ವಿಮೋಚನಕಾಂಡ 4

ದೇವ್ನೆ ಮೋಶೆನ ದಿದೋತೆ ಅದ್ಭುತ್ ಶಕತ್

1 ತದೆ ಮೋಶೆ ಯೆಹೋವ ದೇವ್ನ ಜವಾಬ್‌ ದೇತೊಹುಯಿನ್, "ಇವ್ಣೆ ಮನ ವಿಶ್ವಾಸ್ ನಾಕರಿನ್, ಮಾರಿವಾತ್ನ ನಾ ಖ್ಹಮ್ಜಿನ್, ಯೆಹೋವ ತುನ ದೆಖಾಯೊಸ್ ಕೊಯ್ನಿಕರಿ ಬೋಲ್ಯೊತೊ ಮೇ ಶಾತ್ ಕರ‍್ನು?" ಕರಿ ಬೊಲ್ಯೊ. 2 ಇನ ಯೆಹೋವನೆ, "ತಾರ ಹಾತ್ಮ ಛಾ಼ತೆ ಶಾತ್?" ಕರಿಬೋಲ್ಯೊ, ಇನೆ "ಆ ಎಕ್ ಲಠ್ಠೊ" ಕರಿಬೋಲ್ಯೊ. 3 ಯೆಹೋವನೆ ಇನ, "ಯೊ ಜ಼ಮಿನ್‌ಪರ್ ಫೇಕ್" ಕರಿಬೋಲ್ಯೊ. ಜ಼ಮಿನ್‌ಪರ್ ಫೇಕಾಖ್ಹತರ್ ಯೊ ಖ್ಹಾಪ್ ಹುಯಿಗು! ಮೋಶೆ ಇನ ದೇಖಿನ್ ಡರಿನ್ ಮಿಲೈನ್ ಚ಼ಲೆಗಯೊ. 4 ಯೆಹೋವನೆ ಮೋಶೆನ "ತಾರೊ ಹಾತ್ ಪೂರೈನ್ ಇನ ಡೋಂಡಾನ ಧರ್" ಕರಿ ಬೊಲ್ಯೊ. ಇಮ್ಮಸ್ ಧರಾಖ್ಹತರ್ ಯೊ ಲಠ್ಠೊ ಹುಯೊ. 5 ತದೆ ಯೆಹೋವನೆ ಇನ, "ಅನೇಥಿ ಇವ್ಣೆ ಇವ್ಣ ಗುರುಗುರಬ್‌ಲ್ಯ ಹುಯಿರ‍್ಹಾತೆ ಅಬ್ರಹಾಮ್, ಇಸಾಕ್, ಯಾಕೋಬನೊ ದೇವ್‌ಹುಯಿರ‍್ಹೊತೆ ಯೆಹೋವನೆ ತುನ ದೆಖೈರ‍್ಹೋಸ್ತೆ ಖ್ಹಾಚಕರಿ ವಿಶ್ವಾಸ್ ಕರ್ಷೆ" ಕರಿಬೋಲ್ಯೊ. 6 ಯೆಹೋವನೆ ಪಾಛು಼ ಇನ, "ತಾರ ಹಾತ್ನ ಝ಼ಗ್ಗಾನ ಮಹಿ ಘಾಲಿರಾಕ್" ಕರಿ ಬೊಲ್ಯೊ. ಯೊ ಇಮ್ಮಸ್ ರಾಖಿನ್ ಭಾರ್ ಕಾಡಖ್ಹತರ್ ಇನೊ ಹಾತ್ನ ಮಚ಼್ಚೊ ಹುಯಿನ್ ಬರಪ್‌ನಿತರ ಧೋಳುಫಟ್ ಹುಯಿರ‍್ಹುಥು. 7 ಯೆಹೋವನೆ ಇನ ಹಾತ್ನ ಪಾಛು಼ ಝ಼ಗ್ಗಾನ ಮಹಿ "ಘಾಲ್" ಕರಿ ಬೊಲ್ಯೊ. ಯೊ ಪಾಛು಼ ಝ಼ಗ್ಗಾನ ಮಹಿಘಾಲಿನ್ ಕಾಡಿ ದೇಖಾನಿ ವಖ್ಹ್‌ತೆ ಪಾಛು಼ ಥೂತೆ ಶರೀರ್‌ನಿತರಾಸ್ ಹುಯು. 8 ತದೆ ಯೆಹೋವನೆ ಇನ "ಇವ್ಣೆ ತುನ ನಾ ನಂಬಿನ್, ಪಹಿಲು ಅದ್ಭುತ್ ಕಾಮ್ನ ನಾ ಮಾಲುಮ್‌ಕರೀನ್ ಝಿಟ್ಕಾರ‍್ಯು ತೋಬಿ ಬೇನ ಅದ್ಭುತ್‌ನ ದೇಖಿನ್ ವಿಶ್ವಾಸ್ ಕರ್ಷೆ. 9 ಯೊ ಭೇ ಅದ್ಭುತ್‌ಕಾಮ್ನ ಇವ್ಣೆ ವಿಶ್ವಾಸ್ ನಾಕರಿನ್‌ಬಿ ತಾರಿ ವಾತ್ನ ನಾ ಖ್ಹಮ್‌ಜಿನ್‌ಬಿ ಗಯೂತೊ, ತೂ ನೈಲ್ ನದ್ದಿನ ಪಾಣಿನ ಲೀನ್ ಜೈ಼ನ್ ಖ್ಹುಕ್ಕಿ ಜ಼ಮಿನ್‌ಪರ್ ರಂಚ಼್‌ಣು. ತದೆ ಖ್ಹುಕೈರ‍್ಹೀತೆ ಜ಼ಮಿನ್‌ಮ ರಂಚ್ಯುತೆ ಪಾಣಿ ಲ್ಹೋಯಿ ಉಷೆ" ಕರಿ ಬೊಲ್ಯೊ. 10 ತದೆ ಮೋಶೆ ಯೆಹೋವನ, "ಪ್ರಭು, ಪಹಿಲೆಥೋಬಿ ತು ಮಾರಿ ಜೋ಼ಡೆ ವಾತ್ ಬೋಲ್ಯೊತೋಬಿ ಮೆ ಕದೇಬಿ ವಾತೇಮ ಚಾ಼ತುರ್ ಕೊಯ್ನಿ, ಮೇ ತೊತ್‌ಳ್ಯೊ ಹುಯಿರ‍್ಹಿನ್, ಕದೇಬಿ ಪಾಛೊ಼ ಹಟಿಜ಼ಾವಾಳೊ, ಮಾರಿ ಜೀಬ್ಬಿ ಢೋಕ್‌ಳ್ಯು ಹುಯಿರಿಸ್" ಕರಿಬೋಲ್ಯೊ. 11 ತದೆ ಯೆಹೋವನೆ, ಇನ ಅದ್ಮಿನ ಬಾಕು ದಿದೋತೆ ಕೋಣ್? ಏಕ್‌ಜ಼ಣೊ ಮೂಗೊ, ಕಿವುಡೊ, ಏಕ್‌ಜ಼ಣಾನ ದೆಖಾವನಿ ಘೋಣಿ ಅಜು಼ ಬಿಜೇಕ್ ಜ಼ಣೊ ಅಂಧಾನಿತ್ರ ರ‍್ಹೇವ್ಣುಕರಿ ನೇಮಕ್ ಕಿನೆ ಕರ‍್ಯೊ? ಯೆಹೋವ ಹುಯಿರ‍್ಹೋಸ್ತೆ ಮೇಸ್ ಕಾಹೆಕಿಶು? 12 ಅನಖ್ಹಾಜೆ ತು ಹಮ್ಕೆ ನಿಕಳ್ ಮೆ ತಾರ ಮ್ಹೋಡಾನ ಮದತ್‌ವಾಳೊ ಹುಯಿರ‍್ಹಿನ್ ತೂ ವಾತೆ ಬೋಲಾನುಖ್ಹಾರು ಮೇ ತುನ ಬೋಲುಸ್ ಕರಿ ಬೊಲ್ಯೊ. 13 ಕತೋಬಿ ಮೋಶೆನೆ, ಪ್ರಭು ದಯಾಕರಿನ್ ಬಿಜೇಕ್ ಜ಼ಣಾನ ಮೋಕಲ್ನು" ಕರಿ ಬೊಲ್ಯೊ. 14 ತದೆ ಯೆಹೋವನೆ ಮೋಶೆಪರ್ ಖಿಜೈ಼ನ್ ಇನ, "ಲೇವಿಹುಯಿರ‍್ಹೊತೆ ಆರೋನ ತಾರೊ ಭೈ ಕಾಹೆಕಿಶು? ಯೊ ಅಛ್ಛಿನಿತರ ವಾತೆ ಬೋಲವಾಳೊಕರಿ ಮನ ಮಾಲುಮ್‌ ಛಾ಼. ಯೋಸ್ ತುನ ಮ್ಹೋರೆಹುವಾನ ಆವ್‌ಷೆ. ಯೊ ತುನ ದೇಖಾನಿ ವಖ್ಹ್‌ತೆ ಯೊ ಇನ ದಿಲ್ಮ ಶಂತೋಖ್ಹ್‌ ಕರ್ಷೆ. 15 ತೂ ಇನ ಜೋ಼ಡೆ ವಾತೆ ಬೋಲಿನ್ ಬೋಲ್ನುತೆ ವಾತ್‌ಖ್ಹಾರನ ಇನ ಖ್ಹಮ್‌ಜಾ಼ಡ್. ತಾರ ಮ್ಹೋಡನಾಬಿ ಮದತ್ ಕರಾವಳೊ ಹುಯಿನ್, ತುಮುನ ಶಾತ್‌ ಕರ‍್ನುಕರಿ ಮೇ ತುನ ಬೋಲುಸ್. 16 ಯೊ ತಾರ ಬದಲ್ ಅದ್ಮಿವೋನ ಜೋ಼ಡ್ಮ ವಾತೆ ಬೋಲ್‌ಶೆ. ಯೊ ತುನ ಬಾಕನಿತರ ರ‍್ಹಿಶೆ. ತೂ ಇನ ದೇವ್‌ನಿತರ ರ‍್ಹೀಶ್. 17 ಆ ನಾಹುಯಿನ್ ಆ ಲಠ್ಠಾನ ತಾರ ಹಾತ್ಮಲೀನ್ ಜಾ಼ವ್ಣು ಅನೇಥಿಸ್ ಯೊ ಅದ್ಭುತ್ ಕಾಮ್‌ಖ್ಹಾರು ಕರೀಶ್" ಕರಿ ಬೊಲ್ಯೊ.

ಪಾಛು಼ ಈಜಿಪ್ಟ್ ಆಯೋತೆ ಮೋಶೆ

18 ತದೆ ಮೋಶೆ ಇನೊ ಖ್ಹಖ್ಹ್‌ರೊ ಇತ್ರೊನಕನ ಫಾಛೊ಼ ಅಯಿನ್ ಇನ, "ಮೇ ಈಜಿಪ್ಟ್ ದೇಖ್ಹ್‌ಮ ಛಾ಼ತೆ ಮಾರ ಭಯ್ಯೆಕನ ಪಾಛೊ಼ ಇವ್ಣೆ ಜಾನ್‌ಥಿ ಛಾ಼ಕಿ ಶು ಕೊಯ್ನಿಕರಿ ಜೈ಼ನ್ ದೇಕ್ಣು" ಕರಿ ಬೊಲ್ಯೊ. ಇತ್ರೋನನೆ ಮೋಶೆನ, "ತೂ ಸಮಾಧಾನ್‌ ಜೈ಼ನ್‌ ಆವ್ " ಕರಿ ಬೊಲ್ಯೊ. 19 ಯೆಹೋವನೆ ಮಿದ್ಯಾನ್‌ಮ ಮೋಶೆನ, ತೂ ಈಜಿಪ್ಟ್ ದೇಖ್ಹ್‌ನ ಪಾಛು಼ ಫರಿನ್ ಜಾ಼ ತಾರು ಜಾನ್ನ ಕಾಡಿನಾಕ್ಣುಕರಿ ಥೂತೆ ಖ್ಹಾರು ಮರಿಗಯು ಕರಿ ಬೊಲ್ಯೊ. 20 ಮೋಶೆ ಇನಿ ಬಾವಣ್ಣ ಲಡ್ಕಾವ್ನ ಗಧೇಡಪರ್ ಬೆಖ್ಹಾಡಿನ್ ಇವ್ಣುನ ಬುಲೈಲಿನ್ ಈಜಿಪ್ಟ್ ದೇಖ್ಹ್‌ನ ಗಯೊ. ಜೋ಼ಡ್ಮ ಇನೆ ದೇವ್ನೆ ಪಾಡಿಲಿಜಾ಼ವ್ಣುಕರಿ ಬೋಲ್ಯೊತೆ ಲಠ್ಠಾನ ಪಾಡಿಲಿಗಯೊ. 21 ಯೆಹೋವನೆ ಮೋಶೆನ ಅಮ್ ಬೊಲ್ಯೊ "ತೂ ಈಜಿಪ್ಟ್ ಪಾಛು಼ ಆವನಿವಖ್ಹ್‌ತೆ ಮೇ ತಾರ ಹಾತೇಖ್ಹು ಕರ‍್ಯೊತೆ ಮಹಾನ್ ಕಾಮ್ನ ಫರೋಹನ ಖ್ಹಾಮೆ ಕರ್ನು. ಕತೋಬಿ ಇನ ದಿಲ್ನ ಕಠಣ್ ಕರಿಶ್. ಇನಖ್ಹಾಜೆ ಯೊ ಅದ್ಮಿನ ಜಾ಼ವಾನ ಕೊ ಮ್ಹೇಲ್‌ಶೇನಿ. 22 ತದೆ ತು ಫರೋಹನ,ಯೆಹೋವ ಬೋಲಾತೆ ಖ್ಹಮಜ಼್‌ ‘ಇಸ್ರಾಯೇಲ್ ಮಾರೊ ಛಿಯ್ಯೊ, ಮಾರೊ ಪೈಲ್ಹೋಟೊ ಛಿಯ್ಯೊ. 23 ಅಜು಼ ಮಾರೊ ಛಿಯ್ಯೊ ತಾರ ದೇಖ್ಹ್‌ಥೊ ನಿಕ್ಳಿನ್ ಮನ ಆರಾದನೆ ಕರಾನ ಇನ ಹುಕುಮ್‌ ದೇವ್ಣು ಇನ ತೂ, ನಾ ಮಾನ್ಯೊತೊ ಮೇ ತುನ ಛಾ಼ತೆ ಪೈಲ್ಹೋಟ ಲಡ್ಕಾವ್ನ ಮಾರಿನಾಖಿಷ್ ಯೆಹೋವ ಬೋಲುಕರಸ್" ಕರಿ ಖ್ಹಮ್‌ಜಾ಼ಡ್‌ನು. 24 ಆನಾಹುಯಿನ್ ಮೋಶೆ ಜಾ಼ವಾನ ಮಾರಗ್‍ಮ, ಛತ್ರಾಮ ರ‍್ಹವಾನಿವಖ್ಹ್‌ತೆ ಯೆಹೋವನೆ ಇನ ಖ್ಹಾಮ್ಣೆ ಅಯಿನ್ ಇನ ಜಾನ್ನ ಕಾಡಿನಾಖಿದೇವ್ಣು ಕರಿ ಥೊ. 25 ಅಮ್‍ರ‍್ಹಾವಮ ಚಿಪ್ಪೋರನೆ ಬಂಡಾನಿ ಛ಼ರೀಥಿ ಇನ ಛಿಯ್ಯಾನ ಖ್ಹತ್ನ ಕರೈನ್ ಇನ ಮೋಶೆನ ಪಂಜಾ಼ನ ಛಿಮಾಡಿ ಅನವಾರ್ ಹೈರಿತೆನ "ತೂ ಮನ ಲ್ಹೋಯಿಥಿ ಹುಯೋತೆ ನವ್‌ಷೊ" ಕರಿ ಬೋಲಿ. 26 ತದೆ ಯೆಹೋವ ಇನ ಬಚಾ಼ಡ್ಯೊ, ತದೆ ಯೊ ಹೈರಿತೆ, "ಖ್ಹತ್ನಾನ ಖ್ಹಾಜೆಥೀಸ್ ತೂ ಮನ ಲ್ಹೋಯಿಥಿ ರಂಚೈ಼ನ್ ಹುಯೊತೆ ನೌಶೊಕರಿ ವಾತೆ ಬೋಲಿ. 27 ಅತ್ರೇಸ್ ಕಾಹೆತೆ ಯೆಹೋವನೆ ಆರೋನನ "ತೂ ಮೋಶೆನ ಮಳಾನ ಜ಼ಂಗಳ್‌ಮ ಚ಼ಲ್ಯೊಜಾ಼" ಕರಿ ಬೊಲ್ಯೊ ಯೊ ಜೈ಼ನ್ ದೇವ್ನ ಪಹಾಡ್‌ಮಾಸ್ ಮ್ಹೋರೆ ಮಳಿನ್ ಬುಚ್ಚದಿದೊ. 28 ತದೆ ಮೋಶೆನೆ ಆರೋನನ, ಬೋಲಿ ಮೋಕ್‌ಲ್ಯೊತೆ ಯೆಹೋವನಿ ಅಖ್ಖೀಸ್ ವಾತೆವ್‌ನಾಬಿ ಇನ ಹುಕುಮ್‌ ದಿದೋತೆ ಅದ್ಭುತ್ ಕಾಮ್‌ಖ್ಹಾರುಬಿ ಇನೆ ಕರ‍್ಯೊತೆ ಖ್ಹಾರುಸ್ ಆರೋನನ ಖ್ಹಮ್‌ಜಾ಼ಡ್ಯೊ. 29 ಆ ಹುವಾದಿನ್ ಮೋಶೆ ಅಜು಼ ಆರೋನ ಇವ್ಣೆ ಜೈ಼ನ್ ಇಸ್ರಾಯೇಲ್ನು ಹಿಡಿ ಶಾಣವ್ನ ಎಕ್ಟು ಮಳಾಯೊ. 30 ಯೆಹೋವನೆ ಮೋಶೆನ ಬೋಲಿರಾಖ್ಯೊಥೋತೆ ವಾತೇವ್ನ ಆರೋನನೆ ಇವ್ಣುನ ಖ್ಹಮ್‌ಜಾ಼ಡಿನ್ ಅದ್ಮಿನ ಡೋಳಾವ್ನ ಖ್ಹಾಮೆ ಅದ್ಭುತ್ ಕಾಮ್‌ಖ್ಹಾರು ಕರ‍್ಯೊ. 31 ಅದ್ಮಿನೆ ವಿಶ್ವಾಸ್ ಕರ‍್ಯು, ಯೆಹೋವ ದೇವ್ ಇಸ್ರಾಯೇಲ್‌ವಾಳನ ದಯಾಕರಿನ್ ಇವ್ಣು ಖರಾಬ್ ಹಾಲತ್ನ ಮನ್‌ಮ ಲೀಖಿರಾಖ್ಯೊಸ್ ‌ಕರಿ ಬೋಲಾನು ಇಸ್ರಾಯೇಲ್‌ವಾಳು ಬೋಲಾಖ್ಹತರ್ ಮುಡ್‌ಕ್ಯು ಝು಼ಕೈನ್ ಖ್ಹಲಾಮ್ ಕರ‍್ಯು.