಿ ಛೋ಼ರಿ ಚಿಪ್ಪೋರನ ಮೋಶೆನ ವ್ಯಹಾಕರಿ ದಿದೊ. 22 ಯೊ ಹೈರಿತೆನ ಪರ್ಖ್ಹೊ ಲಡ್ಕು ಪೈದಾಹುವಾಮ ಮೋಶೆನೆ "ಮೆ ಪರ್‌ದೇಖ್ಹ್‌ಮ ಎಕ್ ಪ್ರವಾಸಿ ಹುಯಿರ‍್ಹೋಸ್‌ಕರಿ ಬೋಲಿನ್ ಇನ ‘ಗೇರ್ಷೋಮ್’*2:22 ಗೇರ್ಷೋಮ್ ಕತೊ ದೇಖ್ಹ್‌ಫರಾವಳೊಕರಿ ಮತ್ಲಬ್‌ ಕರಿ ನಾಮ್ ಮ್ಹೇಲ್ಯೊ. 23 ಅಮ್ ಘಣ ದನ್‌ಖ್ಹಾರು ನಿಕ್ಳಾನ ಬಾದ್ಮ ಈಜಿಪ್ಟ್‌ನೊ ರಾಜ಼ ಮರಿಗೊ. ಇಸ್ರಾಯೇಲ್‌ವಾಳು ಇವ್ಣೆ ಕರ್ನುತೆ ಚು಼ಪ್ಕೇನ ಕಾಮ್ನಖ್ಹಾಜೆ ಖ್ಹಾಖ್ಹಾ ಕ್ಹೋಳಿ ಭಂದೈನ್ ರದನ್ ಕರುಕರ್ತುಥು ಯೊ ರದ್‌ನ್ಯಾ ದೇವ್‌ಕನ ಛಿಮಾಯಿ. 24 ದೇವ್ ಇವ್ಣಿ ರದನ್ನ ಖ್ಹಮ್‌ಜಿನ್ ಇನೆ ಅಬ್ರಹಾಮ್, ಇಸಾಕ್, ಯಾಕೋಬ್‍ನ ಜೋ಼ಡೆ ಕರ‍್ಯೊಥೋತೆ ಒಪ್ಪಂದಾನ ಖ್ಹಯಾಲ್ಮ ಲಾಯೊ. 25 ದೇವ್ನೆ ಇಸ್ರಾಯೇಲ್‌ವಾಳನ ದೇಖಿನ್ ಇವ್ಣಿ ಬಾರೇಮ ಗೋರ್‌ ಕರ‍್ಯೊ.