Êxodo 33

ಇಸ್ರಾಯೇಲ್‌ವಾಳನ ಸಿನಾಯಿ ಪಹಾಡ್ ಮ್ಹೇಲಿನ್ ನಿಕಳ್‌ಣು ಕರಿ ಯೆಹೋವನಿ ಹುಕುಮ್‌

1 ಯೆಹೋವನೆ ಮೋಶೆನ ಶಾತ್ ಬೋಲ್ಯೊಕತೊ, "ತೂ ಈಜಿಪ್ಟ್ ದೇಖ್ಹ್‌ಥು ಬುಲೈಲಿನ್ ಆಯೋತೆ ಆ ಅದ್ಮಿನ ತಾರ ಜೋ಼ಡೆ ಬುಲೈಲಿನ್ ಆ ಝ಼ಗೊನ ಮ್ಹೇಲಿನ್, ‘ಮೇ ಅಬ್ರಹಾಮ್, ಇಸಾಕ್, ಅಜು಼ ಯಕೋಬ್ ಇವ್ಣುನ ಅಜು಼ ತುಮಾರಿ ಪಿಳ್ಗಿವಾಳನ ದೆವುಸ್‌ಕರಿ’ ಕೋಲ್‌ನಾಮ್‌ ಕರ‍್ಯೊತೆ ದೇಖ್ಹ್‌ನ ನಿಕ್‌ಳಿಜಾ಼. 2 ಮೇ, ತಾರೇಥಿಬಿ ಅಗ್ಗಳ್ ಎಕ್ ದೂತನ ಮೋಕ್ಲಿನ್ ಕಾನಾನ್ಯವಾಳನ, ಅಮೋರಿವಾಳನ, ಹಿತ್ತಿಯವಾಳನ, ಪೆರಿಜೀವಾಳನ, ಹಿವ್ವಿವಾಳನ ಅಜು಼ ಯೆಬೂಸಿವಾಳವ್ನ ಭಾರ್‌ ಕಾಡಿಷ್. 3 ದೂದ್‌ಬಿ ಅಜು಼ ಶೇತ್‌ಬಿ ವ್ಹವಾನ ದೇಖ್ಹ್‌ಮ ತೂ ಜಾ಼. ಕತೋಬಿ ಮೆ ತುಮಾರ ಜೋ಼ಡೆ ಅಯಿಷ್‌ಕೊಯ್ನಿ, ಶನಕತೊ ತುಮೆ ಮೊಂಡಿ ಅದ್ಮಿಖ್ಹಾರು. ಮೇ ವಾಟ್‌ಮ ತುಮುನ ಮಾರಿತೋಬಿ ಮಾರಿನಾಖಿಷ್" ಕರಿ ಬೊಲ್ಯೊ.

4 ಇಸ್ರಾಯೇಲ್ನು ಅದ್ಮಿಖ್ಹಾರು ಆ ದುಖ್‌ನಿ ವಾತೇವ್ನ ಖ್ಹಮ್‌ಜಿನ್ ದಿಲ್‌ಮ ದರದ್ ಕರ‍್ಯು. ಇನಾಮ ಏಕ್‌ಜ಼ಣುಬಿ ಘೇಣಾವ್ನ ಫೇರ‍್ಯುಕೊಯ್ನಿ. 5 ಯೆಹೋವನೆ ಮೋಶೆನ ಅಮ್ ಬೊಲ್ಯೊ. "ತು ಇಸ್ರಾಯೇಲ್‌ವಾಳನ ಬೋಲಾನು ಶಾತ್‌ಕತೊ, ‘ತುಮೆ ಮೊಂಡಿ ಅದ್ಮಿಖ್ಹಾರು, ಮೇ ಎಕ್ ಘಡಿ ತುಮಾರಿ ಬೀಚ್ಮ ಆವನು ರ‍್ಹಯುತೊ, ಮೇ ತುಮುನ ಮಟೈನಾಖಿದಿಷ್. ಇನಖ್ಹಾಜೇಥಿ ತುಮಾರ ಖ್ಹೊನ್ನ ಖ್ಹರಪ್‌ನ ಹಮ್ಕೆ ಕಾಡಿನಾಖೊ. ತುಮುನ ಮೇ ಶಾತ್‌ ಕರ‍್ನುಕರಿ ಸೋಚುಸ್" ಕರಿ ಬೊಲ್ಯೊ. 6 ಇಮ್ನಿತರಸ್ ಇಸ್ರಾಯೇಲ್‌ವಾಳು ಹೋರೆಬ್*33:6 ಸೀನಾಯಿ ಪಹಾಡ್ನು ಬಿಜೇಕ್ ನಾಮ್ ಹೋರೆಬ್ ಪಹಾಡ್‌ಥು ನಿಕ್‌ಳ್ಯು ತದೆ ಇವ್ಣೆ ಘೇಣಾವ್ನ ಫೇರ‍್ಯುಕೊಯ್ನಿ.

ದೇವ್ನ ದರ್ಶನ್ನೊ ಡೇರೊ

7 ಮೋಶೆನೆ ಡೇರಾನ ಟಾಂಡಾನ ಭಾರ್‌ ದೂರ್‌ಮ ನಖಾವ್‌ತೊಥೊ. ಇನ ದೇವ್ನ ದರ್ಶನ್ನು ಡೇರೊ ಕರಿ ನಾಮ್‌ಮ್ಹೇಲ್ಯೊ. ಯೆಹೋವನಿ ಜ಼ವಾಬ್‌ನ ಆಖ್ಹ್‌ಕರವಾಳು ಖ್ಹಾರುಸ್‌ಬಿ ಟಾಂಡನ ಭಾರ್‌ಥೂತೆ ದೇವ್ನ ದರ್ಶನ್ನ ಡೇರಾನ ಘರ್‌ಕನ ಜಾ಼ತುಥು. 8 ಮೋಶೆನೆ ಯೊ ಘರ್‌ಮ ಜಾ಼ವನಿ ಖ್ಹಾರಿವಖ್ಹತ್‌ಬಿ ಅದ್ಮಿಖ್ಹಾರು ಉಠಿನ್ ಇವ್ಣ ಇವ್ಣ ಡೇರಾವ್ನು ಬಾಕಲ್‍ಕನ ಭೀರಿನ್, ಮೋಶೆ ಯೊ ಘರ್‌ಮ ಜಾ಼ವಲಗು ಇನ ದೇಕ್‌ತುಥು. 9 ಮೋಶೆ ಯೊ ಘರ್‌ಮ ಜಾ಼ವನ ಬಾದ್‌ಮಸ್ ವಾದ್ಳಾನುಖಂಬು ಉತ್ರಿನ್, ಯೊ ಡೆರಾನ ಘರ್‌ನ ಬಾಕಲ್‌ಮ ಭಿರೇತುಥು ಅಜು಼ ಯೆಹೋವ ಮೋಶೆನ ಜೋ಼ಡೆ ವಾತೆ ಬೋಲ್ತೊಥೊ. 10 ಯೊ ವಾದ್ಳಾನುಖಂಬು ಡೇರಾನ ಘರ್‌ನು ಬಾಕಲ್‍ಕನ ಭಿಯುರ‍್ಹವಾನು ದೇಖಿನ್ ಇವ್ಣ ಇವ್ಣ ಡೇರಾವ್ನ ಬಾಕಲ್‌ಕನಸ್ ಆಡುಪಡ್‌ತುಥು. 11 ಏಕ್ಜ಼ಣೊ ಇನ ದೋಸ್ತಿನ ಜೋ಼ಡೆ ಕಿಮ್ ವಾತ್ ಬೋಲಸ್ಕಿ ಇಮ್ಮಸ್ ಯೆಹೋವ ದೇವ್ ಮೋಶೆನ ಜೋ಼ಡೆ ಆಮೆಖ್ಹಾಮೆ ವಾತೆ ಬೋಲ್ತೊಥೊ. ಇನಕೇಡೆಥು ಮೋಶೆ ಟಾಂಡನ ಪಾಛೊ಼ ಆವ್‌ತೊಥೊ; ಕತೋಬಿ ನೂನನೊ ಛಿಯ್ಯೊ ಯೆಹೋಶುವ ಕರಿ ನಾಮ್‌ನೊ ಜ಼ವಾನಿ ಏಕ್‌ಜ಼ಣೊ ಮೋಶೆನೊ ಶಿಷ್ಯಹುಯಿನ್ ಯೊ ಡೆರಾನ ಘರ್‌ಮಾಸ್ ರ‍್ಹೇತೊಥೊ, ಹಿಜ್ಜಾ಼ಥು ದೂರ್ ಕಿಜ್ಜಾ಼ಬಿ ಹಟ್ತೊಥೊಕೊಯ್ನಿ.

ಅದ್ಮಿನ ಜೋ಼ಡೆ ರ‍್ಹವಾನಖ್ಹಾಜೆ ಯೆಹೋವನೆ ಕರ‍್ಯೊತೆ ವಾಗ್ದಾನ್

12 ಮೋಶೆನೆ ಯೆಹೋವನ ಶಾತ್ ಬೊಲ್ಯೊಕತೊ, "ಆ ಅದ್ಮಿಖ್ಹಾರನ ಯೊ ಮುಲಕ್ನ ಚ಼ಲೈಲಿನ್ ಜಾ಼ವ್ಣುಕರಿ’ ತೂ ಮನ ಹುಕುಮ್ ಕರಿರಾಖ್ಯೊಸ್ ಎತ್ರೇಸ್. ಮಾರ ಜೋ಼ಡೆ ಖೆವಾನ ಮೋಕ್ಲಿಷ್‌ಕರಿ ಮನ ಬೋಲ್ಯೊಕೊಯ್ನಿ. ‘ಕತೋಬಿ ಮೆ ತುನ ಅಛ್ಛಿನಿತರ ಮಾಲುಮ್ ಕರಿರಾಖ್ಯೊಸ್. ತುನ ಮಾರಿ ದಯಾ ಮಳಿರ‍್ಹಿಸ್‌ಕರಿಬಿ’ ತುನೆ ಮನ ಬೋಲಿರಾಖ್ಯೊಸ್ನಿ. 13 ಮಾರಪರ್ ಗೋರ್‌ರ‍್ಹವಾನು ಉಷೇತೊ ತಾರ ಮಾರಗ್‌ನ ಮನ ವತಾಳ್ ಮೇ ತುನ ಮಾಲುಮ್ ಕರಿಲ್ಯವಾನಿಘೋಣಿ ತಾರಿ ಕೃಪೇನ ಮನ ದಯಕರ್ ತದೆ ತಾರಿ ದಯಾ ಮನ ಮಳಿಕರಿ ಮನ ಮಾಲುಮ್‌ ಉಷೆ. ಆ ಮುಲಕ್‌ಖ್ಹಾರು ತಾರು ಪ್ರಜೆಕರಿ ಯಾದ್‌ಕರಿಲೆ" ಕರಿ ಹರ್ಕೆ ಕರ‍್ಯೊ. 14 ತದೆ ಯೆಹೋವ ದೇವ್ನೆ, "ಮಾರಿ ಪ್ರಸನ್ನತೆ ತಾರಿ ಜೋ಼ಡ್ಮ ಆವ್‌ಷೆ, ಮೇ ತುಮುನ ಅರಾಮ್‌ದಿಷ್" ಕರಿ ಬೊಲ್ಯೊ. 15 ಮೋಶೆನೆ ಇನ, "ತಾರಿ ಪ್ರಸನ್ನತೆ ಹಮಾರ ಜೋ಼ಡೆ ಆವನು ನಾರ‍್ಹಯುತೊ ಹಮುನ ಹಜ್ಜಾ಼ಥು ನಾ ಮೋಕಲ್‌ನು. 16 ಮನಾಬಿ ತಾರಿ ಪ್ರಜೆ ಹುಯಿರ‍್ಹುತೆ ಅವ್ಣುನಾಬಿ ತಾರಿ ದಯೆ ಮಳ್ಯುಕರಿ ತೂ ಹಮಾರಿ ಜೋ಼ಡೆ ಆವಥಿಸ್ ಪಣ್ಕಿ ಬಿಜು಼ ಶನೇಥಿ ಮಾಲುಮ್ ಪಡ್‌ಶೆ? ಅನೇಥಿ ಮೇಬಿ ಅಜು಼ ತಾರು ಪ್ರಜೆಹುಯಿರ‍್ಹುತೆ ಅವ್ಣೆ ಧರ್ತಿಪರ್ ರ‍್ಹವಾನು ಬಿಜು಼ ಖ್ಹಾರುಸ್ ಅದ್ಮಿಯೆಥಿಬಿ ವಿಶೇಷ್‌ವಾಳುಕರಿ ಮಾಲುಮ್‌ಉಷೆ" ಕರಿ ಬೊಲ್ಯೊ. 17 ಯೆಹೋವನೆ ಮೋಶೆನ, "ತುನ ಮಾರಿ ದಯೆ ಮಳಿರ‍್ಹವಾಥಿಬಿ, ಮೇ ತಾರ ನಾಮ್ನ ಮಾಲುಮ್ ಕರಿರಾಖ್ಯೊಸ್ತೆ ಖ್ಹಾಜೇಥಿಬಿ ತಾರಖ್ಹಾಜೆ ಆ ಕಾಮ್ನ ಕರುಸ್" ಕರಿ ಬೊಲ್ಯೊ.

18 ಇನ ಮೋಶೆನೆ, "ತಾರಿ ಮಹಿಮೆನ ದಯಾಕರಿನ್ ಮನ ವತಾಳ್" ಕರಿ ಬೊಲ್ಯೊ.

19 ಇನ ಪ್ರಭುನೆ, "ಮೇ ಮಾರಿ ಮಹಿಮೆನ ಉಜಾ಼ಖ್ಹ್‌ನ ಪೂರಾಥಿ ತಾರಖ್ಹಾಮೆ ಆವನಿಘೋಣಿ ಕರುಸ್. ಯೆಹೋವಕರಿ ಮಾರ ನಾಮ್ನು ಪೂರ ಮಹಿಮೆನ ತಾರ ಖ್ಹಾಮೆಕರಿಸ್ ಪ್ರಕಟ್‌ಕರಿಷ್. ಮೇ ಕಿನಪರ್ ದಯಾ ವತಾಳ್‌ನುಕರಿ ಛೂ಼ಕಿ ಇನಪರ್ ವತಾಳಿಶ್, ಕಿನ ಗೋರ್‌ಕರ‍್ನುಕರಿ ಛೂ಼ಕಿ ಇನ ಗೋರ್‌ ಕರಿಶ್" ಕರಿ ಬೊಲ್ಯೊ. 20 ಕತೋಬಿ ಪ್ರಭುನೆ ಇನ, "ತೂ ಮಾರ ಮ್ಹೋಡಾನ ದೇಖಾನ ಕೊಉಷೇನಿ. ಶನಕತೊ ಅದ್ಮಿಯೇವ್ನ ಕೋಣ್ಬಿ ಮನ ದೇಖಿನ್ ಬಚ಼ಕೊಯ್ನಿ" ಕರಿ ಬೊಲ್ಯೊ. 21 ಅಜು಼ ಯೆಹೋವನೆ ಇನ, "ದೇಕ್, ಹಜ್ಜಾ಼ ಮಾರ ಖನ್ನೆಸ್‌ ಎಕ್ ಝ಼ಗೊ ಛಾ಼. ತೂ ಆ ಬಂಡಾನ ಉಪ್ಪರಸ್ ಭಿಯೊರ‍್ಹೆ. 22 ಮಾರಿ ಮಹಿಮೆ ಖ್ಹಾಮೆ ಉಲಾಂಗಿ ಜಾ಼ವನಿವಖ್ಹ್‌ತೆ ಮೇ ಆ ಬಂಡಾನಿ ಖೀಂಡಿಮ ತುನ ರಾಖಿನ್, ಮೇ ಖ್ಹಾಮೆ ಉಲಾಂಗಿ ಜಾ಼ವಲಗು ತುನ ಮಾರ ಹಾತೇಖ್ಹು ಮೂಚಿರಾಖಿಷ್. 23 ಇನಕೇಡೆಥು ಮೇ ಮಾರ ಹಾತ್ನ ಕಾಡನಿ ವಖ್ಹ್‌ತೆ ತೂ ಮಾರ ಪೀಠೆ ದೇಖಿಶ್‌ ಪಣ್ಕಿ ಮಾರು ಮ್ಹೋಡು ತುನ ದೆಖಾವ್‌ಷೆ ಕೊಯ್ನಿ" ಕರಿ ಯೆಹೋವನೆ ಬೊಲ್ಯೊ.