Êxodo 22

ಬದಲ್ ದ್ಯವಾನಿ ಬಾರೇಮ ಖಾನುಲ್‌

1 ಏಕ್‌ಜ಼ಣೊ ಢಾಂಡಾನ ರ‍್ಹವೊ, ಮೇಂಢಾನ ರ‍್ಹವೊ ಚೋ಼ರಿಕರಿನ್ ವ್ಹಾಡ್‌ಯುತೊ ನತರ್ ವೇಚ್ಯುತೊ ಯೊ ಎಕ್ ಢಾಂಡಾನ ಬದಲ್ ಪಾಚ಼್‌ ಢಾಂಡವ್ನ ಎಕ್ ಮೇಂಢಾನ ಬದಲ್ ಚಾರ್ ಮೇಂಢಾವ್ನ ದೇವ್ಣು. 2 ಎಕ್ ಚೋ಼ರ್ ಚೋ಼ರ್ ಕರಾನಿವಖ್ಹ್‌ತೆಸ್ ಹಾತ್ಮ ಖ್ಹಪ್‌ಡೈಜಿನ್ ಇನ ಮಾರ್‌ದ್ಯವಾಮ ಮರಿಗಯೊತೊ ಇನ ಖೂನ್ ಗಣ್ತಿ ನಾಕರ‍್ನು. 3 ಚಾ಼ಂದ್ ನಿಕ್ಳಾನ ಬಾದ್‌ಮ ಏಕ್‌ಜ಼ಣೊ ಚೋ಼ರಿಕರಿನ್ ಖ್ಹಪ್‌ಡಿಗಯೊತೊ, ಇನ ಮಾರಿನ್ ಮಾರಿನಾಖ್ಯುತೊ ಇನ ಖೂನಿಕರಿ ಗಣ್ತಿಕರ‍್ನು. ಯೊ ಚೋ಼ರಿಕರಿಹುಯು ಪೂರ ಪಾಛು಼ ದೇವ್ಣು. ಇನಾಮ ದ್ಯವಾನ ಶಾತ್‌ಬಿ ನಾರ‍್ಹಿಯುತೊ ಯೊ ಚೋ಼ರ್‌ಕರ‍್ಯೊತೆ ಇನಖ್ಹಾಜೆ ಗುಲಾಮ್‌ಹುಯಿನ್ ವೇಚೈ಼ಜಾ಼ವ್ಣು. 4 ಚೋ಼ರಿ ಕರಿಹುಯು ಢಾಂಡು ರ‍್ಹವೊ, ಗಧೇಡೊ ರ‍್ಹವೊ, ಬೋಕ್ಡುರ‍್ಹವೊ, ಮೇಂಢು ರ‍್ಹೀನ್ ಜಿವ್ತುಸ್ ಚೋ಼ರಿಕರವಾಳಕನ ಮಳ್ಯುತೊ ಯೊ ಬೇಪಟ್ ಬದಲ್ ದೇವ್ಣು. 5 ಏಕ್‌ಜ಼ಣೊ ಇನ ಖೇತರ್‌ಮ ರ‍್ಹವೊ, ದ್ರಾಕ್ಷಿನ ಬಾಗ್‌ಮ ರ‍್ಹವೊ ಢಾಂಡವ್ನ ಚ಼ರೈನ್, ಬಿಜೇಕ್ ಜ಼ಣಾನ ಖೇತರ್‌ಮ ರ‍್ಹವೊ, ದ್ರಾಕ್ಷಿನ ಬಾಗ್‌ಮ ರ‍್ಹವೊ ಚ಼ರಾಯೊತೊ, ಇನ ಖೆತರ್‌ನು ನತರ್ ದ್ರಾಕ್ಷಿನು ಬಾಗ್‌ನ ಅಛ಼್ಛ ಪಸಲ್‌ಥಿ ಬದಲ್ ದೇವ್ಣು. 6 ಏಕ್‌ಜ಼ಣೊ ಲಗಾಡ್‌ಯೊತೆ ಆಗ್ ಅಫ್ಫರ್‌ಥುಸ್ ಕಾಟಾನ ಝಾ಼ಡಾನ ಖ್ಹಲ್‌ಗಿನ್ ಹಿಜ್ಜಾ಼ಥು ಬಿಜೇಕ್‌ಜ಼ಣಾನ ಅನಾಜ಼್‌ನ ರಾಶ್‌ನ ರ‍್ಹವೊ, ಪಿಕಾವ್ಣಿ ರ‍್ಹವೊ, ಖೆತರ್‌ ರ‍್ಹವೊ ಬಳಿಗಯೂತೊ, ಆಗ್ ಲಗಾಡ್ಯೊ ಹುಯೊ ಇನ ಬದಲ್ ದೇವ್ಣು. 7 ಏಕ್‌ಜ಼ಣೊ ರಪ್ಯಾನ ರ‍್ಹವೊ, ಖ್ಹೊನ್ನು ಖ್ಹರಪ್‌ನ ರ‍್ಹವೊ ಜ಼ತನ್‌ಥಿ ರಾಖಿಮ್ಹೆಲಾನ ಬಿಜೇಕ್ ಜ಼ಣಾನ ದೀರಾಖ್ಯುತೊ ಯೊ ರಾಛು಼ ಯೊ ಅದ್ಮಿನ ಘರ್‌ಮ ಚೋ಼ರಿಹುಯಿನ್, ಚ಼ೊಟ್ಟೊ ಖ್ಹಪ್‌ಡಿಗಯೋತೊ ಬೇಪಟ್ ದಂಡ್ ದೇವ್ಣು. 8 ಚ಼ೊಟ್ಟೊ ನಾ ಮಳ್ಯೊತೊ ಯೊ ಘರ್‌ನೊ ಯಜಮಾನ್ ಯೋಸ್ ಯೊ ಘೇಣಾನ ಚೋ಼ರ್ ಕರ‍್ಯೊಕಿಶು ಕೊಯ್ನಿಕಿ ಕರಿ ದೇವ್ನಿ ಝ಼ಗೋಕನ ದೆಖೈಲೇವ್ಣು. 9 ಠಗೈಗಯುಕರಿ ಶಕ್ ಹುವಾನು ಹರೇಕ್‌ನು ವಿಚಾರ್‌ನು ಬಾರೇಮಾಬಿ, ಯೊ ಢಾಂಡು, ಗಧೇಡೊ, ಮೇಂಢು ನತರ್ ಲುಂಗ್ಡಾವ್‌ನಿ ವಿಚಾರ್ ರ‍್ಹಿಯುತೋಬಿ, ಗುಮೈಲಿದೋತೆ ಬಿಜು಼ ಖಿವು ಜಿನಖ್ಹ್‌ನಿ ವಿಚಾರ್‌ ರ‍್ಹಿಯುತೋಬಿ, ಭೇಜ಼ಣ ಯೊ ಮಾರುಕರಿ ಬೋಲಾನಿ ವಖ್ಹ್‌ತೆ ಯೊ ಭೇಜ಼ಣಾನು ಝ಼ಗ್ಡಾನ ಲೀನ್ ದೇವ್ನ ಖ್ಹಾಮ್ಣೆ ಆವ್ಣು. ದೇವ್ ಯೊ ಭೇಮ ಕಿನ ಠಗಾರುಕರಿ ತೀರ್ಮಾನ್ ಕರಾಸ್ಕಿ ಯೊ ಬಿಜೇಕ್ ಜ಼ಣಾನ ಬೇಪಟ್ ದೇವ್ಣು. 10 "ಏಕ್‌ಜ಼ಣೊ ಬಿಜೇಕ್‌ಜ಼ಣಾನ ಗಧೇಡಾನ ರ‍್ಹವೊ, ಢಾಂಡಾನ ರ‍್ಹವೊ ಬಿಜು಼ ಮೇಂಢರ‍್ಹವೊ ಅಜು಼ ಖಿವುಬಿ ಜಾನ್ವರ್‌ನ ರ‍್ಹವೊ, ಜ಼ತಂಥಿರಾಖನ ದೀಮ್ಹೇಲಿನ್, ಯೊ ಮರಿಗಯುತೊ ನತರ್ ಫೋಡೇಲು ಹುಯುತೊ ನತರ್ ಕಿನಾಬಿ ಮಾಲುಮ್‌ಕೊಂತೆ ಚೋ಼ರಿ ಹುಯ್ಗುತೊ, 11 ಯೊ ಅದ್ಮಿ ಇನುಯೋಸ್ ಯೊ ಶೊತ್ನಿ ಬಾರೇಮ ಠಗಾಯೊ ಕೊಯ್ನಿಕರಿ ನಿಶ್ಚಯ್‌ಕರಾನ ಖ್ಹಾಜೆ ಯೆಹೋವನಪರ್ ಆಣ್‌ಕರ‍್ನು. ತದೆ ಜಾನ್ವರ್‌ನೊ ಮಾಲಿಕ್ ಯೊ ಆಣ್‌ನಿ ವಾತೆನ ವಿಶ್ವಾಸ್‌ಕರ‍್ನು. 12 ಕತೋಬಿ ಯೊ ಜಾನ್ವರ್‌ ಇನಕಂಥು ಚೋ಼ರಿ ಹುಯಿರ‍್ಹುತೊ ಯೊ ಅದ್ಮಿ ಇನ ಮಾಲಿಕ್‌ನ ಬದಲ್ ದೇವ್ಣು. 13 ಝಾ಼ಡಿನು ಜಾನ್ವರ್‌ ಮಾರಿರಾಖ್ಯುತೊ, ಇನ ಮುರ‍್ದಾನ ಖ್ಹಣೇದ್‌ನಖ್ಹಾಜೆ ವತಾಳದೆ. ಜ಼ಂಗಳ್‌ನು ಜಾನ್ವರ್‌ ಮಾರ‍್ಯುತೆಖ್ಹಾಜೆ ಬದಲ್ ದ್ಯವಾನಿ ಜ಼ರೂರತ್ ಕೊಯ್ನಿ. 14 ಏಕ್‌ಜ಼ಣೊ ಬಿಜೇಕ್‌ಜ಼ಣೇಥಿ ಜಾನ್ವರ್‌ನ ಥೋಡ ದನ್ನಖ್ಹಾಜೆ ಭಾಡು ಲೀರಾಖಿನ್ ಯೊ ಜಾನ್ವರ್‌ನೊ ಮಾಲಿಕ್ ಇನು ಖನ್ನೆಕೊಂತೆ ವಖ್ಹತ್‌ಮ ಯೊ ಫೋಡೇಲು ಹುಯುತೊ ನತರ್ ಮರಿಗಯುತೊ ಉಧಾರ್ ಲೀರಾಖವಾಳೊ ಬದಲ್ ದೇವ್ಣು. 15 ಮಾಲಿಕ್ ಖನ್ನೆಸ್‌ ರ‍್ಹಿಯೂತೊ, ಇನ ಬದಲ್ ದ್ಯವಾನಿ ಜ಼ರೂರತ್ ಕೊಯ್ನಿ. ಇನ ಭಾಡು ಲೀರಾಖ್ಯೊತೊ ಇನ ಹುವಾನಿ ಲುಕ್ಷಾನ್ ಭಾಡಾನು ಇಶಾಬ್‌ನ ಗಣ್ತಿಹೋಣು.

ಲೋಗ್‌ ನಿಯಮ್‌ನಿ ಬಾರೇಮ

16 ಖ್ಹಗೈಪಡಿರ‍್ಹಿಕೊಂತೆ ಛೋ಼ಕ್ರಿನ ಡೋಳಕಾಡಿನ್ ಮಳಿಗಯೊತೊ ಹೈರಿತೆನಖ್ಹಾಜೆ ಮಹಾರ್ ದೀನ್ ಇನ ವ್ಯಾಹ ಕರಿಲೇವ್ಣು. 17 ಕತೋಬಿ ಯೊ ಛೋ಼ಕ್ರಿನೊ ಬಾ ಇನ ದ್ಯವಾನ ನಾ ಮಾನಿಲಿದೋತೊ ಯೊ ಅದ್ಮಿ ದಾಮ್ನ ಕಿಮ್‌ಬಿ ಪೈಸನ ದೇವ್ಣು. 18 "ಜಾ಼ದುಕರಾವಳಿನ ಬಚಿರ‍್ಹವಾನ ನಾಮ್ಹೇಲ್ನು. 19 "ಜಾನ್ವರ್‌ಥಿ ಮಳಾವಳನ ಮರಣ್ಣಿ ನಿಶತ್ ಹೋಣು. 20 ಯೆಹೋವನ ಏಕ್‌ಜ಼ಣಾನ ಮ್ಹೇಲಿನ್ ಬಿಜೇಕ್ ದೇವ್ನ ಬಲಿ ಅರ್ಪಣ್ ಕರಾವಳೊ ಪೂರ ನಾಶ್‌ಹುಯಿಜಾ಼ವ್ಣು. 21 ಪರ್‌ದೇಖ್ಹ್‌ವಾಳನ ನಾ ಠಗಾವ್ಣು, ಇನ ಖ್ಹತಾವ್ಣು ನಾ. ತುಮೇಬಿ ಜಿನು ಈಜಿಪ್ಟ್‌ಮ ಪರ್‌ದೇಖ್ಹ್‌ವಾಳ ಹುಯಿರ‍್ಹಾಥಾನಿ. 22 ಮುಂಡಚ್ಚಿಯೇವ್ನ ರ‍್ಹವೊ, ಅನಾದ್ರಿ ಲಡ್ಕಾವ್ನ ರ‍್ಹವೊ ಖ್ಹತಾವ್ಣು ನಾ. 23 ತುಮೆ ಅಥ್ರಾನವಾಳನ ಖ್ಹತಾಯತೊ ಇವ್ಣೆ ಮನ ಬಿಂತಿ ಕರ್‌ಷೆ ಯೊ ಬಿಂತಿನ ಮೇ ಕಾನ್ ದಿಶ್‌ಕರಿ ಮಾಲುಮ್‌ ಕರಿಲೆವೊ. 24 ಮೇ ಖಿಜೈನ್ ತುಮಾರ ವಹೇರ‍್ಯಾವ್ನ ತಲ್ವಾರ್‌ಥಿ ಮಾರಿಶ್. ತುಮಾರಿ ಬಾವಣೆ ಮುಂಡಚ್ಚಿಯೆ ಉಷೆ. ತುಮಾರ ಲಡ್ಕಾವ್ ಅನಾದ್ರಿ ಉಷೆ. 25 ಮಾರ ಅದ್ಮಿಮ ಎಕ್ ಗರೀಬ್‌ನ ತೂ ರಪ್ಯ ದಿದೋತೊ ಇನ ಕರ್‌ಜ್ಯನಿತರ ನಾ ದೇಕ್ಣು. ಇನೇಥಿ ಬಡ್ಡೀಬಿ ನಾ ಬೋಲ್ನು. 26 ತೂ ಏಕ್‌ಜ಼ಣಾನ ಗೋದ್‌ಡಾನ ಆಡು ಮ್ಹೇಲಿರಾಖ್ಯೊತೊ ಚಾ಼ಂದ್ ಡುಬಾನ ಮಹಿ ಇನ ಪಾಛು಼ ದಿನಾಖಿ ದೇವ್ಣು. 27 ಶನಕತೊ ಯೊ ಇನ ಎಕ್ಕಸ್ ಹೋಡ್‌ಣಿ ಹುಯಿರ‍್ಹಿಸ್. ಯೋಸ್ ಇನ ಆಂಗ್ನ ಪೆರ್ವಾಖ್ಹ್. ಯೊ ಬಿಜು಼ ಶನ ಹೋಡಿನ್ ಖ್ಹೂಣು? ಯೊ ಮನ ಬಿಂತಿ ಕರ‍್ಯೊತೊ ಮೇ ಕಾನ್‌ಲಗಾಡಿ ಖ್ಹಮ್‌ಜಿಶ್. ಶನಕತೊ ಮೇ ದಯಾಕರವಾಳೊಸ್. 28 ದೇವ್ನ ಗಾಳೆ ನಾದೇವ್ಣು. ತಾರ ಅದ್ಮಿಯೇನ ಮೋಟಾನ ತೂ ಶಬರ್ ನಾದೇವ್ಣು. 29 ತುಮಾರ ಖೇತರ್‌ಥು ಬಿಜೂ಼ ದ್ರಾಕ್ಷಿನ ರಖ್ಹ್‌ಮಾಥು ಮನ ದೆವಾವ್ಣುತೆಯಿನ ಅರ್ಪಣ್‌ಕರಾನ ಧೀರ್‌ನಾಕರ‍್ನು. ತುಮಾರ ಪೈಲ್ಹೋಟ ಪರ್ಖ್ಹಾ ಲಡ್ಕಾವ್ನ ಮನ ಅರ್ಪಣ್ ಕರ‍್ನು. 30 ಇಮ್ಮಸ್ ತುಮಾರು ಮೇಂಢು, ಢಾಂಡಾವ್ನು ಪೈಲ್ಹೋಟ ಚೆಲ್ಕಾವ್ನ ಮನ ಅರ್ಪಣ್ ಕರ‍್ನು. ಖ್ಹಾತ್ ದನ್‌ಲಗು ಯೊ ಚೆಲ್ಕು ಇನಿ ಆಯನ ಜೋ಼ಡ್ಮ ರ‍್ಹವಾದೆ. ಆಟ್ನ ದನ್ಮ ಇನ ಮನ ಅರ್ಪಣ್ ಕರ‍್ನು. 31 ತುಮೆ ಮನ ಪರಿಶುದ್ದ ಅದ್ಮಿ ಹುಯಿರೇಣು. ಇನಖ್ಹಾಜೆ ಜ಼ಂಗಳ್‌ನು ಜಾನ್ವರ್‌ ಮಾರಿರಾಖಸ್ತೆಯಿನ ನಾಖಾವ್ಣು; ಇನ ಕುತ್‌ರ‍್ಯಾವ್ನ ಮ್ಹೇಲಿದೇವ್ಣು.